သူသည် Gay parade ဟု ခေါ်သည့် လိင်တူချစ်သူများ စီတန်း လမ်းလျှောက်ပွဲကြီး တခုတွင် ပါဝင် ဆင်နွှဲရန် ထိုင်းနိုင်ငံ ချင်းမိုင်မြို့သို့ ရောက်လာသူ တဦးဖြစ်သည်။ မြန်မာပြည်သို့ပြန်မည် ဖြစ်သောကြောင့် ၎င်း၏အမည်ကို အသုံးပြုခွင့် မပြုပေ။
ပြီးခဲ့သည့် တနင်္ဂနွေနေ့က သူ နှင့် အခြား မြန်မာပြည်သား အယောက် ၂၀ ခန့်သည် လမ်းလျှောက်ပွဲကို မြန်မာအမျိုးသမီးဝတ်စုံများ ၀တ်ဆင်ပြီး ဆင်နွှဲရန် စီစဉ်ထားကြသည်။ သို့သော်လည်း ၎င်းတို့ ရင်ခုန်စွာ စောင့်စားနေသည့် စီတန်းလှည့်လည်ပွဲ ပြုလုပ်မည့် အချိန်တွင် နယ်မြေခံ ဆန္ဒပြသူတချို့၏ ပိတ်ဆို့ ကန့်ကွက်မှုကြောင့် အစီအစဉ်တခုလုံး ဖျက်သိမ်းလိုက်ရသည်။
ဤသို့ဖြင့် မြန်မာပြည် အရပ်ရပ်မှ ရောက်လာကြသည့် မိန်းမလျာများ (၎င်းတို့အခေါ် လိင်တူချစ်သူများ) သည် ချင်းမိုင်မြို့မှ တပ်ခေါက် ပြန်ကြရသည်။
၎င်းတို့၏ အဆိုအရ လိင်တူချင်း နှစ်သက်သည့် ယောက်ျားများကို သုံးမျိုးခွဲခြားနိုင်သည်။ အပုန်း၊ အပွင့် နှင့် သူငယ်တော်တို့ ဖြစ်သည်။
“အပုန်း” ဟူသည်မှာ လူသိမခံလိုသူများဖြစ်သည်။ မိန်းမလျာ ဖြစ်ကြောင်း အများက သိရှိသွားမည်ကို အထူးစိုးရိမ် ကြောက်ရွံ့ကြသည်ဟု ဆိုသည်။ အများအားဖြင့် ပညာတတ် လူတန်းစားမှ ဖြစ်သည်ဟု သိရသည်။ “ယောက်ျားပုန်း” ဟုလည်း ၎င်းတို့လောကတွင် ခေါ်ကြသည်။
“အပွင့်”ဟူသော ဝေါဟာရမှာ မိန်းမလျာဖြစ်ကြောင်း ပွင့်ပွင့်လင်းလင်း ၀တ်စားဆင်ယင် ပြောဆို နေထိုင်သူများကို ရည်ရွယ်သည်။
အပုန်း၊ အပွင့် တို့နှင့် ချစ်သူအဖြစ် ပေါင်းသင်းသူများကို “သူငယ်တော်”ဟု ခေါ်ကြသည်။
အပုန်းတို့သည် ၎င်းတို့၏ မိသားစုဝင်များကို အသိမပေးဘဲ ပြင်ပတွင် အမျိုးသမီး အ၀တ်အစားများ ၀တ်ဆင်လေ့ ရှိကြသည်။ မိသားစုဝင်များ သိရှိသွားပြီးနောက် အိမ်သို့မပြန်ဘဲ အပွင့် အဖြစ် နေထိုင်သွားသူများလည်း ရှိသည်။
၎င်းတို့သည် ပညာရေးတွင် အခက်အခဲများ ရှိကြသည်ဟု ဆိုသည်။ “ကျောင်းမှာဆိုရင်လည်း ဆံပင်အရှည် မထားရဘူး။ ဒါနဲ့ ကျောင်းဆက် မတက်နိုင်ဘဲ ထွက်လိုက်ကြတယ်” ဟု အပွင့်တယောက်က ပြောသည်။
တခါတရံ ၎င်းတို့၏ မိဘများက အတင်းအကျပ် အိမ်ထောင်ပြုရန် စီစဉ်သည့်အခါ စိတ်ပိုင်းဆိုင်ရာ နှင့် လိင်ပိုင်းဆိုင်ရာ ထိခိုက်မှုများနှင့် ကြုံရသည်ဟု ဆိုသည်။
လိင်တူချစ်သူများများကို HIV/ AIDS ရောဂါပိုးများ ဖြန့်ဖြူးသူများအဖြစ် ထင်မြင် ယူဆနေကြသည် ဟု ချင်းမိုင်မြို့တွင် နေထိုင်သည့် လိင်တူချစ်သူ တဦး ဖြစ်သော ကိုအောင်မျိုးမင်းက ပြောသည်။
