နေပြည်တော်တွင် အမှတ် (၁) လျှပ်စစ်ဝန်ကြီး ဦးဇော်မင်းက မြစ်ဆုံဆည် စီမံကိန်းကို ဆက်လက်လုပ်ဆောင်မည်ဟု ပြောဆိုခဲ့မှုသည် ဖွဲ့စည်းပုံအခြေခံဥပဒေ၏ အခန်း ၁ ပုဒ်မ ၄၅ ကို ကိုယ်တိုင် ချိုးဖောက်သည့်အပြင် နိုင်ငံသားတို့၏ တာဝန်ကို ကျေပွန်စွာထမ်းဆောင်လိုသူများကို ခြိမ်းခြောက်သည့်အတွက် အရေးယူပေးပါရန် တသီးပုဂ္ဂလ နိုင်ငံရေးလှုပ်ရှားသူ ဦးဝင်းချိုက ပြောဆိုလိုက်သည်။ ဦးဝင်းချိုသည် ၂၀၁၀ ခုနှစ် ရွေးကောက်ပွဲကို ရန်ကုန်တိုင်း ဒဂုံမြို့နယ်မှ တသီးပုဂ္ဂလ အမတ်အဖြစ် ၀င်ရောက် ယှဉ်ပြိုင်ခဲ့သော်လည်း ရှုံးနိမ့်ခဲ့သည်။ ယခုအခါ ဧရာဝတီမြစ်အရေး စိုးရိမ်သည့်အတွက် အသိပေး ဟောပြောမှုများ လုပ်ဆောင်နေသူဖြစ်သည်။

စစ်မှန်သော အပြောင်းအလဲများ ပြုလုပ်နေမှုနှင့် အမျိုးသားပြန်လည်သင့်မြတ်ရေးတို့အပေါ် နိုင်ငံတကာ၏ သံသယဖြစ်မှုများ မှားယွင်းကြောင်း မြန်မာအစိုးရက သက်သေပြသင့်သည်ဟု အမေရိကန် အထူးကိုယ်စားလှယ် မစ္စတာ ဒဲရက် မစ်ချယ်က မြန်မာပြည်မှာ ပြန်လည် မထွက်ခွာမီ ယနေ့ သတင်းစားရှင်းလင်းပွဲတွင် ပြောဆိုလိုက်သည်။ နိုင်ငံရေး အကျဉ်းသား ၂ ထောင်ကျော် ကိစ္စ၊ တိုင်းရင်းသား ဒေသများတွင် လူ့အခွင့်အရေး ချိုးဖောက်မှု၊ မြန်မာအစိုးရနှင့် မြောက်ကိုရီးယား ဆက်ဆံရေးတွင် ပွင့်လင်းမြင်သာမှုရှိရေးတို့ကို သက်သေအနေဖြင့် ကိုင်တွယ်သင့်သည်ဟု မစ္စတာ ဒဲရက် မစ်ချယ်က ပြောသွားသည်။

စက်တင်ဘာ ၁၁ ရက်နေ့မှစ၍ မိုးအဆက်မပြတ် ရွာသွန်းမှုကြောင့် ထိုင်း-မြန်မာ နယ်ခြား သောင်းရင်းမြစ်ရေ မြင့်တက်လာပြီး ရေကြီးသောကြောင့် ထိုင်းဘက် မဲဆောက်နှင့် မြန်မာဘက် မြဝတီတို့တွင် ရပ်ကွက်များ ရေမြုပ်ပြီး နယ်စပ်ကုန်သွယ်ရေး ရပ်ဆိုင်းသွားသည်။ မြန်မာ အလုပ်သမား ၁ ထောင်ကျော်လည်း အလုပ်ရပ်နားထားရကြောင်း၊ နယ်စပ်ချစ်ကြည်ရေးတံတား အောက်ရှိ မြန်မာပိုင် ရေလယ်ကျွန်းလည်း ရေနစ်မြုပ်သွားပြီး ကုန်ပစ္စည်းရောင်းချသူ မြန်မာ ၂၀၀ ကျော် ရေဘေးလွတ်ရာသို့ ရွှေ့ပြောင်းနေရကြောင်း သိရသည်။

