အစိုးရနှင့် ပတ်သက်၍ ဒေါ်အောင်ဆန်းစုကြည်က လူနည်းစုဖြစ်သော အုပ်ချုပ်သူများကို ပြည်သူက ထိန်းသိမ်းနိုင်ရမည်ဟု ပြောသွားသည်။ သူအကျယ်ချုပ်ကျနေစဉ် လုံခြုံရေး ဝန်ထမ်းများက ကောင်းမွန်စွာ ဆက်ဆံသလို ပြည်သူကို ကောင်းမွန်စွာ ဆက်ဆံစေလိုကြောင်း၊ သို့သော် သူ့ကဲ့သို့ ပြည်သူကို အကျယ်ချုပ် မကျစေလိုကြောင်း ပြောသွားသည်။

နိုင်ငံရေးဆိုသည်နှင့် ပတ်သက်၍ ဒေါ်အောင်ဆန်းစုကြည်က ဟောပြောသည့်နေရာတွင် လာထောက်ခံမှသာ နိုင်ငံရေးမဟုတ်ကြောင်း၊ အိမ်မှ ထမင်းချက်ပေးခြင်းသည်လည်း နိုင်ငံရေး၊ သားသမီး ကျောင်းပို့ခြင်းသည်လည်း နိုင်ငံရေး ဖြစ်ကြောင်း၊ နိုင်ငံရေးတွင် မပါချင်ဟု ပြောသူများသည် နိုင်ငံရေးကို နားမလည်၍သာ ဖြစ်ကြောင်း ပြောသည်။

ဒေါ်အောင်ဆန်းစုကြည်က ပြည်သူလူထု၏ မျှော်လင့်ချက်နှင့် ပတ်သက်၍ ပြည်သူလူထုက မျှော်လင့်ချက်နှင့် အားပေးနေသည်ကို သိကြောင်း၊ ပြည်သူလူထု စိတ်ထဲတွင်ရှိသည့် ဆန္ဒကို ထုတ်ဖော်ပြောစေလိုကြောင်း၊ တာဝန်ကို မကြောက်၊ တာဝန်မကျေမှာကိုသာ ကြောက်ကြောင်း၊ သူတဦးတယောက်တည်း မဟုတ်ဘဲ ပြည်သူလူထုနှင့် လက်တွဲ၍ လုပ်ဆောင်ဖြစ်ကြောင်း ပြောသည်။

ယမန်နေ့ညက ပြန်လည်လွတ်မြောက်လာပြီးနောက် NLD ဗဟို အလုပ်အမှုဆောင် အစည်းအဝေးတွင် ဒေါ်အောင်ဆန်းစုကြည် က ပထမဆုံး လူထု အသံကို နားထောင်ပြီး လူထုကွန်ရက်တခုဖြစ်ရန် ဖွဲ့စည်းမည်ဖြစ်ကြောင်း၊ တိုင်းရင်းသား အရေးနှင့် ပတ်သက်၍ ဒုတိယ ပင်လုံညီလာခံ ပုံစံမျိုး ညီလာခံတခုဖြစ်လာစေရန် ကြိုးစားမည်ဖြစ်ကြောင်း၊ တပ်မတော် ခေါင်းဆောင်များနှင့် လည်း ဆွေးနွေး သွားမည်ဖြစ်ကြောင်း၊ ပြီးခဲ့သည့် ရွေးကောက်ပွဲကာလ မဲလိမ်၊ မဲခိုး၊ မဲ မသမာမှု များကိုလည်း ဖော်ထုတ်သွားမည်ဟု ပြောဆိုကြောင်း သတင်းရသည်။

၂၀၀၃ ခုနှစ်က ဖြစ်ပွားခဲ့သည့် ဒီပဲယင်း လူသတ်ပွဲကြောင့် ယခုအခါ ဒေါ်အောင်ဆန်းစုကြည်၏ လုံခြုံရေးကို ပိုမိုပြီး အထူး သတိ ထား ရမည်ဖြစ်ကြောင်း NLD ခေါင်းဆောင် တဦးဖြစ်သူ ဦးဝင်းတင်က ဧရာဝတီကို ပြောသည်။

