အာဏာပိုင်တို့က စာနယ်ဇင်းသမားများ အထူးသဖြင့် ပြည်ပရောက် သတင်းအဖွဲ့တို့အတွက် လျှို့ဝှက် လုပ်ကိုင်သူများကို စနစ်တကျ ပိတ်ဆို့၊ နှောင့်ယှက်၊ အကျဉ်းချနေဆဲဖြစ်ကြောင်း နယူးယောက်အခြေစိုက် Committee to Protect Journalists (CPJ) အဖွဲ့က ထုတ်ပြန်သည့် အစီရင်ခံစာတွင် ရေးထားသည်။"အနည်းဆုံး စာနယ်ဇင်းသမား ၁၄ ဦး ထိန်းသိမ်းခံနေရပြီး သတင်းလွတ်လပ်ခွင့်ဆိုင်ရာ ဖြစ်ထွန်းမှုများအတွက် အစိုးရက လုပ်ဆောင်ခြင်းမရှိကြောင်း တွေ့ရသည်" ဟု CPJ အစီရင်ခံစာက ဆိုသည်။
CPJ နည်းတူ ယနေ့ ပေါ်ထွက်လာသော ပြင်သစ်အခြေစိုက် နယ်စည်းမခြား သတင်းထောက်များအဖွဲ့၏ သတင်းထုတ်ပြန်ချက်တစောင်ကလည်း မြန်မာအစိုးရကို ထောက်ပြဝေဖန်ထားသည်။
အစိုးရက ဖမ်းထားသည့် စာနယ်ဇင်းဆရာတို့ကို အမြန်ဆုံး လွှတ်ပေးရန်လည်း ထိုအဖွဲ့၂ခုက တောင်းဆိုလိုက်သည်။
စာနယ်ဇင်းသမားတို့အား ထောင်ဒဏ်နှစ်ရှည် ချမှတ်ရာတွင် အသုံးပြုနေသည့် အီလက်ထရွန်နစ်ဥပဒေ၊ မတရားအသင်းဆိုင်ရာ ဥပဒေ၊ လူဝင်မှုကြီးကြပ်ရေးဆိုင်ရာ ဥပဒေတို့ကို ဖျက်သိမ်းရန် CPJ အစီရင်ခံစာတွင် တောင်းဆိုထားသည်။
သတင်းသမားတို့ကို နိုင်ငံ၏ရန်သူအဖြစ် သတ်မှတ်ထားခြင်းကို ရပ်ဆိုင်းပြီး နိုင်ငံတကာမှ သတင်းသမားတို့ကို ပြည်ဝင်ခွင့်ပြုရန်လည်း တောင်းဆိုချက်တွင် တွေ့ရသည်။
ဦးသိန်းစိန်အစိုးရကို ဝေဖန်ထောက်ပြမှု အများအပြား ပါဝင်သကဲ့သို့ ဖြစ်ထွန်းတိုးတက်မှုတခုကိုလည်း ချီးကျူးထားသည်။
ယခင်က မြန်မာပြည်တွင် ပိတ်ပင်ထားသော ပြည်ပ သတင်းဌာန ၀က်ဆိုက်များ အပါအ၀င် အင်တာနက်စာမျက်နှာ အများအပြားကို မကြာသေးခင်က ပြန်လည် ဖွင့်ပေးလိုက်ခြင်းကို ကြိုဆိုကြောင်း နယ်စည်းမခြား သတင်းထောက်များအဖွဲ့၏ သတင်းထုတ်ပြန်ချက်က ဆိုသည်။
ရန်ကုန်မြို့မှ ထင်ရှားသည့် သတင်းစာဆရာ မောင်ဝံသက မြန်မာစာနယ်ဇင်းများတွင် လတ်တလော ဖော်ပြနေခြင်းများကို ကြည့်လျှင် တိုးတက်မှုများ ရှိနေပြီဟု ဆိုသည်။ သူက ဒေါ်အောင်ဆန်းစုကြည်၏ လှုပ်ရှားမှုဆိုင်ရာ သတင်းများ ဖော်ပြခွင့်ရနေခြင်းကဲ့သို့သော သိသာထင်ရှားသည့် အပြောင်းအလဲကို ထောက်ပြပြောဆိုခြင်း ဖြစ်သည်။
"အာဏာပိုင်တွေရဲ့ သုံးတဲ့ အသုံးအနှုန်းအရ ဆိုရင်တော့ တဖြည်းဖြည်း ဖြေလျော့ပေးတယ်လို့ ပြောနိုင်တယ်" ဟု မောင်ဝံသက ဧရာဝတီကို ပြောသည်။
သို့သော်လည်း သတင်းသမားတို့အတွက် အာဏာပိုင်တို့၏ စိစစ်ကန့်သတ်မှုများက အဟန့်အတား ဖြစ်နေသည်ဟု ဆိုသည်။
"ဒီမိုကရေစီနိုင်ငံတော် တည်ဆောက်မယ် ဆိုရင် စာပေစိစစ်ရေးဟာ လုံးဝ မလိုအပ်တော့ဘူး၊ ဖျက်သိမ်းရမယ်" ဟု မောင်ဝံသက ပြောသည်။
| < Prev | Next > |
|---|
