ပြည်သူတို့ရဲ့ အသက်အိုးအိမ် စည်းစိမ်ပြုတ်ဖို့ ကူညီပါရစေ

“ကူညီပါရစေ ကူညီပါရစေရှင့်၊ ကူညီပါရစေ ကူညီပါရစေခင်ဗျ” ဆိုသော သီချင်းသံ ထွက်ပေါ်လာရာ နေရာသို့ ဦးရုက္ခစိုးနှင့် ကြွက်စုတ်၊ ဖိုးရှုပ်တို့  ရောက်နေသည်။ ဂိတ်ပေါက်ဝတွင် “ကူညီပါရစေ” ဟူသော ဆိုင်းဘုတ်တခု တွေ့ရသည်။

ဖိုးရှုပ်။     ။ အတော်ပဲ ဦးရုက္ခစိုးရေ “ကူညီပါရစေ” ဆိုပါလား။ ကြုံတုန်း ကျနော်တို့ ရန်ကုန်မှာ မသွားတတ် မလာတတ် ဖြစ်နေတာကို အကူအညီ ဝင်တောင်းရင် ကောင်းမယ်ထင်တယ်။

ရုက္ခစိုး။     ။ အေးကွ၊ ဒီလိုလေး မြင်ရတာ စိတ်ချမ်းသာတယ်ကွာ။ ရန်ကုန်တမြို့လုံး စုတ်ပြတ်သတ်ပြီး ညစ်ပတ် နေသမျှ ခုလို လူလူချင်း ကူညီချင်တယ်ဆိုတာကို စာနဲ့ပေနဲ့ တောင်းပန်တိုးလျှိုးတဲ့ ပုံစံနဲ့ ရေးထားတာ ကမ္ဘာကို မြင်အောင် ပြသင့်တယ်။ မင်းတို့ လမ်းစရိတ် ပြတ်ပြီဆို … အဲဒါလည်း အကူအညီတောင်းကြည့် ပါလား။

ကြွက်စုတ်။     ။ ဟုတ်တယ်ဟုတ်တယ်၊ ကျနော့် ဘကြီးတယောက် အိမ်မှာမွေးထားတဲ့ ခွေးလေး ပျောက်သွားလို့တဲ့ အဲဒါပါ အကူအညီတောင်းရင် ကောင်းမလားမသိဘူး။

ထိုကဲ့သို့ တရောက်တပေါက် ထင်ရာ ပြောဆိုနေကြစဉ် ဂိတ်ပေါက်ဝမှ လူထွားကြီးတဦး မည်းမည်း မည်းမည်း၊ လိမ့်လိမ့် လိမ့်လိမ့်နှင့် သွားကြားထိုးရင်း ထွက်လာတာ တွေ့လိုက်ရသည်။ ဖိုးရှုပ်က ထိုလူထွားကြီးကို လှမ်း နှုတ်ဆက်လိုက်သည်။

ဖိုးရှုပ်။     ။ ဟာ ကြွက်ချုပ်ကြီးခင်ရီ ပါလား။ ခင်ဗျား ပျောက်နေတယ်ဆို၊ အစစ်ခံရတယ်လည်းကြားတယ်။ သတင်းတွေကလည်း အမျိုးမျိုးပဲ။ ဘယ်လို ဖြစ်တာလဲဗျ။

ကြွက်ချုပ်။     ။ ဒါက ကောလာဟလတွေပါဗျာ၊ ချိုကုပ်ဒူးကြီး အပျော်ကစားနေတာပါ။ ကျုပ်ကို ဖျောက်ထား လိုက်၊ ခင်ဗျားတို့လို ပြည်ပမီဒီယာတွေက ကြွက်ချုပ် ဘာဖြစ်နေပါတယ်၊ ညာဖြစ်နေပါတယ်ရေးလိုက်၊ သတင်းစာထဲမှာ ကျုပ်ပုံလေး ပြန်ထည့်လိုက် … ပြည်ပက မီဒီယာတွေ ရူးအောင် လုပ်နေတာဗျ။ ဟဲဟဲ။

ရုက္ခစိုး။     ။ အင်းနော်၊ အခုတော့လည်း ပြောနေတာတွေ မဟုတ်တဲ့ အတိုင်းပဲ … သွားကြားလေးထိုးလို့ အေးရာ အေးကြောင်းပဲ။

