မြစ်ဆုံစီမံကိန်း ရပ်ဆိုင်းထားရန် မြန်မာ သမ္မတ ဦးသိန်းစိန်က ကြေညာခဲ့ခြင်းသည် တရုတ် - မြန်မာဆက်ဆံရေးနှင့် မြန်မာ-နိုင်ငံတကာ ဆက်ဆံရေးတို့အကြား ချိန်ခွင်လျှာညှိလိုသည့် သဘော သက်ရောက်သွားပါက တရုတ်-မြန်မာ ဆက်ဆံရေးကို ထိခိုက် သွားမည် ဟု ICG ၏ အရှေ့တောင်အာရှ ဆိုင်ရာ ညွန်ကြားရေးမှူး Mr Jim.Della-Giacoma က ဧရာဝတီကို ပြော သည်။
မြန်မာနိုင်ငံနှင့် တရုတ်နိုင်ငံတို့၏ မဟာဗျူဟာမြောက် ဆက်ဆံရေးသည် ကာလအတန်ကြာရှိခဲ့ကြောင်း၊ ယခုအခါ အပြောင်းအလဲ ပြုလုပ်လိုသော သမ္မတ ဦးသိန်းစိန်၏ အစိုးရ လက်ထက်တွင် နိုင်ငံတကာနှင့် မြန်မာ-တရုတ်တို့၏ ဆက်ဆံရေးအပေါ် ထိန်းညှိလာမည်ဆိုပါက တရုတ်-မြန်မာ နှစ်နိုင်ငံ ဆက်ဆံရေးကို အနည်းငယ် ထိခိုက်လာမည်ဟု ၎င်းက သုံးသပ်သည်။“တရုတ်နဲ့နိုင်ငံတကာကို ချိန်ခွင်လျှာ ညှိမယ်ဆိုရင်တော့ တရုတ်ကို ဒေါပွစေမှာပဲ။ ဒါပေမယ့် နိုင်ငံတကာ ဆက်ဆံရေး မှာတော့ ကောင်းမွန်စေမှာပါ” ဟု ICG ဒါရိုက်တာ ကဆိုသည်။
သို့သော် တရုတ်နိုင်ငံအစိုးရ အနေဖြင့် မြစ်ဆုံကိစ္စတခုတည်း အတွက် ကြီးမားစွာထိခိုင်နိုင်မည့် ဆက်ဆံရေးကို လိုလားမည် မဟုတ်ကြောင်း၊ မြန်မာနိုင်ငံ၌ တရုတ်အကျိုးစီးပွားအတွက် ရင်းနှီးမြှုပ်နှံထားသည့် တခြားသော စီမံကိန်း အများအပြားရှိသေး ကြောင်းလည်း Mr. Jim.Della-Giacoma က ရှင်းပြသည်။
မြစ်ဆုံစီမံကိန်း ရပ်တန့်ရေးအတွက် ပြည်တွင်း၊ ပြည်ပရောက် မြန်မာနိုင်ငံသား အလွှာအသီးသီး၏ ကန့်ကွက်တောင်းဆိုမှုများ ကျယ်လောင်စွာ ထွက်ပေါ်လာခြင်းကြောင့် သမ္မတ ဦးသိန်းစိန်သည် စက်တင်ဘာလ ၃၀ ရက်နေ့တွင်ကျင်းပခဲ့သော လွှတ်တော် အစည်းအဝေးများမှ တဆင့်နိုင်ငံသို့ ၎င်းစီမံကိန်း ဆိုင်းငံ့မည်ဟု ကြေညာခဲ့သည်။
စီမံကိန်းအား မိမိတို့အစိုးရလက်ထက်၌ ဆိုင်းငံ့ထားမည်ဟု ဦးသိန်းစိန်က ကြေညာပြီး နောက်နေ့တွင် တရုတ်နိုင် ငံခြားရေး ဌာနက စီမံကိန်း၌ ပါဝင်နေသည့် ၎င်းတို့တရုတ်ကုမ္ပဏီများ၏ အကျိုးစီးပွားကို ထည့်သွင်းစဉ်းစားပြီး ပြန်လည် သုံးသပ် သင့် သည်ဟု ချက်ချင်း တုန့်ပြန်ခဲ့သည်။
တရတ်နိုင်ငံခြားရေးဌာန၏ ထုတ်ပြန်ချက်၌ ထိုစီမံကိန်းအား နှစ်နိုင်ငံဆွေးနွေးညှိနှိုင်း ပြီးမှလုပ်ဆောင်ခဲ့ကြောင်း၊ လိုအပ်သော သိပ္ပံဆိုင်ရာ အချက်အလက်များကို စနစ်တကျ ဆောင်ရွက်ပြီး စီမံကိန်းကို အကောင်အတည်ဖော်ခဲ့ကြောင်း ပြောသည်။