အပြည်ပြည်ဆိုင်ရာ ဒီမိုကရေစီနေ့ကို စက်တင်လ ၁၅ ရက်နေ့တွင် နေပြည်တော်၌ ကျင်းပမည်ဖြစ်ပြီး အစိုးရအဖွဲ့ဝင်များ၊ ပြည်တွင်းနှင့် ပြည်တွင်းအခြေစိုက် ပြည်ပသတင်းထောက်များအပြင် ပြည်ပအခြေစိုက် မီဒီယာတချို့ကိုလည်း ဖိတ်ကြားမည်ဟု အစိုးရသတင်းစာတွင် ဖော်ပြထားသည်။ ပထမဆုံးအကြိမ်အဖြစ် ပြည်သူ့လွှတ်တော် အဆောက်အုံတွင် ကျင်းပမည့် ယင်းအခမ်းအနားမှာ ဒီမိုကရေစီကျင့်စဉ်နှင့် အခွင့်အရေးများ ခိုင်မာစွာဖြစ်ထွန်းစေရန်ဟု ဆိုထားသည်။

အစိုးရထုတ် သတင်းစာတွင် ဖော်ပြခံရမှု နည်းပါးသည့်  ပြည်ထောင်စုအစိုးရ ၀န်ကြီးတချို့က ပုဂ္ဂလိက ဂျာနယ်များကို ချည်းကပ်ပြီး ၎င်းတို့၏ လှုပ်ရှားမှုများကို ရေးသားကြရန် တိုက်တွန်းနေကြောင်း ရန်ကုန်မှ သတင်းထောက်များက ပြောသည်။ သတင်းထောက်များကို မကြာခဏ ဖိတ်ကြားပြီး ၎င်းတို့၏ ဌာနအကြောင်း ရှင်းလင်းပွဲ လုပ်ဆောင်နေသည်ဟု ဆိုသည်။ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကလည်း ပါတီ၏ လှုပ်ရှားမှုများကို မန္တလေးအခြေစိုက် ဂျာနယ်တချို့တွင် အပတ်စဉ် ဖော်ပြနိုင်ရန် ငွေကြေးအကုန်အကျခံ လုပ်ဆောင်နေသည်ဟုလည်း သိရသည်။

ရှမ်းပြည် အရှေ့ပိုင်း ကျိုင်းတုံ အကျဉ်းထောင်တွင် ထောင်ဒဏ် ၆၅ နှစ် ၆ လ ကျခံနေရသော ၈၈ မျိုးဆက်ကျောင်းသား ခေါင်းဆောင် ကိုမင်းကိုနိုင်၏ နေအိမ်သို့ ဒေါ်အောင်ဆန်းစုကြည်သည် ယမန်နေ့ နေ့လည်က သွားရောက်၍ မိသားစုဝင်များကို အားပေးစကားပြောကြားခဲ့သည်။ ဒေါ်အောင်ဆန်းစုကြည်အနေဖြင့် ယခုကဲ့သို့ လာရောက် အားပေးစကား ပြောကြားခဲ့သည့်အတွက် မိသားစုဝင်များအနေဖြင့် ၀မ်းမြောက်အားတက်မိကြောင်း သိရသည်။ ကိုမင်းကိုနိုင်၏ ဖခင် ပန်းချီဆရာကြီး ဦးသက်ညွန့်က ၄င်းရေးဆွဲထားသည့် ပန်းချီကားတချို့ကို လက်ဆောင်အဖြစ် ဒေါ်အောင်ဆန်းစုကြည်အား ပေးခဲ့သည်။

မည်သည့်ကန့်ကွက်မှုများရှိစေ ဧရာဝတီမြစ်ဆုံ စီမံကိန်းကို ဆက်လက် အကောင်အထည်ဖော်မည်ပြီး မည်သည့်အခါမှ နောက်ဆုတ်မည်မဟုတ်ဟု အမှတ် (၁) လျှပ်စစ်ဝန်ကြီး ဦးဇော်မင်းက ပြောသည်။ စက်တင်ဘာလ ၁၀ ရက်နေ့က နေပြည်တော်တွင် ပြုလုပ်သော သတင်းစာရှင်းလင်းပွဲတခု၌ ဦးဇော်မင်းက ယင်းကဲ့သို့ ပြောခြင်းဖြစ်ကြောင်း Eleven Media Group ၏ ဝက်ဘ်ဆိုဒ်တွင် ဖော်ပြထားသည်။

