ဗကသ အဖွဲ့ဝင် တဦးဖြစ်သော ကိုဒီငြိမ်းလင်းကို ပုဒ်မ ၁၄၃ ၊ ၁၄၇ ၊ ၅၀၅ (ခ) ၊ ၂၉၅ (က) တို့ နှင့် ထောင် ၆ နှစ်ခွဲ ချမှတ် လိုက်သည်ဟု ၎င်း၏ မိသားစုဝင် တဦးက ပြောဆိုသည်။
တခြားသော နိုင်ငံရေးလှုပ်ရှားသူ ကိုကျော်စွာကို ၅ နှစ် တမှု၊ ၆ နှစ် တမှုဖြင့် ပေါင်း ၁၁ နှစ် ထောင်ဒဏ်ချမှတ် လိုက်ပြီး ကိုကျော်ဆန်းကို ထောင်ဒဏ် ၄ နှစ် ချမှတ်လိုက်ကြောင်းလည်း သိရသည်။
ကိုဒီငြိမ်းလင်း၏ ဖခင်ဖြစ်သူ ကိုဇော်ဇော်မင်းကိုလည်း စစ်အာဏာပိုင်များက ပြီးခဲ့သည့် အပတ်အတွင်းတွင် ထင်ရှားသည့် ၈၈ မျိုးဆက်ကျောင်းသားခေါင်းဆောင်များဖြစ်သော ကိုမင်းကိုနိုင်၊ ကိုကိုကြီး တို့နှင့်အတူ ထောင်ဒဏ် ၆၅ နှစ် ချမှတ်လိုက်သည်။
ကိုဒီငြိမ်းလင်း၏ အဘိုးတော်စပ်သူ အန်အယ်လ်ဒီ လွှတ်တော်အမတ်နှင့် သတင်းစာသမား ဟောင်းဖြစ်သည့် ဦးစောဝင်းကိုလည်း စစ်အစိုးရက ၁၉၉၁ ခုနှစ် တွင် ထောင် ၁၀ နှစ် ချမှတ်ခဲ့သည်။ ယင်း ဦးစောဝင်းသည် ၇ နှစ် ကြာပြီးနောက် ထောင်တွင်း၌ပင် ကျန်းမာရေး ဆိုးဝါးပြီး သေဆုံးခဲ့ကြောင်း သိရသည်။
စစ်အစိုးရက ယခုလဆန်းပိုင်းမှ စတင်၍ နိုင်ငံရေးအမှုလိုက် ရှေ့နေ ၃ ဦး အပါအ၀င် ထင်ရှားသည့် ကျောင်းသား ခေါင်းဆောင်များ၊ သံဃာတော်များနှင့် နိုင်ငံရေးလှုပ်ရှားသူ ၈၀ ကျော်ကို အနည်းဆုံး ထောင်ဒဏ် ၄ လ မှ ၆၅ နှစ် ခွဲ အထိ အသီးသီး ချမှတ်ခဲ့သည်။
| < Prev | Next > |
|---|