မကွေးတိုင်း မြို့သစ်မြို့နယ်ရှိ တပ်မတော်ကာကွယ်ရေး ပစ္စည်းများထုတ်လုပ်သော ကပစ အမှတ် ၁၇ တပ်ရင်းမှ ဗိုလ်ကြီးကိုကိုဦးနှင့် ဗိုလ်ကြီးအောင်ကျော်လင်းတို့သည် ၎င်းတို့၏တပ်နှင့် အနီးတ၀ိုက်ရှိ ကျေးရွာများမှ ပြည်သူများအား ကြံ့ဖွံ့ပါတီ ကိုသာ မဲပေးကြရန်နှင့် ကြံ့ဖွံ့ကို မဲမထည့်ပါက ကျေးရွာများကို ပြောင်းရွှေ့ခြင်း၊ ရွာမှ နှင်ထုတ်ခြင်းများ ပြုလုပ်မည်ဟု ခြိမ်းခြောက်နေကြောင်း သတင်းရရှိသည်။ အဆိုပါ စစ်ဗိုလ် ၂ ဦးက မြို့သစ်မြို့နယ်အတွင်းရှိ ရပ်မိရပ်ဘများကို ခေါ်ယူကာ ကြံ့ဖွံ့ကို ရွာသားများ မဲထည့်ရန် စည်းရုံးခိုင်းကြောင်း၊ မည်သည့်အစိုးရ အုပ်ချုပ်သည် ဖြစ်စေ စစ်တပ်သည် အမြဲအာဏာ ရှိနေမည် ဖြစ်၍ စစ်တပ်၏ ပြောဆိုမှုကို လိုက်နာရန်လိုအပ်သည်ဟု ပြောကြောင်း၊ ထို့အပြင် ဒေသဆိုင်ရာအာဏာပိုင်များကလည်း မြို့သစ်မြို့နယ်အတွင်းရှိ ၀န်ထမ်းများနှင့် တခြားသော ကျေးရွာများတွင် ကြိုတင်မဲကောက်ခံမှုကို ဆက်တိုက် လုပ်ဆောင် နေကြောင်း ဒေသခံများက ပြောသည်။