“လူ့အသိုင်းအ၀န်း တခုလုံးက လိင်တူချင်း ချစ်သူများကို မွေးရာပါ သဘာဝတရားသာ ဖြစ်တယ် ဆိုတာ မြင်ဖို့လိုတယ်။ သူတို့ရဲ့ စိတ်ပိုင်းဆိုင်ရာ ရွေးချယ် ရပ်တည်မှု အပေါ် ခွဲခြား ဆက်ဆံတာတွေ မလုပ်ဘဲ၊ လူကို လူလို တန်းတူညီမျှ အသိအမှတ် ပြုဖို့ လိုပါတယ်” ဟု ကိုအောင်မျိုးမင်းက ပြောသည်။
ကိုအောင်မျိုးမင်းသည် လိင်တူချစ်သူများ ဆိုင်ရာ ပညာပေး စာစောင် တခု ဖြစ်သည့် သက်တံ မဂ္ဂဇင်း (Rainbow Magazine)ကို ထုတ်ဝေနေသူ တဦး ဖြစ်သည်။
မိန်းမလျာ ဟု ခေါ်ဝေါ်သုံးနှုန်းမှုကို ကိုအောင်မျိုးမင်းက ကန့်ကွက်သည်။
“ငယ်ငယ်လေး ကတည်းက မိန်းမလျာလို့ ပြောလိုက်ရင် နှိမ်တဲ့သဘော၊ အထင်သေးတဲ့ သဘော၊ အသိအမှတ် မပြုတဲ့ သဘောတွေ ကျနော်တို့ ခံရတယ်။ ပတ်ဝန်းကျင်က နှုတ်ကျိုးနေတဲ့ ဒီစကားလုံးကို ကျနော်တို့က မကြိုက်ဘူး။ အဲဒါကြောင့် လိင်တူချစ်သူလို့ သုံးဖို့ ကြိုးစားနေပါတယ်” ဟု ကိုအောင်မျိုးမင်းက ပြောသည်။
ပတ်ဝန်းကျင်၏ လေးစားမှုရထားသည့် အထက်တန်းလွှာ၊ ပညာတတ်များ ကြားတွင် လိင်တူချစ်သူ ဟူသော စကားလုံးကို အသုံးပြုရန် မ၀ံ့မရဲ ဖြစ်နေကြပြီး၊ ပုံစံခွက်ကြီးကို ရိုက်ဖျက်ရန် ကြောက်ရွံ့နေကြဆဲဖြစ်သည်ဟု ဆိုသည်။
အောင်မြင် ထင်ရှားသည့် လိင်တူချင်း ချစ်သူများ ရှိသည်ဟု ကိုအောင်မျိုးမင်းက ဆိုသည်။ မိတ်ကပ်ပညာရှင်ကဲ့သို့သော လိင်တူချစ်သူများမှာ ၎င်းတို့၏ အသက်မွေးဝမ်းကျောင်း လုပ်ငန်းတွင် အလွန် အောင်မြင်ကြသည်ဟု ၎င်းက သုံးသပ်ပြသည်။
“ဘယ်နေရာမှာ အခက်အခဲရှိလဲ ဆိုတော့ ရှေ့နေတို့၊ အစိုးရအရာရှိတို့၊ ကျောင်းဆရာ၊ ဆရာမတို့၊ ဆရာဝန်တွေ ကြားမှာတော့ ဖြစ်နေတဲ့သူတွေ အများကြီးရှိတယ်။ ဒါပေမယ့် ပွင့်ပွင့် လင်းလင်း မပြောရဲဘူး။ ဘာဖြစ်လို့လဲ ဆိုတော့ မိန်းမလျာလို့ ပြောလိုက်ရင် မိတ်ကပ်ရယ်၊ ရှောက်သီးဆေးပြားသည်ရယ်၊ နတ်ကတော်ရယ်ကလွဲလို့ ဒီထက် ပိုမမြင်သေးတဲ့ စိတ်ကြောင့် ဖြစ်ပါတယ်” ဟု ကိုအောင်မျိုးမင်း ကပြောသည်။
ကနွဲ့ကလျ ဖြစ်သူများကို အသက်ကြီးသူများက ဝိုင်းဝန်း နှိပ်စက်ကြခြင်း၊ ရပ်ကွက်ထဲတွင်လည်း လှောင်ပြောင်ခြင်း၊ ရိုက်ပုတ်ခြင်း စသည့် လူတယောက်၏ ဂုဏ်သိက္ခာကို ထိခိုက်စေသော အနိုင်ကျင့်မှုများနှင့် ရင်ဆိုင်ရသည်ဟု ဆိုသည်။
ကိုအောင်မျိုးမင်းသည် ချင်းမိုင်မြို့အခြေစိုက် လူ့အခွင့်အရေး ပညာပေးဌာန (မြန်မာနိုင်ငံ)၏ ညွှန်ကြားရေးမှူးလည်း ဖြစ်သည်။
၂၀၀၂ခုနှစ်မှစပြီး လိင်တူချင်းချစ်သူများနှင့် ပတ်သက်သည့် ပညာပေးမှုများ ပြုလုပ်ခဲ့သည်ဟု ဆိုသည်။
“ပတ်ဝန်းကျင်က အသိအမှတ်ပြုဖို့၊ လေးစားဖို့အတွက် ကိုယ့်ရဲ့ life style (လူမှုဘ၀ပုံစံ) အများကြီး ပြောင်းလဲ ရမယ် ဆိုတာကိုလည်း ပညာပေး ဆွေးနွေးဖြစ်တယ်” ဟု ကိုအောင်မျိုးမင်းက ဆိုသည်။
| < Prev | Next > |
|---|