သမ္မတ ဦးသိန်းစိန် အစိုးရအနေနှင့် သတင်းမီဒီယာ လွတ်လပ်ခွင့် အပါအ၀င် ဒီမိုကရေစီနှင့် လျှော်ညီပြီး ထင်သာမြင်သာရှိသည့် ပြုပြင်ပြောင်းလဲမှုများကို  ဆောင်ရွက်ခြင်းရှိ၊ မရှိ အမေရိကန်က စောင့်ကြည့်နေကြောင်း မြန်မာနိုင်ငံဆိုင်ရာ အမေရိကန် အထူးကိုယ်စားလှယ် မစ္စတာ ဒဲရက် မစ်ချယ်က ပြောသည်။ ယမန်နေ့က  နေပြည်တော်တွင် လွှတ်တော်ဥက္ကဋ္ဌများ၊ နိုင်ငံခြားရေးဝန်ကြီး ဦးဝဏ္ဏမောင်လွင် တို့နှင့် တွေ့ဆုံစဉ် ယင်းသို့ ပြောဆိုခြင်းဖြစ်သည်။ မစ္စတာ ဒဲရက် မစ်ချယ်သည် ယမန်နေ့က တောင်ဒဂုံရှိ HIV/AIDS ဂေဟာ၊ မြောက်ဒဂုံရှိ နာရေးကူညီမှုအသင်းတို့သို့ သွားရောက်လေ့လာသည်။

လူ့အခွင့်အရေးရှေ့နေ ကိုဖိုးဖြူသည် ယမန်နေ့ ညနေ ၆ နာရီ ၃၀ ခန့်က ဧရာဝတီတိုင်း ငွေဆောင်ကမ်းခြေတွင် ထိန်းသိမ်းခံရပြီး ယခု တောင်ဒဂုံ (ဆိပ်ကမ်း) မြို့နယ် ရဲစခန်းတွင် ရောက်ရှိနေသည်။ ယနေ့ နံနက်ပိုင်းတွင် ဧရာဝတီက တယ်လီဖုန်းဖြင့် ဆက်သွယ်မေးမြန်းရာ ကိုဖိုးဖြူက ရုံးချိန်းပျက်ကွက်မှုဖြင့် ၀ရမ်းထုတ်ခံထားရကြောင်း၊ ရဲစခန်းတွင် ကောင်းမွန်စွာ နေထိုင်ရကြောင်း၊ အာမခံဖြင့် ယနေ့ ပြန်လည် လွတ်မြောက်ဖွယ်ရှိကြောင်း ပြန်လည် ဖြေကြားသည်။ ကိုဖိုးဖြူသည် လယ်မြေအသိမ်းခံရသော လယ်သမားများ၊ အနိုင်ကျင့်ခံရသော အလုပ်သမားများ၏ အရေးကို အကျိုးဆောင်ပေးနေသူ ဖြစ်သည်။

ယနေ့ ကျရောက်သည့် ၇၂ နှစ်မြောက် ဆရာတော် ဦးဥတ္တမ နှစ်ပတ်လည်နေ့ နံနက်ပိုင်းတွင် ရခိုင်ပြည်နယ်၊ စစ်တွေမြို့မှ သံဃာ အပါး ၃၀၀ ၀န်းကျင်က မေတ္တာသုတ်ရွတ်ဆို စီတန်း ကြွချီပြီး ဆရာတော် ဦးဥတ္တမရုပ်ထုအား ဂါရ၀ပြုကြကြောင်း သိရသည်။ အာဏာပိုင်တို့က လုံခြုံရေး ထူထပ်စွာချထားသော်လည်း သံဃာတော်များကို ဟန့်တားမှု မရှိဟု နိရဉ္စရာသတင်းဌာန အင်တာနက်စာမျက်နှာတွင် ဖော်ပြထားသည်။ ဆရာတော် ဦးဥတ္တမ နှစ်ပတ်လည်နေ့ကို ယခင်နှစ်များနှင့်မတူဘဲ ရခိုင်ပြည်နယ်အနှံ့အပြား နှင့် ရန်ကုန်မြို့တို့တွင် လွတ်လပ်စွာ ကျင်းပနိုင်ကြသည်ဟု ဆိုသည်။