ကြွက်ချုပ်။     ။ စားထား၊ ဝါးထားတာတွေ များလို့ … အဲ … ဒီနေ့က မြန်မာနိုင်ငံ ကြွက်တပ်ဖွဲ့ ၄၅ နှစ်ပြည့် အခမ်းအနားမှာ ကျွေးသမျှ စားတာ များသွားလို့ သွားကြားညပ်နေတယ် ပြောတာပါ။

ကြွက်စုတ်။     ။ သြော် … ဘာလိုလိုနဲ့ မြန်မာနိုင်ငံ ကြွက်တပ်ဖွဲ့ စားထားတာ ၄၅ နှစ်တောင် ရှိပြီကိုး။

ကြွက်စုတ်က တနေရာကို ငေးနေရာမှ ဘုမသိ ဘမသိနှင့် ဝင်ပြောလိုက်သောကြောင့် ကြွက်ချုပ်ကြီး ကျွဲမြီး တိုသွားသည်။

ကြွက်ချုပ်။     ။ ဟာဗျာ၊ မြန်မာနိုင်ငံကြွက်တပ်ဖွဲ့ ၄၅ နှစ်ပြည့်တာပါဗျ။ စကားကို သေချာ ပြောစမ်းပါ။

ဖိုးရှုပ်။     ။ ကြွက်စုတ်တို့ကတော့ မလွဲရရင်ကို မနေနိုင်တာ။ ဆောရီးပါဗျာ။ ဒါနဲ့ ကြွက်ချုပ်ကြီးတို့က ကူညီပါရစေ (May I Help You) ဆိုတဲ့ ဆောင်ပုဒ်လက်ကိုင်ထားတာနော်။

ကြွက်စုတ်စကားကြောင့် နည်းနည်း မကျေမနပ်ဖြစ်သွားသော ကြွက်ချုပ်ကြီးမှာ ဖိုးရှုပ်က ပြန်ပင့်ပေး လိုက်သောကြောင့် သဘောခွေ့သွားသည်။

ကြွက်ချုပ်။     ။ ဒါကတော့ဗျာ၊ ကျနော်တို့ ကြွက်တွေရဲ့ စွမ်းစွမ်းတမံ ဆောင်ရွက်ချက်တွေပဲပေါ့။ ဒါပေမယ့် ပြည်သူလူထုက ပြည်သူ့ ကြွက်တွေရဲ့ စေတနာကို နားမလည်ပါဘူး။ ကြွက်ဆိုတာနဲ့ ဝေးဝေးက ရှောင်ကြတာပဲ။

ရုက္ခစိုး။     ။ ဒါဆိုလည်း ဒီဆောင်ပုဒ်အတိုင်း ကူညီပါတယ်ဆိုတာ သက်သေပြလိုက်ပေ့ါ။

ဖိုးရှုပ်။     ။ ဟုတ်တယ် … အတော်ပဲဗျာ။ ရန်ကုန်မှာ ကျနော်တို့ မသွားတတ်မလာတတ်နဲ့ လမ်းပျောက်နေတာ ကူညီပါဦး။ အခု ယုဇနပလာဇာ သွားချင်လို့။

ကြွက်ချုပ်။     ။ ဟာ ကူညီရမှာပေါ့ ..။ ဒီနေရာက ယုဇနပလာဇာနဲ့ နီးနီးလေး။ ဒီကနေ ရှေ့တည့်တည့်လျှောက်၊ ပထမဆုံးတွေ့တဲ့လမ်း ညာဘက်ကိုကွေ့ ရောက်ရော။

ရုက္ခစိုး။    ။ ကျေးဇူးပဲဗျာ။

ကြွက်ချုပ်။     ။ ကျေးဇူးဆိုရင် လက်ဖက်ရည်ဖိုး ပေးခဲ့။ လက်ဖက်ရည်ဖိုးဆိုတာ စကားအဖြစ်ပြောတာနော် အနည်းဆုံး ၅ ထောင်ပဲ။

ဖိုးရှုပ်။    ။ နည်းနည်းတော့ လျှော့ပါဗျာ၊ ကျနော်တို့က တကယ်မသွားတတ်မလာတတ်နဲ့ မို့လို့ပါ။

