မြစ်ဆုံကပေးသော သင်ခန်းစာ

Wednesday, 05 October 2011 18:05 အယ်ဒီတာ့အာဘော်
Print
သမ္မတ ဦးသိန်းစိန်က မြစ်ဆုံဆည်စီမံကိန်း ရပ်ဆိုင်းထားမည် ဆိုသည့် အသံ ပေါ်ထွက်လာခဲ့ပြီးနောက် တရုတ်အစိုးရနှင့် တရုတ်ကုမ္ပဏီ China Power Investment (CPI) တို့ဘက်က တုန့်ပြန်သံများ ထွက်လာခဲ့သည်။

မြစ်ဆုံဆည် စီမံကိန်း ရပ်တံ့သွားမည်ကို စိုးရိမ်သည် ဆိုလျင်လည်း စိုးရိမ်လောက် ပါသည်။ မြစ်ဆုံဆည် စီမံကိန်းတွင် ရင်းနှီးမြှုပ်နှံခြင်းက တရုတ်အစိုးရအနေဖြင့် စီးပွားရေးလုပ်ခြင်းသာ ဖြစ်သည်။ စီးပွားရေး လုပ်သူ အနေဖြင့် ထွက်ပေါ်လာမည့် အကျိုးအမြတ်နှင့် အရင်းအနှီး ဆုံးရှုံးရမည်ကို ကြောက်ရွံ့ခြင်းက ကျိုးကြောင်း ဆီလျော်မှု ရှိပါသည်။

သို့ရာတွင် တရုတ်အစိုးရနှင့် CPI ကုမ္ပဏီတို့ ဘက်ကလည်း မြန်မာနိုင်ငံ၏ အချုပ်အခြာ အာဏာပိုင်မှုနှင့် ပြည်သူလူထု၏ ဆန္ဒအပေါ် အပြန်အလှန် အသိအမှတ် ပြုသင့်သည်။ သို့သော် ၎င်းတို့ဘက်က ထိုကိစ္စရပ်များနှင့် ပတ်သက်၍ မည်သည့် ပြောဆိုမှုမှ မကြားရဘဲ ကိုယ်ကျိုးစီးပွား ရလိုမှု တခုတည်းအပေါ်သာ ကွက်၍ ပြောဆိုခဲ့ကြသည်။

မည်သို့ဆိုစေ ယခု မြစ်ဆုံဆည် စီမံကိန်း ရပ်ဆိုင်းထားသည့် ကိစ္စရပ်တွင် နှစ်နိုင်ငံ ကတိကဝတ် ပျက်သွားရပြီ ဖြစ်သည်။ ထိုသို့ ကတိပျက် သွားခြင်းက နှစ်နိုင်ငံ အချင်းချင်းယုံကြည်မှုနှင့် တဦးအပေါ် တဦး အလေးထားမှုများပါ ပျက်သုဉ်းသွားခြင်း ဖြစ်သောကြောင့် ကောင်းမွန်သည့် အလားအလာဟု မမြင်နိုင်ပါ။

ယခုကဲ့သို့ နှစ်နိုင်ငံ မျက်နှာပျက်ရခြင်း၏ အကြောင်းရင်း တရားခံမှာ ယခင် စစ်အစိုးရ၏ ဆိုးရွားသော အုပ်ချုပ်မှု စနစ်ကြောင့် ဟု ဆိုချင်သည်။ စစ်အစိုးရအဆက်ဆက် မဖြေရှင်းခဲ့ရုံမက ထပ်မံ၍ပင် ဖန်တီးခဲ့သည့် နိုင်ငံရေး၊ စီးပွားရေး၊ လူမှုရေး ပြဿနာများ၏ ဆိုးမွေအား လက်ရှိ အစိုးရသစ်က လက်လွှဲယူခဲ့ရသည်ကို ယခု မြစ်ဆုံစီမံကိန်း ပြဿနာက စတင် မီးမောင်း ထိုးပြနေပြီဖြစ်သည်။

ဦးသိန်းစိန်က ၎င်းသမ္မတအဖြစ် တာဝန်စတင် ယူစဉ် မိန့်ခွန်းပြောရာ၌ အစိုးရသစ်အနေဖြင့် တာဝန်ယူမှု၊ ပွင့်လင်းမြင်သာမှု များနှင့် သန့်ရှင်းသော အစိုးရ၊ ကောင်းမွန်သော အုပ်ချုပ်မှု စနစ် ကျင့်သုံးနိုင်ရန် ကြိုးစားမည်ဟု ကတိပေးခဲ့သည်။

ဦးသိန်းစိန် ပြောဆိုခဲ့သည့် သန့်ရှင်းသောအစိုးရဖြစ်ရေး၊ ကောင်းမွန်သော အုပ်ချုပ်မှုစနစ် ဖြစ်ရေးကို အကောင်အထည် ဖော်မည်ဆိုပါက နိုင်ငံ၏ စီးပွားရေးစီမံကိန်းများ ချမှတ်ရာတွင် ရရှိမည့် အကျိုးအမြတ်၊  ဖြစ်ပေါ်လာနိုင်သည့် အကျိုးအပြစ်များကို ပြည်သူလူထု သိရှိစေရန် ပွင့်လင်းလွတ်လပ်စွာ ချပြ၍ ပြည်သူလူထု ပါဝင်ပတ်သက်မှုကို အသိအမှတ် ပြုရလိမ့်မည်။

