ရန်ကုန်မြို့ရှိ စစ်ဆေးရုံ အမှတ် ၁ နှင့် အမှတ် ၂ တို့မှ အရာရှိ၊ အရာခံ၊ အကြပ်၊ တပ်သားများအားလုံး နိုဝင်ဘာ ၁ ရက် နေ့က ကြိုတင်မဲထည့်ခဲ့ရသည်ဟု စစ်ဆေးရုံ အမှတ် ၂ မှ အရာရှိငယ်တဦးက ပြောသည်။ လျှို့ဝှက်မဲပေးသည့် ပုံစံမဟုတ်ဘဲ သက်ဆိုင်ရာ အရာရှိများရှေ့တွင်ပင် ကြံ့ ဖွံ့ပါတီကို မဲထည့်ခဲ့ရကြောင်း ၎င်းကပြော သည်။ စစ်ဆေးရုံဝင်းအတွင်း နေထိုင်သူများက မိသားစုလိုက် ကြံ့ ဖွံ့ပါတီကို ကြိုတင်မဲထည့် ခဲ့ရသည်ဟုလည်း ဆိုသည်။

ရွေးကောက်ပွဲနေ့တွင် မဲရုံများ၌ တာဝန်ကျမည့် ဆရာ၊ ဆရာမများအားလုံး နိုဝင်ဘာ ၅ ရက်နေ့တွင် ကြိုတင်မဲပေးရန် ပညာရေးမှူးရုံးများက ညွှန်ကြားထားကြောင်း သိရသည်။ ကျောင်းအုပ်များက မိမိကျောင်းမှ မဲရုံစောင့်တာဝန်ကျ ဆရာ၊ ဆရာမ စာရင်းကို ပြုစု၍ တင်ပြရမည်ဖြစ်ပြီး အဆိုပါ စာရင်းသည် ကြံ့ဖွံ့ထောက်ခံမဲ ဖြစ်သွားကာ တဦးချင်း၏ ဆန္ဒများကို ကောက်ခံတော့မည် မဟုတ်ကြောင်း၊ တနိုင်ငံ လုံးတွင် မဲရုံစောင့်မည့် ပညာရေးဝန်ထမ်း ၂ သိန်းကျော် ရှိကြောင်း ကျောင်းအုပ်ဆရာမကြီး တဦးကပြောသည်။

ရခိုင်ပြည်နယ် ဒေသတချို့တွင် အဓမ္မ ကြိုတင်မဲ ကောက်ယူမှုများ ရှိနေကြောင်း သိရသည်။ ဖိအားပေးနည်းနှင့် ကြိုတင်မဲ ကောက်ယူကြောင်း၊ ရယက စာရေးများက အိမ်အထိ ကြိုတင်မဲလာယူပြီး ကြံ့ဖွံ့ကို မဲထည့်ရမည်ဟုပြောကြောင်း၊ ထို မဲကို ချိပ်မပိတ်ဘဲ ယူသွားကြောင်း၊ ရခိုင်တိုင်းရင်းသားများ တိုးတက်ရေးပါတီဥက္ကဋ္ဌ ဒေါက်တာအေးမောင်က ပြောသည်။ ဂီရိမုန်တိုင်း ဒဏ်ခံဒေသ ၃ ခုတွင် ရွေးကောက်ပွဲရွှေ့ဆိုင်းရန် စာတင်ခဲ့သော်လည်း အကြောင်းပြန်ကြားခြင်း မရှိကြောင်း သိရသည်။

ကရင်ပြည်နယ် ကြာအင်းဆိပ်ကြီးမြို့နယ်ရှိ အစိုးရ၀န်ထမ်းများ အားလုံး မယက ရုံး၌ နိုဝင်ဘာလ ၅ ရက်နေ့တွင် ကြိုတင်မဲပေးရမည် ဖြစ်ကြောင်း သတင်းရရှိသည်။ ၀န်ထမ်းတွေကမှာ ကြိုတင်မဲအတွက် လျှောက်လွှာ စာရွက်ဖြည့်ထားသည်မှာ ကြာပြီဖြစ်ကြောင်း ၀န်ထမ်းများနှင့် နီးစပ်သူတဦးက ပြောသည်။ ကြာအင်းဆိပ်ကြီးမြို့နယ်တွင် ကျန်းမာရေးနှင့် ပညာရေးဝန်ထမ်း အများစုရှိပြီး ကြံ့ဖွံ့ပါတီကိုပဲ မဲပေးရမည် ဖြစ်ကြောင်း သိရသည်။

စစ်အစိုးရက ရွေးကောက်ပွဲ အထူးထုတ် တံဆိပ်ခေါင်းသစ် ကျပ် ၅၀၀ တန်ကို နိုဝင်ဘာ ၇ ရက်နေ့ နံနက် ၉ နာရီခွဲမှ စတင်၍ ဆက်သွယ်ရေး စခန်း စာတိုက်များတွင် ရောင်းချမည် ဖြစ်ကြောင်း ယနေ့ထုတ် စစ်အစိုးရ သတင်းစာတွင် ဖော်ပြထားသည်။ အထူး အစီအစဉ် တရပ် အနေဖြင့် နေပြည်တော် ဗဟို စာတိုက်၊ ရန်ကုန်၊ မန္တလေး စာတိုက်ကြီးတို့တွင် ၀ယ်ယူသော စာပို့တံဆိပ်ခေါင်းများ ပေါ်တွင် တံဆိပ်ခေါင်းဖျက် အမှတ်အသား တံဆိပ်များ ရိုက်နှိပ်ပေးမည် ဖြစ်ကြောင်းလည်း ဖော်ပြထားသည်။

သီရိမင်္ဂလာဈေးနှင့် ဗဟိုစံပြ ငါးဈေးကဲ့သို့ ၂၄ နာရီ ဈေးကြီးများရှိ ဈေးသူ ဈေးသားများ အားလုံး နိုဝင်ဘာ ၅ ရက်နေ့တွင် ကြိုတင်မဲ ပေးရမည် ဖြစ်ကြောင်း သတင်းရရှိသည်။ မဲရုံ တည်ဆောက် ပေးမည် မဟုတ်ဘဲ ဈေးအာဏာပိုင်များမှ တဆင့် ဈေးဆိုင်ရှင်များနှင့် ၀န်ထမ်းများ စာရင်းကို ကောက်ယူ သည့်နည်း အသုံးပြုမည် ဖြစ်ရာ တဦးချင်းစီ၏ ဆန္ဒကို ဖော်ပြခွင့် မရသကဲ့သို့ ကြံ့ဖွံ့ပါတီ အတွက် ထောက်ခံသည့် မဲများသာ ဖြစ်သွားမည်ဟု ယူဆကြောင်း သီရိမင်္ဂလာဈေး တာဝန်ခံ တဦးက ပြောသည်။