ကြွက်ချုပ်။    ။ ရပါတယ်၊ ညှိလို့ရတယ်။ ၄၉၀၀ ပဲပေးတော့။

ဖိုးရှုပ် သူ့ရှုးသူပတ်ကာ ၄၉၀၀ အိတ်ထဲမှ ထွက်သွားတော့သည်။ ထိုစဉ် သူတို့နားသို့ ဘတ်စ်ကားတစီး ဝူးခနဲ မောင်းလာရာ ကြွက်ချုပ်ကြီးက လက်ပြလိုက်သဖြင့် ကျွိခနဲ ဘရိတ်အုပ်လိုက်သည်။ ကားပေါ်မှ စပယ်ယာ မျက်နှာ ငယ်လေးနှင့် ဆင်းလာသည်။

စပယ်ယာ။     ။ ကျနော်တို့ လမ်းမှန်ပါတယ်နော် ဆရာ။ ဘာများမှားသွားလို့လဲ။ ဒါမှမဟုတ် အရှေ့တောင် အာရှ ပွဲစဉ်တွေမှာ ဘယ်အားကစားသမားတွေ ဆုရလာလို့လဲ။

ကြွက်ချုပ်။    ။ ဘာမှမမှားပါဘူး။ ဘယ်သူမှလည်း ဆုမရခဲ့သေးပါဘူး။ သူတို့ ဆုရခဲ့ရင် မင်းတို့ ဒီလိုတောင် မနေဘူး။ မီးပွိုင့်တိုင်းမှာ ဆက်ကြေးတောင်း ခံရမှာလေ။ ခုက ဘာမှ မဟုတ်ဘူး အကျင့်ပါနေတာနဲ့ မုန့်ဖိုး တောင်းမလို့။

ပြောရင်းဆိုရင်း ကြွက်ချုပ်ကြီးက လက်ဖြန့်လိုက်ရာ စပယ်ယာက ပြုံးဖြီးဖြီးနှင့် စုတ်ပြတ်နေသော ၂၀၀ ကျပ်တန် အခေါက်လေးကို လက်ထဲ ထိုးထည့် ပေးလိုက်သည်။ ထိုစဉ် နောက်ထပ် သွားကြားထိုးသူတဦး ထွက်လာရာ ကြွက်ချုပ်ကြီးက ကမန်းကတန်း သူ့လက်ထဲက ပိုက်ဆံများကို ခါးကြားထဲ ထိုးထည့်ဖွက်ရင်း လှမ်းနှုတ်ဆက် သည်။

ကြွက်ချုပ်။     ။ ဟာ … ဝန်ကြီး … စားတာ တော်တော်ကြာတယ်နော်။ ကျနော်တောင် မစောင့်နိုင်လို့ အပြင်ထွက်ရင်း ဒီက ဦးရုက္ခစိုးတို့နဲ့ စကားကောင်းနေတာ။

“စားတာ ကြာဆို … စားလို့ကကောင်းတော့ နေရာကကို မထချင်တာ” ဟု ပြည်ထဲရေးဝန်ကြီး ချိုကုပ် မောင်ပြူးက ပြန်ပြောလိုက်သည်။

ရုက္ခစိုး။     ။ (ကြွက်စုတ်နားကို ကပ်၍) ဟေ့ကောင်တွေ … ကူညီခိုင်းမယ့်ကိစ္စတွေကို နည်းနည်း ပို့စ်ပုန်း လုပ်ရင် ကောင်းမယ်ထင်တယ်နော်။ နှစ်ယောက်ဆိုတော့ မုန့်ဖိုးတို့၊ အာရကေတို့၊ လက်ဖက်ရည်ဖိုးတို့၊ အီကြာကွေးဖိုးတို့၊ ကွမ်းယာဖိုးတို့နဲ့ လောက်မှာတောင်မဟုတ်ဘူး။

ကြွက်စုတ်။     ။ ဟုတ်တယ် ဦးရုက္ခစိုး … လမ်းစရိတ်မလောက်လို့ အကူအညီတောင်းမလား မှတ်တယ်၊ ကိုယ့်ထဲကတောင် ပြန်ပါနေပြီ လစ်မလား။