ယခုလက်ရှိ ကျင်းပနေသည့် လွှတ်တော်အတွင်း၌ လွတ်လပ်စွာစုရုံးခွင့် အဆိုကို အတည်ပြုနိုင် ခဲ့သည့်အပေါ် ကြိုဆိုသည်။ ထိုသို့ လွတ်လပ်စွာ စုရုံးခွင့်အပြင် နိုင်ငံ၏ နိုင်ငံရေး၊ စီးပွားရေး၊ လူမှုရေးဆိုင်ရာ မူဝါဒများ ချမှတ်ရာတွင် သတင်း အချက်အလက် များကို ပြည်သူလူထုလျင်မြန်စွာ သိရှိနိုင်ပြီး လွတ်လပ်စွာ ဝေဖန်ခွင့်၊ ဆန္ဒပြခွင့်၊ ရေးသားခွင့်များကို အာမခံချက် ပေးလာနိုင်လိမ့်မည်ဟု ယုံကြည်ပါသည်။

ပြည်ပရင်းနှီးမြှုပ်နှံမှု စီမံကိန်း အားလုံးလိုလိုမှာ တိုင်းရင်းသား ဒေသများတွင် အခြေစိုက်နေခြင်း ဖြစ်သောကြောင့် တိုင်းရင်းသား ပြည်သူလူထု၏ အသံကိုလည်း နားထောင်သင့်သည်။ အဆိုပါဒေသများတွင် ထိခိုက်ပျက်စီးနေသည့် သဘာဝ ပတ်ဝန်းကျင်၊ လူမှုဘဝများနှင့် ယဉ်ကျေးမှု ကိစ္စများကို ထည့်သွင်းစဉ်းစား၍ ရရှိမည့် အကျိုးအမြတ်နှင့် ချိန်ညှိကာ စီမံကိန်းများ မည်သို့ ဆောင်ရွက်သင့်သည်ကို ဒေသခံလူထုက သိရှိသင့်သည်။

ယခင် စစ်အစိုးရက ရခိုင်ကမ်းရိုးတမ်း ဒေသများတွင် ရွှေ သဘာဝဓာတ်ငွေ့ တူးဖော်ရေးလုပ်ငန်း၊ ကျောက်ဖြူ ရေနက်ဆိပ်ကမ်းနှင့် အထူးစီးပွားရေးဇုန် တို့ကို တည်ဆောက်လုပ်ကိုင်ရန် စီစဉ်ခဲ့သည့်အတွက် ဒေသခံ ရခိုင် တိုင်းရင်းသားများ၏ လူမှုဘဝများ၊ သဘာဝရင်းမြစ်များ၊ ယဉ်ကျေးမှုများ ပျက်ဆီးဆုံးရှုံး နေရသည်ကို တွေ့ရှိနိုင်သည်။

ရခိုင်တိုင်းရင်းသားများ၏ တောင်းဆိုမှုများမှာ မျှတ၍ တရားဝင်သည်။ ထို့အတွက် ၎င်းဒေသများရှိ စီမံကိန်းများနှင့် ပတ်သက်၍ လွှတ်တော်တွင် တင်သွင်းဆွေးနွေးမှုများ ပြုလာကြသည်။ စွမ်းအင်ဝန်ကြီး ဦးသန်းဋ္ဌေး၏ ပွင့်လင်းစွာ ပြန်လည် ဖြေကြားမှုကိုလည်း ကြိုဆိုပါသည်။

အလားတူ ကရင်နီဒေသတွင် ဆောက်လုပ်နေသည့် ဆည်စီမံကိန်းများကြောင့်လည်း ဒေသခံတိုင်းရင်းသားများ ရေလွှမ်းမိုး ခံရခြင်းအပါအဝင် ပျက်စီးဆုံးရှုံးမှုများ ရှိနေရာ ဖွင့်ဟတောင်းဆိုလာသော တိုင်းရင်းသားများ၏ အသံကိုလည်း ကြားနေ ရပါသည်။

ဒေသခံ တိုင်းရင်းသားများ မည်သို့မျှ အကျိုး မခံစားနိုင် ဖြစ်နေရသည်ကို ပြည်ထောင်စုစိတ်ဓာတ် ရှိသူတိုင်း ကိုယ်ချင်း စာနိုင်ရမည်။