ဒေါ်အောင်ဆန်းစုကြည်ကို တွေ့ဆုံရန်လာသည့် လူအုပ်ကြီးနှင့် ကားများမှာ အလွန်များပြားပြီး အုတ်လမ်း၊ လင့်ခ်လမ်းထိပ်အထိ ရောက်ရှိနေကြောင်း၊ လူများသည် ပူပြင်းသည့် နေရောင်အောက် လမ်းမပေါ်တွင် ထီးမဆောင်းဘဲ ငြိမ်သက်စွာ စောင့်ဆိုင်းနေကြောင်း သတင်းရသည်။

ဒေါ်အောင်ဆန်းစုကြည် NLD ရုံးချုပ်သို့ ရောက်ရှိလာပြီး လူထုကြီးက “ဒေါ်အောင်ဆန်းစုကြည် ကျန်းမာပါစေ” ဟု ကြွေးကြော်၍ လက်ခုပ်တီး  ကြိုဆိုကြသည်။ လူထုကြီးမှာ များပြားသည့် အတွက် ရွှေဂုံတိုင် လမ်းမကြီးတလျောက် ကားအသွားအလာ ရပ်ဆိုင်းထားရပြီး NLD အဖွဲ့ဝင်များက လူထုကို နောက်သို့ဆုတ်ပေးရန် မေတ္တာရပ်ခံနေသည်။

ဒေါ်အောင်ဆန်းစုကြည် ပြောကြားမည့် မိန့်ခွန်းကို နားထောင်ရန်အတွက် NLDရုံးချုပ်ရှေ့တွင် လူ တထောင် ခန့် လာရောက် စုဝေးနေပြီး “ We Love Su” ဆိုသည့် စာတန်းများကို ကိုင်ဆောင်၍ ကြိုဆိုနေကြကြောင်း၊ ပူပြင်းသည့် နေရောင်အောက်တွင် မြို့နယ်အသီးသီးမှ ထောက်ခံသူများက မိသားစုလိုက်၊ အုပ်စုလိုက် ရောက်ရှိနေပြီဖြစ်ကြောင်း သတင်းရသည်။

ဒေါ်အောင်ဆန်းစုကြည် သည် ယနေ့ နံနက် ၁၁ နာရီ ခန့်၌ နိုင်ငံတကာ သံတမန်များနှင့် တွေ့ဆုံမည်ဖြစ်ပြီး ၁၂ နာရီတွင် NLD ရုံး ချုပ် ၌ လူထုကို ပထမဆုံး မိန့်ခွန်း စပြောမည်ဖြစ်သည်။ ထို့နောက် ပြည်တွင်းပြည်ပ သတင်းစာဆရာများနှင့် သတင်းစာ ရှင်းလင်း ပွဲ လုပ် မည်ဟု သတင်းရသည်။ထို့အပြင် ရွေးကောက်ပွဲတွင် ရှုံးနိမ့်ခဲ့သည့် NDFပါတီအပါအ၀င် တခြားပါတီများ တသီးပုဂ္ဂလ လွှတ်တော် ကိုယ်စားလှယ်လောင်းများနှင့် တွေ့ဆုံမည်ဖြစ်သည်။ ယခုအခါ NLD ရုံးချုပ်ရှေ့တွင် လူထု စတင်ရောက်ရှိ နေပြီဟု သိရသည်။ ရန်ကုန်မြို့ ဆင်ခြေဖုန်း ရပ်ကွက်များရှိ ပြည်သူများကလည်း ကားစင်းလုံးဖြင့် လာရောက်ကြကြောင်း သိရသည်။

အမေရိကန် သမ္မတ အိုဘားမားက ဒေါ်အောင်ဆန်းစုကြည် လွတ်မြောက်လာတာကို ကြိုဆိုပါတယ်လို့ ထုတ်ဖော် ပြောဆိုလိုက်ပါတယ်။ သမ္မတ အိုဘားမားက ဒေါ်အောင်ဆန်းစုကြည်ကို “ကျနော့်ရဲ့ သူရဲကောင်း” လို့ သုံးနှုန်းသွားပါတယ်။ ဗြိတိန် ဝန်ကြီးချုပ်က “လွတ်သင့်တာ ကြာပြီ” လို့ ပြောဆိုပြီး အာဆီယံ အထွေထွေ အတွင်းရေးမှူးကတော့ “စိတ်သက်သာရာ ရပါပြီ” လို့ ဆိုပါတယ်။