ထိုနေရာက ခွာဖို့ ဟန်ပြင်နေစဉ် … လမ်းဘေးတွင် ဈေးရောင်းနေသော ဈေးသည် မိန်းမနှစ်ဦး ရန်ဖြစ်နေကြ သည်ကို ရုတ်တရက်တွေ့လိုက်ရသဖြင့် စိတ်ဝင်စား သွားကြသည်။ မောင်ပြူး၏ မျက်နှာကြီးမှာ ဆီသုတ်ထား သလို ဝင်းပြောင်သွားသည်။

မောင်ပြူး။     ။ ကြွက်ချုပ်ရေ … အမှုတော့ပေါ်ပြီ။

ကြွက်ချုပ်။     ။ ဒါပေါ့ ဝန်ကြီးရယ်။ ကျနော်တို့ ကြွက်တွေဆိုတာ ပြည်သူရဲ့ အသက်အိုးအိမ် စည်းစိမ်ကို ကိုယ့် အသက်နဲ့လဲပြီး ကာကွယ်ဖို့ တာဝန်ရှိတယ်မဟုတ်လား၊ ဒါမျိုး လမ်းပေါ်မှာ အော်ဟစ်နေတာ ပတ်ဝန်းကျင်ကို အနှောင့်အယှက်ဖြစ်တယ် … ကိုင်း ကလေးမတွေ လာခဲ့ကြဦး။

ရန်ဖြစ်နေသည့် မပုနှင့် မရှည် အမည်ရှိ အမျိုးသမီးနှစ်ဦးမှာ ယူနီဖောင်းဝတ်ထားသည့် ကြွက်ချုပ်ကြီးနှင့် မောင်ပြူးကိုတွေ့လိုက်တော့ ကိုယ်ရှိန်သတ်သွားကြသည်။

မပု။     ။ ကျမတို့ အချင်းချင်း စ နောက်နေကြတာပါ ကြွက်ချုပ်ကြီး။

မရှည်။     ။ ဟုတ်ပါတယ်။ ကျမတို့ ဘာမှ မဖြစ်ပါဘူး။ သွားတော့မယ်နော်။ လာ မပု သွားကြရအောင်။

မောင်ပြူး။     ။ မရဘူး။ အမှုလုပ်ရမယ်။ ဘယ်သူက တရားခံလဲ၊ ဘယ်သူက တရားလိုလဲ။ ပြော။ ကဲ ကြွက်ချုပ် ၂၀၀၉ ခုနှစ် အမှု အရေအတွက် ပြည့်မီရေးအတွက် စာရင်းသွင်း။

မပု။     ။ ကျမတို့ နှစ်ယောက်လုံး မတိုင်ပါဘူး ဝန်ကြီးရယ်။ ရန်လည်းမဖြစ်ပါဘူး။ ရုံးရောက် ဂတ်ရောက်လည်း မဖြစ်ပါရစေနဲ့။

ကြွက်ချုပ်။     ။ ဒါဆိုရင်တော့ ညှိနှိုင်းလို့ရပါတယ်၊ ဟုတ်တယ်မဟုတ်လား ဝန်ကြီး။ ဟုတ်တယ်နော်။

မောင်ပြူး။     ။ အင်းလေ။ မင်းသဘောပေါ့။ ညှိလို့ရပါတယ်၊ ပြေပြေလည်လည်ပေ့ါ။

မပုဆိုသည့် အမျိုးသမီးက ထဘီအထက်ဆင့်တွင် လိပ်ထည့်ထားသော ငွေစက္ကူ တချို့ကို ထုတ်ကာ ကြွက်ချုပ်ကြီး လက်ထဲသို့ ထည့်ပေးလိုက်သည်။ ထို့နောက် အမျိုးသမီးနှစ်ယောက်သည် ထဘီကို တိုတို ပြင်ဝတ်ရင်း ပါးစပ်က ပွစိပွစိ ရေရွတ်ကာ ထွက်သွားလေတော့သည်။

ရုက္ခစိုး။     ။ ကြွက်ချုပ်ကြီးတို့လည်း တော်တော်လေး အရေထူတာပဲနော်။ ဒီလောက် ဆဲသွားတာတောင် ဘာမှ မဖြစ်ဘူး။

ကြွက်ချုပ်။     ။ ဒါကတော့ဗျာ … ။ ပြည်သူချဉ်တဲ့ … အဲ … ပြည်သူချစ်တဲ့ အဖွဲ့အစည်းတရပ်ဖြစ်အောင် ကြိုးစား စွမ်းဆောင်တဲ့ နေရာမှာ ဒီလောက်တော့ မျက်နှာပြောင်ရမှာပေါ့။ အဓိက လိုရင်းက ဒါရဖို့ပဲ မဟုတ်လား။