ထို့ကြောင့် ပြည်သူလူထုအား နိုင်ငံတော်တည်ဆောက်ရေး လုပ်ငန်းစဉ်တွင် ယခုထက်ပို၍ ပါဝင် ပတ်သက်ခွင့် ပေးသင့်သည်။ အစိုးရ၏ အသုံးစရိတ်၊ ဝင်ငွေထွက်ငွေ များနှင့် တိုးတက်မှု ဆုတ်ယုတ်မှု အခြေအနေတို့ကို ပြည်သူလူထု အနေဖြင့် ရှင်းလင်းစွာ သိခွင့် ရှိခြင်းသည် အစိုးရနှင့် ပြည်သူ ဘက်နှစ်ဘက် အပြန်အလှန် ထိန်းညှိနိုင်သည့် ဒီမိုကရေစီ စနစ်တခုကို အုတ်မြစ်ချနေခြင်းပင်။

သို့မှသာ ကောင်းမွန်သော အုပ်ချုပ်မှုစနစ်ကို အကောင်အထည် ဖော်နိုင်ပေလိမ့်မည်။ တဆက်တည်းတွင် ခြစားမှုကိုလည်း ကာကွယ်နိုင်မည် ဖြစ်သည်။

အစိုးရအဖွဲ့တွင်း၌ မဆိုထားနှင့် သာမန် အဖွဲ့အစည်းများ အတွင်း၌ပင် ခြစားမှု၊ အလွဲသုံးစားပြုမှုတို့ ရှိနေနိုင်သည်။ သို့သော် ထိုသို့သော ခြစားမှု၊ အလွဲသုံးစားပြုမှုတို့ လျော့ပါးသည်ထက် လျော့ပါးစေရန် ဆောင်ရွက်နိုင်သည့် နည်းလမ်းများ ရှိပါသည်။ လွတ်လပ်သည့် တရားရုံးနှင့် တရားဥပဒေ စိုးမိုးမှု ရှိခြင်းက ဤနေရာတွင် အရေးအကြီးဆုံးဖြစ်သည်။ တရားဥပဒေ ရှေ့မှောက်တွင် မျက်နှာမရွေး၊ လူတန်းစားမရွေး၊ လူမျိုးမရွေး တပြေးညီ ရှိသင့်သည်။

အစိုးရအနေဖြင့် ဧရာဝတီမြစ်ဆုံဆည်ကိစ္စကို သင်ခန်းစာယူ၍ ရှေ့ဆက်မမှား သင့်တော့ပေ။ ထိုသို့မဟုတ်ဘဲ ယခင် ရှေးနည်းအတိုင်း ဖြေရှင်းဦးမည်၊ အုပ်ချုပ်သူများက ငါတကော ဆက်ကောမည် ဆိုလျှင် ပါးစပ်က ဘုရား၊ လက်က ကားယား ဆိုသည့် စကားအတိုင်း အများ၏ ယုံကြည်လေးစားမှု ဆက်လက် ကင်းမဲ့နေပေလိမ့်မည်။ ပါးစပ်က မည်သို့ပင် ဒီမိုကရေစီ စနစ်ကို လိုလားသည်ဟု ဆိုနေသော်လည်း အလုပ်နှင့် သက်သေပြနိုင်မှသာ အများက ယုံကြည်လက်ခံသော အစိုးရတရပ် ဖြစ်နိုင်ပေလိမ့်မည်။

ယခုလက်ရှိ အခြေအနေအရ မျိုးဆက်ဟောင်းများ ထားခဲ့သည့် ဆိုးမွေနှင့် ပြဿနာများကို ပြည်သူလူထုနှင့် အစိုးရ ပူးပေါင်း၍ ဟန်ချက်ညီညီ ဖြေရှင်းရန်သာ ရှိတော့သည်။ ယခု မျိုးဆက်က တာဝန်ယူဖြေရှင်း နိုင်မှသာ နောင်လာမည့် မျိုးဆက်သစ် အနေဖြင့် ကမ္ဘာ့အလယ်တွင် မျက်နှာပန်းလှနိုင်မည်ဖြစ်ကာ တရုတ်နိုင်ငံက ယခုကဲ့သို့ တဖက်သက် အပေါ်စီးမှ ပြောဆို ဆက်ဆံနေမှု များကိုလည်း ရှောင်လွှဲနိုင်လိမ့်မည်။

ပြုပြင်ပြောင်းလဲရေးနှင့် နိုင်ငံတော် တည်ဆောက်ရေး လုပ်ငန်းများမှာ မျိုးဆက်နှင့်ချီပြီး ပြုလုပ်ရမည် ဖြစ်သောကြောင့် ခဏတာနှင့် ပြီးဆုံးသွားမည်ဟု မယုံကြည်ပါ။

ယခင်မျိုးဆက် မှားခဲ့သမျှ ယခုမျိုးဆက်က ခံစားနေရပြီ။ နောက်လာမည့် မျိုးဆက်သစ်တို့ကို ကောင်းမွန်သော အမွေ လက်ဆင့်ကမ်း ထားခဲ့နိုင်ရေးအတွက် ကျနော်၊ ကျမတို့ အလုပ်စလုပ်ရန် ယခုအချိန်က အချိန်ကောင်းဟု ဆိုချင်ပါတော့သည်။