မြန်မာပြည် အရှေ့ပိုင်းဒေသတွင် အရပ်သားများ၏ လုံခြုံရေးကို ခြိမ်းခြောက်မှု ပိုမို တိုးပွားလျက်ရှိသည်ဟု ထိုင်း - မြန်မာနယ်စပ် တလျှောက် ကူညီ စောင့်ရှောက်ရေး ညွန့်ပေါင်းအသင်း (TBBC) က ဆိုသည်။
“အကြမ်းဖက်တာတွေ၊ မဟုတ်မတရား လုပ်တာတွေက မြန်မာပြည် အရှေ့ဘက် ဒေသတွေမှာ ပိုများလာနေတာ တွေ့ရပါတယ်” ဟု TBBC ညွှန်ကြားရေးမှူးချုပ် မစ္စတာ ဂျက်ဒန်းဖို့ဒ်က ပြောသည်။
ထိုင်းနိုင်ငံသို့ မကြာသေးခင်က ဒုက္ခသည်များ ထပ်မံရောက်ရှိလမှုများ၊ မြန်မာနိုင်ငံအတွင်း တိမ်းရှောင် ပုန်းအောင်းနေရသည့် အရပ်သားများထံမှ လာသည့် အစီရင်ခံစာများကို ကိုးကားပြီး ထိုသို့ ပြောဆိုရခြင်း ဖြစ်သည်ဟု သူက ဆိုသည်။
မြန်မာနိုင်ငံအတွင်း ဖြစ်ပွားနေသော တိုက်ခိုက်မှုများမှာ နှစ်ပေါင်းများစွာ ကြာမြင့်လာသော်လည်း ငြိမ်းချမ်းမှု မရနိုင်သေးဘဲ လာမည့် ၁၂ လအတွင်း အခြေအနေဆိုးများ ထပ်မံ ပေါ်ပေါက်လာဖွယ်ရှိသည်ဟု မစ္စတာ ဂျက်ဒန်းဖို့ဒ်က ခန့်မှန်း ပြောကြားလိုက်သည်။
နိုင်ငံပေါင်း ၁၀ ခုမှ ကူညီကယ်ဆယ်ရေး အဖွဲ့ ၁၂ ဖွဲ့ဖြင့် စုစည်းထားသော TBBC ညွှန့်ပေါင်းအဖွဲ့သည် မြန်မာပြည်တွင်း စစ်ပွဲများကြောင့် နေရပ်စွန့်ခွာ ထွက်ပြေးနေရသူများကို ၂၅ နှစ်ကြာ ကူညီလျက်ရှိသည်။
TBBC က ထောက်ပြသည့် မြန်မာပြည် အရှေ့ပိုင်းဒေသ အရပ်သားများ၏ လုံခြုံရေး ခြိမ်းခြောက်ခံနေရမှု၏ အဓိက အကြောင်းရင်းမှာ မြန်မာ့တပ်မတော်၏ စစ်ပုံသွင်းခြင်း (militarisation) ကြောင့် ဖြစ်သည်ဟု ဆိုသည်။
စစ်ကြောင်း လှည့်လည်ခြင်း၊ မြေမြှုပ်မိုင်းသုံးခြင်း၊ လုပ်အားပေး ခိုင်းစေခြင်း၊ ခရီးသွားလာမှု ကန့်သတ်ခြင်းများမှာ အရပ်သားများ အပေါ် သိသာ ထင်ရှားသည့် ခြိမ်းခြောက်မှုများ ဖြစ်ကြောင်း TBBC က သုံးသပ်လိုက်သည်။ ပြီးခဲ့သည့် ၅ နှစ်အတွင်း ခြိမ်းခြောက်မှုများ ပိုမို တိုးပွားလာသည်ဟု ဆိုသည်။
မြန်မာပြည်မှ ထွက်ပြေးလာသည့် ဒုက္ခသည်များကို ထိုင်းနိုင်ငံက လက်ခံပြီး ဒုက္ခသည်စခန်းများတွင် စောင့်ရှောက်ထားသည်။ ဒုက္ခသည် အရေအတွက်မှာ ပြီးခဲ့သည့်လအတွင်း TBBC က ထုတ်ပြန်သည့် စာရင်းများအရ တသိန်း သုံးသောင်းကျော် ရှိနေသည်။
၂၀၁၀ ရွေးကောက်ပွဲ မတိုင်မီ မြန်မာပြည် ပဋိပက္ခဒေသမှ ဒုက္ခသည်များ ထပ်မံ ထွက်ပြေးလာနိုင်သဖြင့် ထိုင်းနိုင်ငံ အမျိုးသား လုံခြုံရေးကောင်စီက ပြင်ဆင်မှုများ ပြုလုပ်နေခြင်းကိုလည်း TBBC က ထောက်ပြထားသည်။
ထိုင်းနိုင်ငံအခြေစိုက် TBBC ၏ သတင်းထုတ်ပြန်ချက်တွင် ဇွန်လအတွင်း ထိုင်းသို့ ရောက်လာသည့် ကရင် ဒုက္ခသည် ၄၀၀၀ ကျော်၊ ကိုးကန့်ဒေသမှ ထွက်ပြေးရသည့် ဒုက္ခသည် ၃၇ ၀၀၀ တို့အကြောင်းကိုလည်း ထည့်သွင်းထားသည်။
မြန်မာအစိုးရကမူ နေရပ်ရင်း စွန့်ခွာထွက်ပြေးရသည့် ဒုက္ခသည်များနှင့် ပတ်သက်ပြီး တရားဝင် ရှင်းလင်းပြောဆိုလေ့ မရှိပေ။
သို့သော်လည်း ကိုးကန့်ဒေသ ဒုက္ခသည်များနှင့် ပတ်သက်ပြီး ထုတ်ပြန်ချက်များ တခါတရံ ထွက်ပေါ်လာသည်။
အစိုးရသတင်းစာတွင် ပြီးခဲ့သည့်လ ၅ ရက်နေ့က ဖော်ပြထားချက်အရ ကိုးကန့်ဒေသမှ ထွက်ပြေးသွားသူများအနက်မှ နေရပ်ရင်း ပြန်လာသူ ၁၂၀၀၀ ကျော် ရှိသည်ဟု သိရသည်။
ဤအတောအတွင်း မြန်မာစစ်အစိုးရက အပစ်အခတ် ရပ်ပြီး ငြိမ်းချမ်းရေး ယူထားသည့် လက်နက်ကိုင် အဖွဲ့များကို မြန်မာ့တပ်မတော်နှင့် ပူးပေါင်း၍ နယ်ခြားစောင့်တပ်များအဖြစ် အသွင် ပြောင်းရန် လျှို့ဝှက် စည်းရုံးနေသည်။
အပစ်အခတ် ရပ်စဲခြင်း မပြုရသေးသည့် လက်နက်ကိုင် အဖွဲ့ တချို့နှင့် ငြိမ်းချမ်းရေး ယူရန် စေ့စပ် ဆွေးနွေးနေခြင်း မရှိကြောင်း သိရသည်။
< Prev | Next > |
---|