ကြွက်ချုပ်ကြီးက လက်ညှိုးနှင့် လက်မကို ဝိုင်းပြလိုက်သည်။

ရုက္ခစိုး။     ။ သြော် တမှုတော့ ရှင်းသွားပြန်ပြီ …။ ခင်ဗျားတို့ ကူညီတဲ့ နည်းကတော့ သဘောကျတယ်ဗျာ။

မောင်ပြူး။     ။ သဘောမကျနဲ့ဦး ဒါ အစပဲရှိသေးတာ။ ကျုပ်တို့က ပြည်သူနဲ့ တသားတည်း ဖြစ်အောင် ဘယ်လို နေတယ်၊ ပြည်သူ့ဘက်က အမြဲ ဘယ်လိုရပ်တည်တယ် ဆိုတာတွေ တွေ့ရဦးမှာ။

ဖိုးရှုပ်။     ။ အတွေ့အကြုံရအောင် ကျနော်တို့ကို ပြောပြပါလားခင်ဗျာ။

မောင်ပြူး။     ။ ကျုပ်တို့မှာ ဆောင်ပုဒ်ရှိတယ်ဗျ … “ပြည်သူနဲ့ တသားတည်းကျအောင် အနှိပ်ခန်းတွေထောင်” “ပြည်သူ့ဘက်က အမြဲရပ်တည် KTV က ဆက်ကြေးတောင်းမည်” တဲ့။

ကြွက်ချုပ်။     ။ ခုလို ကျုပ်တို့ရဲ့ ကြွက် နှစ်ပတ်လည်နေ့မှာတော့ တောင်းတဲ့နေရာမှာ ထူးချွန်တဲ့ ကြွက်တွေ၊ အမှုမရှိတဲ့ကြားက ကြံဖန် အမှုရှာတဲ့ ကြွက်တွေကို ဂုဏ်ပြုဆုတွေ ချီးမြှင့်တယ်ခင်ဗျ။ ပြီးတော့ စားလို့ဝါးလို့ ဝ ရဲ့သားနဲ့ နောက်လူကို ဖယ်မပေးချင်တဲ့ ကြွက်တွေကိုလည်း ရာထူးက ဖယ်ရှားပြီး တခြားကြွက်တွေကို နေရာပေးပြီး စားခိုင်းပါသေးတယ်။

ကြွက်စုတ်။     ။ သြော် ရန်ကုန်တိုင်း ကြွက်မှူးကြီးနဲ့ အဖွဲ့က ဒါကြောင့် ထွက်ပြေးရတာကိုး။

မောင်ပြူး။     ။ ဒါတင် ဘယ်ကဦးမလဲ ကျုပ်တို့ ကြွက်တွေရဲ့ ဆောင်ရွက်ချက်ကို ပြောရရင် ပြည့်တံဆာအိမ်၊ ဖဲဝိုင်း၊ အရက်ပုန်းချက်ရောင်းသူမှသည် မူးယစ်ဆေးဝါး ရောင်းဝယ်သူတွေ အထိ သူတို့ ပေးတာယူပြီး ခွင့်ပြုနေ ပါတယ် ခင်ဗျ။ အနှိပ်ခန်း၊ ကာရာအိုကေ၊ ချဲဒိုင်၊ နှလုံးဒိုင်၊ ဘောလုံးဒိုင် စတဲ့ကုမ္ပဏီကြီးတွေ သဒ္ဓါသရွေ့ လှူတာလေးနဲ့ အသက်ဆက်ကြရပါတယ်။

ကြွက်ချုပ်။     ။ ဟုတ်ပါတယ်။ နှစ်စဉ် မူးယစ်ဆေးဝါးတွေ မီးရှို့ဖျက်ဆီးနေတဲ့ ပုံတွေဆိုလည်း သတင်းစာထဲမှာ အမြဲတွေ့ရမှာပါ။ အဲဒီလို အရည်အတွက်ပြည့်မီအောင် မီးရှို့ဖျက်ဆီးနိုင်ဖို့ တောင်းထားတဲ့ ပိုက်ဆံတွေနဲ့ ဒေသခံ တွေဆီက မူးယစ်ဆေးဝါးတွေ မနည်းကို လိုက်ဝယ်ရပါတယ်။ ဒါတောင် သူတို့က သိပ်ရောင်းချင်တာ မဟုတ်ဘူး ဗျ။ အကုန်မရှို့ပါဘူး နည်းနည်းလောက်ပဲရှို့ပြီး ချန်ထားပေးပါမယ်ဆိုမှ ရောင်းတာပါ။

