ပဲခူးတိုင်း သာယာဝတီမြို့နယ် ပြည်သူ့လွှတ်တော်နှင့် တိုင်းဒေသကြီးလွှတ်တော် နေရာအတွက် ကြံ့ဖွံ့ပါတီက ဦးမောင် မောင် နှင့် ဦးတင်စိုး တို့က ကျေးရွာများတွင် မဲလိမ်၊ မဲခိုးမှုများနှင့် အတင်းအကျပ် ကြိုတင်မဲပေးခိုင်းသည့်အတွက် အနိုင် ရရန် သေချာကြောင်း တစည ပါတီ ပြည်သူ့လွှတ်တော် ကိုယ်စားလှယ် ဦးစန်းလွင်က ပြောသည်။ အိုင်ဂလုံ၊ ကညင်တပင်၊ ဖားရွှေကျော်၊ သစ်ရာကုန်း၊ စည်ပင်၊ မြစ်ကျိုး၊ ကြို့ကုန်း စသည့် ကျေးရွာများတွင် မဲမသမာမှုများ ရှိသည့် အတွက် တိုင် ကြား ထားကြောင်း၊ သို့သော်လည်း ရွေးကောက်ပွဲဥပဒေ အရ ကန့်ကွက်တိုင်ကြားလျှင် အာမခံ ငွေ ကျပ် ဆယ်သိန်း အာမခံတင်ရမည်ဟု ပါရှိသည့် အတွက် အခက်အခဲဖြစ်နေကြောင်း သိရသည်။

ရွေးကောက်ပွဲတွင် ကြံ့ဖွံ့ပါတီ၏ မဲလိမ်မဲခိုးမှုများနှင့် ကြိုတင်မဲ များပြားသည့်အတွက် ဖြစ်ပေါ်လာမည့် ရွေးကောက်ပွဲ ရလဒ်ကို လက်ခံမည်မဟုတ်ဘဲ ဒီမိုကရေစီပါတီများ စုပေါင်းပြီး ကော်မရှင်တွင် ကန့်ကွက်သွားမည်ဟု ဒီမိုက ရက်တစ် ပါတီ(မြန်မာ)၏ အထွေထွေ အတွင်းရေးမှူး (၁) ဒေါ်ချိုချိုကျော်ငြိမ်းကပြောသည်။ ၎င်းသည် ပဲခူးတိုင်း အနောက်ခြမ်း ကြို့ပင်ကောက်မြို့နယ် ပြည်သူ့လွှတ်တော်ကိုယ်စားလှယ်အဖြစ် ၀င်ရောက်ယှဉ်ပြိုင်ရာ ကြံ့ဖွံ့ ပါတီမှ ဦးသန့်ဇင်ကို ရှုံးနိမ့်ကြောင်း ထိုရလဒ်ကို လက်ခံမည်မဟုတ်ကြောင်း သိရသည်။

မဲလိမ်မဲခိုးမည်မှန်း သိသော်လည်း ရွေးကာက်ပွဲဝင်ရခြင်းမှာ ဒီမိုကရေစီ အခွင့်အရေးများ ရရှိမည်ဟု ထင်သည့်အတွက် ၀င်ရောက်ခြင်းဖြစ်ကြောင်း ဒီမိုကရက်တစ်ပါတီ(မြန်မာ) အထွေထွေအတွင်းရေးမှူး ဒေါ်သန်းသန်းနု ကပြောသည်။ “အမြဲတမ်းလိမ်လည် နေတဲ့သူတွေလေ၊ ဒါကြောင့် လိမ်နိုင်တယ်ဆိုတာတော့ သိပြီးသားပါ၊ မဲရုံထဲကို ကျမ မ၀င်ရဘူး၊ ဒါပေမယ့် ကြံ့ဖွံ့တွေက မဲရုံမှူး ဟန်ဆောင်ပြီးဝင်တယ်”ဟု ၎င်းကပြောသည်။

ကြံ့ဖွံ့ပါတီ၏ မဲလိမ်မဲခိုး၊ ကြိုတင်မဲများကြောင့် မိမိတို့ တစည ပါတီ“၀က်ဝက်ကွဲအောင်” ရှုံးရခြင်းဖြစ်သည်ဟု ပြည်မြို့နယ် ပြည်သူ့လွှတ်တော် အတွက် ၀င်ရောက်ယှဉ်ပြိုင်သည့် ဦးသာထူး က ပြောသည်။ တစည ပါတီအနေဖြင့် ပြည်သူ့ လွှတ် တော်၊ အမျိုးသားလွှတ်တော်၊ တိုင်းဒေသကြီး လွှတ်တော်တွင် ကြံ့ဖွံ့ပါတီ ကို အပြတ်အသတ် ရှုံးနိမ့်ကြောင်း၊ ကြံ့ဖွံ့ ပါတီ ၏ ဥပဒေမဲ့မှုများကို တိုင်ကြားမည်ဖြစ်သည်ဟု ၎င်းကပြောသည်။

ရှမ်းပြည်မြောက်ပိုင်း နမ့်ခမ်းမြို့ အောင်မေတ္တာရပ်ကွက် မဲရုံတွင် ယမန်နေ့က ကျားဖြူပါတီ၏ မဲရုံကိုယ်စားလှယ်ကို လုံခြုံ ရေး အကြောင်းပြကာ မဲရုံတွင်းမှ နှင်ထုတ်ခဲ့ကြောင်း သိရှိရသည်။ မဲရုံပိတ်ပြီးနောက် ကြံ့ဖွံ့ပါတီမှ ဝင်ရောက်ယှဉ်ပြိုင်သည့် ပန်းဆေး ကျော်မြင့်နှင့် မူဆယ် ခယက လူကြီးတချို့သည် ၎င်းတို့ ခေါ်ဆောင်လာသည့် တရုတ် လီရှော လူမျိုး ၁၇၀ ခန့်ကို ည ၈ နာရီ ထိုးခါနီးအထိ မဲပေးစေပြီး မဲရုံအပြင်ဘက်မှ လက်နက်ကိုင် တပ်ဖွဲ့များကို စောင့်ကြပ်စေခဲ့သည်။ နမ့်ခမ်းမြို့ခံ တဦး က ကြံ့ဖွံ့ပါတီ မဲရရှိမှုအခြေအနေ မကောင်းသောကြောင့် တရုတ် လီရှောများကို ခေါ်ဆောင်လာပြီး မဲ ပေးစေခြင်း ဖြစ်သည်ဟု ပြောဆိုသည်။

ရန်ကုန်မြို့ ကျောက်တံတား မြို့နယ် ၃၈ လမ်း မဲရုံမှ အဖွဲ့ဝင် တယောက်က ကြိုတင်မဲ ၄၀၀ ကို ၎င်းကိုယ်တိုင် ပြုလုပ် ခဲ့ကြောင်း၊ အလားတူ ပြုလုပ်ထား သည်များလည်း အများအပြား ရှိကြောင်း ထို့ကြောင့် တခြား မည်သည့် ပါတီများက မည်သို့ နိုင်သည် ဖြစ်စေ ကြံ့ဖွံ့ပါတီကို ယှဉ်နိုင်မည် မဟုတ်ကြောင်း ပြောဆို နေသည်ဟု မဲရုံ လေ့လာ စောင့်ကြည့်သူ တဦးက ပြောသည်။