“ပြည်တွင်း၊ ပြည်ပမှာရှိတဲ့ လူငယ်တွေက ၀က်ဘ်ဆိုက် လည်ပတ်နိုင်ရေးအတွက် ဆောင်ရွက်ပေးကြတာပါ။ ဒါနဲ့ ပတ်သက်လို့ အမှာစကားလေးတွေ ပြောပေးပါဆိုလို့ ဒေါ်အောင်ဆန်းစုကြည်နဲ့ ကျနော်တို့က ရေးပေးလိုက်ကြပါတယ်” ဟု NLD ဒုတိယ ဥက္ကဌ ဦးတင်ဦးက ပြောသည်။NLD ပါတီ ၀က်ဘ်ဆိုက်ကို အင်္ဂလိပ်၊ မြန်မာ နှစ်ဘာသာဖြင့် ရေးသားထားပြီး ဦးတင်ဦးနှင့်ဒေါ်အောင်ဆန်းစုကြည်တို့၏ နှုတ်ခွန်းဆက် စကားများကိုလည်း ဖော်ပြထားသည်။
ပါတီ၏ မူဝါဒများ၊ လှုပ်ရှားမှုများကို ဖော်ပြပေးနိုင်မည့် အင်တာနက်စာမျက်နှာ ပေါ်ပေါက်လာခြင်းကို ကျေနပ်မိကြောင်း၊ မြန်မာနိုင်ငံ ဒီမိုကရေစီ ရရှိရေးအတွက် ပြည်တွင်း၊ ပြည်ပ ပြည်သူ့ကွန်ယက်ကြီး ဖွဲ့ရန် ဆက်သွယ်ရေး လမ်းကြောင်း ကောင်းမွန် ကျယ်ပြန့်ခြင်းသည် အဓိကကျကြောင်း ဒေါ်အောင်ဆန်းစုကြည်က ၎င်း ဝက်ဘ်ဆိုက်တွင် ရေးသားထားသည်။
ဒေါ်အောင်ဆန်းစုကြည်၏ နေအိမ်တွင် အင်တာနက် တပ်ဆင်ရန် ဇန်န၀ါရီ ၂၀ ရက်နေ့က စစ်အစိုးရပိုင် ရတနာပုံ တယ်လီပို့ ကုမ္ပဏီက ခွင့်ပြုခဲ့သည်။
NLD ပါတီအနေဖြင့် စာရွက်စာတမ်း ရိုက်ကူး ထုတ်ဝေမှု ဆောင်ရွက်ရာတွင်ပင် အခက်အခဲရှိနေကြောင်း၊ ယခု အင်တာနက် စာမျက်နှာတွင် ပါတီ၏ မူဝါဒနှင့် လှုပ်ရှားမှုများကို ဖော်ပြသွားမည်ဖြစ်သော်လည်း NLD က တိုက်ရိုက်ကိုင်တွယ် ဆောင်ရွက်ခြင်း မဟုတ်ဘဲ ပြည်တွင်းပြည်ပမှ လူငယ်များက ကူညီ ဆောင်ရွက်ပေးနေခြင်းဖြစ်ကြောင်း ပါတီပြောခွင့်ရ ဦးအုန်းကြိုင်က ပြောသည်။
NLD အင်တာနက်စာမျက်နှာတွင် ပါတီအလံကို ဖော်ပြထားပြီး အနီရောင် ခေါင်းစီးပါရှိသည်။ ပါတီ၏ လှုပ်ရှားဆောင်ရွက်မှု သတင်းများကို ဖော်ပြထားသည့် www.nldburma.org/ ကို ယခု စတင် ၀င်ရောက် ကြည့်ရှုနိုင်ပြီ ဖြစ်သည်။
၁၉၉၀ ရွေးကောက်ပွဲအနိုင်ရ NLD ပါတီသည် နအဖ စစ်အစိုးရ ကျင်းပသော ရွေးကောက်ပွဲအတွက် ပါတီထပ်မံ မှတ်ပုံတင်ခြင်း မပြုသောကြောင့် ၂၀၁၀ ရွေးကောက်ပွဲ ကော်မရှင်က NLD ပါတီကို တရားဝင် ရပ်တည်ခွင့်မရှိကြောင်း ကြေညာခဲ့သည်။
ထိုကဲ့သို့ ကြေညာခဲ့သည့်အပေါ် ဒေါ်အောင်ဆန်းစုကြည်က ပြန်လည် တရားရင်ဆိုင်ခဲ့ပြီး ပါတီရပ်တည်ခွင့်အတွက် တရား ရုံးချုပ်သို့ လျှောက်ထားခဲ့သော်လည်း နေပြည်တော် တရားရုံးချုပ်က အထူးအယူခံကို ဇန်န၀ါရီ ၂၈ ရက်တွင် အပြီးသတ် ပယ်ချခဲ့သည်။
မြန်မာနိုင်ငံတွင် ၂၀၀၅ ခုနှစ်မှ စတင်ကာ အင်တာနက်အသုံးပြုမှု ကျယ်ပြန့်လာခဲ့ပြီး ၂၀၁၀ ရွေးကောက်ပွဲဝင် ပါတီတချို့သည် ဘလော့ဂ်နှင့် ၀က်ဘ်ဆိုက်များ ထူထောင်ကာ ပါတီမူဝါဒနှင့် လှုပ်ရှားမှုများကို ဖော်ပြခဲ့ကြသည်။
၁၉၉၀ ရွေးကောက်ပွဲအနိုင်ရ NLD ပါတီ၏ ၀က်ဘ်ဆိုက်သည် ပါတီရပ်တည်ခွင့် အထူးအယူခံပယ်ချခံရပြီး ၂ ရက်အကြာတွင် ပေါ်ပေါက်လာခြင်းဖြစ်သည်။
| < Prev | Next > |
|---|