မြစ်ဆုံစီမံကိန်းအတွက်၂၀၀၆ ခုနှစ်တွင် သဘောတူစာချုပ် ချုပ်ဆိုခဲ့ပြီး ၂၀၀၉ ခုနှစ်တွင် ဆောက်လုပ်ရေး လုပ်ငန်းများအား တရုတ်အစိုးရပိုင် China Power Investment (CPI) ကုမ္ပဏီက ဦးဆောင်၍ စတင် တည်ဆောက် ခဲ့သည်။
မြစ်ဆုံစီမံကိန်းကို ဒေါ်လာ ၃ ဒဿမ ၆ ဘီလီယံ အကုန်အကျခံ တည်ဆောက်ရန် စီစဉ်ခဲ့ပြီး မေခ၊ မလိခမြစ်များပေါ်ရှိ ရေကာစီမံကိန်းများအတွက် တရုတ်နိုင်ငံက ဒေါ်လာ ဘီလီယံ ၂၀ အထိ ရင်းနှီးမြှုပ်နှံထားသည်။
သမ္မတဦးသိန်းစိန်၏ မြစ်ဆုံစီမံကိန်း ရပ်တန့်ထားရေ့း ဆုံးဖြတ်ချက်ကို အံ့သြတုန်လှုပ်မိသည်ဟု စီမံကိန်းတွင် အများဆုံး ရင်းနှီးမြှုပ်နှံထားသော CPI ကုမ္ပဏီဥက္ကဋ္ဌ Mr. Lu Qizhou က China Daily သတင်းစာနှင့်ပြုလုပ်သော အင်တာဗျူး၌ ထုတ်ဖော် ပြောဆိုခဲ့သည်။
စီမံကိန်းအား ပုံမှန်အတိုင်း ပြန်လည်ပတ်နိုင်လိမ့်မည်ဟု မျှော်လင့်ထားကြောင်းလည်း ၎င်းက ဆိုသည်။ တရုတ်အစိုးရ၏ အာဘော်ကို ထင်ဟပ်သည့် သတင်းစာများနှင့် ဟောင်ကောင်အခြေစိုက် သတင်းစာတချို့ကလည်း မြန်မာအစိုးရ၏ လုပ်ဆောင် ချက်ကြောင့် တရုတ်နိုင်ငံအား အိမ်နီးချင်းနိုင်ငံများ၏ လေးစားမှုကို လျော့ကျစေသည်ဟု ပြင်းထန်စွာဝေ ဖန်ထုတ် လွှင့်ခဲ့ကြသည်။
သမ္မတဦးသိန်းစိန်း၏ လုပ်ရပ်အပေါ် တရုတ်အစိုးရက ဝေဖန်၊ ကန့်ကွက်မှုများ လုပ်ဆောင်ခဲ့သော်လည်း အမေရိကန်အစိုးရက ထောက်ခံကြောင်း မရှေးမနှောင်း ကြေညာခဲ့သည်။
ထို့အတူ အမေရိကန် အထက်လွှတ်တော်အမတ် ဂျွန်မက်ကိန်းကလည်း မြန်မာအစိုးရကို ချီးကျူးပြောဆိုလိုက်ပြီး ပြည်သူ လူထု၏ အသံကို နားထောင်ပြီး ပြည်သူ့အကျိုးအတွက် အစိုးရမူဝါဒတွင် မထင်မှတ်သော ပြောင်းလဲမှုများပြု လုပ် လိုက် ကြောင်း ပြောသည်။ မစ္စတာ ဂျွန်မက်ကိန်း က “ဒီမိုကရေစီဆန်သော လုပ်ရပ်” ဟု လည်း ဆိုလိုက်သည်။
မြစ်ဆုံစီမံကိန်း ဆိုင်းငံ့ထားရန် မြန်မာအစိုးရက ဆုံးဖြတ်ခဲ့သော်လည်း တရုတ်နိုင်ငံအား အကြောင်းကြားခြင်း တစုံတရာမရှိဟု တရုတ်အစိုးရ အာဘော်သတင်းဌာန တချို့ကပြောဆိုခဲ့သည်။
ICG ညွန်ကြားရေးမှူးကမူ သမ္မတ ဦးသိန်းစိန်သည် မြစ်ဆုံ ရပ်ဆိုင်းထားရေး ကိစ္စအပေါ် နိုင်ငံတကာ၏ ထောက်ခံမှု ရရေးအတွက် အလွယ်တကူ ဆုံးဖြတ်ချက် ချခဲ့ဟန်မရှိဟုပြောဆိုပြီး ထိုဆုံးဖြတ်ချက်နှင့် ပတ်သက်၍လည်း သံသယများ ရှိနေကြမည်ဖြစ်ကြောင်း Mr Jim.Della-Giacoma သုံးသပ်ပြောဆိုသည်။
| < Prev | Next > |
|---|