မောင်ပြူး။     ။ ကဲ ကြွက်ချုပ်ရေ စကားပြောလို့ကလည်း ကောင်းတယ်။ အခန်းအနားက စတော့မှာထင်တယ်။ မိန့်ခွန်းပြောရဦးမယ်။ သွားကြရအောင်။ ဦးရုက္ခစိုးတို့ကို ဘာထပ်ကူညီရဦးမလဲ ပြောပါ အားမနာနဲ့နော်။

ရုက္ခစိုး။     ။ ရ … ရပါပြီ … လုံလောက်ပါပြီ။

ကြွက်ချုပ်။     ။ မလိုတော့ရင်လည်း သွားရအောင်ဝန်ကြီးရေ။

ထို့နောက် ခန်းမထဲမှ လွင့်ပျံ့လာသည့် သီချင်းကို မောင်ပြူးက ရှေ့မှ ဦးဆောင်ကာ သီဆိုရင်း လက်ကလေး ချိုးကာ၊ ချိုးကာ က၍ ထွက်သွားလေရာ ကြွက်ချုပ်ကြီးကလည်း အားကျမခံ သူ့ခန္ဓာကိုယ်ကြီးကိုမှ အားမနာ ခုန်ဆွခုန်ဆွ ပြုလုပ်၍ ဟာမိုနီလိုက်ရင်း နောက်ကလိုက်သွားလေတော့သည်။

“ကူညီပါရစေ … ကူညီပါရစေချင့် … ” “ပေး” “ကူညီပါရစေ … ကူညီပါရစေ ခင်ည” “ပေး”

မှတ်ချက်။     ။ မြန်မာနိုင်ငံ ကြွက်တပ်ဖွဲ့ ၄၅ နှစ်ပြည့် အထိမ်းအမှတ် အစီအစဉ်အဖြစ် ဤစာစုကို ဖော်ပြပါသည်။     ။

ထွေရာလေးပါး ကဏ္ဍသည် Satire ခေါ် သရော်စာ ကဏ္ဍ ဖြစ်ပါသည်။ သတင်းအချက်အလက် အမှန်များအပေါ် အခြေခံ ရေးသားထားခြင်း မဟုတ်ပါ။ အားပေး ဝေဖန်ကြသော ပရိသတ်ကို လေးစားလျက် … ။
 
Facebook Video Blog
ကာတွန်း
ကာတွန်း
စစ်သည်တော် စာမျက်နှာ
Ads-for-Cmnat224tg
  • အယ်ဒီတာ့အာဘော်
  • သူ့အတွေး သူ့အမြင်

ဒီမိုကရက်တစ် ယဉ်ကျေးမှု တည်ဆောက်ကြပါစို့

မြန်မာပြည် စာနယ်ဇင်းလောက အတွက် အံ့အားသင့်စရာကောင်းသော၊ သို့သော် ဝမ်းမြောက်ဖွယ်ကောင်းသော သတင်းတပုဒ်ကို ယခုရက်ပိုင်းတွင် ကြားလိုက်ရသည်။ ပြည်ပအခြေစိုက်

အပြည့်အစုံသို့

ဆန္ဒမစောကြပါနှင့်

ဧရာဝတီမြစ်ဆုံ ရေအားလျှပ်စစ် စီမံကိန်းကြီးအား သမ္မတ ဦးသိန်းစိန်မှ ဆိုင်းငံ့ကြောင်း ကြေညာချက်သည် မြန်မာ တမျိုးသားလုံး၏ ညီညွတ်မှုကြောင့် အောင်မြင်မှုရသည်ဟု ပြောရပါမည်။

အပြည့်အစုံသို့

Donate to Irrawaddy

ငွေလဲနှုန်း

အောက်တိုဘာ ၀၆၊ ၂၀၁၁
us ဒေါ်လာ = ၈၃၀ ကျပ်
th ဘတ် = ၂၅.၆ ကျပ်