ကျန်းမာရေးဌာနမှ တာဝန်ရှိသူများက ပြည်တွင်းသတင်းဂျာနယ်တိုက်များသို့ အသေအပျောက်စာရင်းကို ပြောကြားသော်လည်း သတင်းဖော်ပြမှု မလုပ်ရန် တားမြစ်သည်ဟုဆိုသည်။
“သေတာအားလုံး ၃၀ ရှိပြီလို့ ကျန်းမာရေးဌာနက ပြောတယ်။ ဒါတောင် သူတို့လက်လှမ်းမမီတာ ရှိသေး တယ်တဲ့” ဟု ရန်ကုန်အခြေစိုက် သတင်းထောက်တဦးက ပြောသည်။
ယခုလ တလအတွင်း ရန်ကုန်တိုင်းတွင် မြောက်ဥက္ကလာပ၌ အဆိုးရွားဆုံးဖြစ်ပွားခဲ့ပြီး တောင်ဥက္ကလာပ၊ ဒေါပုံ၊ တောင်ဒဂုံ၊ မြောက်ဒဂုံ၊ လှိုင်သာယာ၊ ဒလ၊ ပုဇွန်တောင် အစရှိသည့် ဒေသများတွင် ဖြစ်ပွားနေသည်။
မန္တလေးတိုင်းတွင်လည်း အမရပူရ၊ ပြည်ကြီးတံခွန်၊ မိထ္ထီလာ၊ မြင်းခြံနှင့် ဧရာဝတီတိုင်းတွင် လပွတ္တာ၊ ဘိုကလေး အစရှိသော မြို့များတွင် ဝမ်းပျက်ဝမ်းလျှော ရောဂါ အများဆုံး ဖြစ်ပွားခဲ့ကြောင်း ကြားသိရသည်။
မြင်းခြံမြို့နေ အပြင်ဆေးခန်းဆရာဝန် တဦးက “ကျနော့်ဆေးခန်းမှာ ဝမ်းရောဂါကြောင့် ရောက်လာတဲ့ လူနာ တနေ့ကို ၄ ယောက်၊ ၅ ယောက်တော့ ရှိတယ်၊ မတိုး၊ မလျော့သွားပေမယ့် နေ့တိုင်း လိုလို ရှိတယ်၊ ဆေးရုံမှာလည်း လူနာ ၃၀၀ လောက်ရှိမယ်၊ သေဆုံးသူ ၅ ဦးလောက်တော့ရှိမယ်၊ ကလေးများတယ်” ဟု
ပြောသည်။
ပြည်သူလူထု အထိတ်တလန့်ဖြစ်ပွားမည်ကို စိုးရိမ်သည်ဟု ဆိုကာ ပြန်ကြားရေးဝန်ကြီးဌာန လက်အောက်ခံ စာပေစိစစ်ရေးက ယခုကဲ့သို့သော ကူးစက်ရောဂါများနှင့် စပ်လျဉ်း၍ အသေအပျောက် ပမာဏကို ထိန်းချုပ် ဖော်ပြခြင်းဖြစ်သည်ဟု သတင်းဌာနတချို့က ဆိုသည်။
လွန်ခဲ့သည့် သီတင်းပတ်အတွင်း ရန်ကုန်နှင့် မန္တလေး ကလေးဆေးရုံများတွင် ၀မ်းရောဂါကြောင့် လာရောက် ပြသသူ လူနာများပြားနေခဲ့ပြီး ခုတင်ပင် မလောက်ငဟု ကြားသိရသည်။
သို့သော်လည်း ယခုအခါ အခြေအနေ တိုးတက်ကောင်းမွန်လာသည်ဟု သက်ဆိုင်ရာ ဆေးရုံ တာဝန်ရှိသူ များက ပြောသည်။
ယခုဖြစ်ပွားသည့် ဒေသများထဲမှ တချို့သော ဒေသများအတွင်း ကာလဝမ်းရောဂါ အဆင့်ဖြစ်ပွားမှုများ ရှိသည်ဟုလည်း သတင်းများ ထွက်ပေါ်နေသည်။
| < Prev | Next > |
|---|
