“မြန်မာနိုင်ငံရဲ့ နိုင်ငံရေး လုပ်ငန်းစဉ် သစ်မှာ အင်အားစု အားလုံး ပါဝင်နိုင်ရေးနဲ့ အမျိုးသား ပြန်လည် သင့်မြတ်ရေးကို ကျနော်တို့ အလွန်ပဲ စိုးရိမ်ခဲ့ပါတယ်”ဟု ကဆစ် ဖိရုမ်းက အေပီ သတင်းဌာနနှင့် အင်တာဗျူး တခုတွင် ပြောဆိုခဲ့သည်။လွန်ခဲ့သည့် မတ်လ ၂၉ ရက်နေ့က NLD ခေါင်းဆောင်များနှင့် နိုင်ငံတ၀န်းရှိ ဗဟိုဦးစီး အဖွဲ့ဝင် ၁၁၃ ဦးတို့ ကျင်းပသည့် ဆွေးနွေး ပွဲတွင် ပါတီ ပြန်လည် မှတ်ပုံတင်ခြင်း မပြုရန်နှင့် ရွေးကောက်ပွဲ မ၀င်ရန် ဆုံးဖြတ် ခဲ့ကြသည်။
ကဆစ် ဖိရုမ်းက“သူတို့အရေးကို သူတို့ လွတ်လွတ် လပ်လပ် ဆုံးဖြတ်ချက် ချခွင့် ရှိရပါမယ်၊ အခုလို ဆုံးဖြတ်ချက် ချလိုက်တာကို ကျနော့် အနေနဲ့ လေးစား ဂုဏ်ယူ ပါတယ်”ဟု ဆိုသည်။
စစ်အစိုးရက ရွေးကောက်ပွဲ ဥပဒေထုတ်ပြန်လိုက်ပြီးနောက် NLD ပါတီက ယခုကဲ့သို့ ဆုံးဖြတ်လိုက်ခြင်းဖြစ်ကြောင်း၊ ရွေးကောက် ပွဲ ဥပဒေသည် စစ်ခေါင်းဆောင်များ လွတ်မြောက်ရေးအတွက် တခုတည်းသော အသုံးချကိရိယာ တခုကဲ့သို့ ဖြစ်နေပြီး အတိုက် အခံ နိုင်ငံရေးအင်အားစုများဘက်တွင် အကျပ်အတည်းဖြစ်စေသော ခွဲခြားဆက်ဆံသည့် ဥပဒေ ဖြစ်ကြောင်းလည်း ကဆစ်က ပြောသည်။
ထိုင်းဝန်ကြီးချုပ် အဖိဆစ် ဝေ့ချာချီဝကလည်း လာမည့် အပတ်တွင် ဗီယက်နမ်နိုင်ငံ ဟနွိုင်းမြို့၌ ကျင်းပမည့် အာဆီယံထိပ်သီး အစည်း အဝေးတွင် မြန်မာ ခေါင်းဆောင်များနှင့် မြန်မာ့ အရေးကို မြှင့်တင် ဆွေးနွေးသွားမည် ဖြစ်ကြောင်း ဆိုသည်။
အလားတူပင် မြန်မာနိုင်ငံသို့ သွားရောက်ခဲ့သော အင်ဒိုနီးရှား နိုင်ငံခြားရေး ၀န်ကြီး မစ္စတာ မာတီအမ် နာတာ လီဂါဝါက ရွေး ကောက်ပွဲနှင့် ပတ်သက်ပြီး ဒီမိုကရေစီ ခေါင်းဆောင် ဒေါ်အောင်ဆန်း စုကြည်အပေါ် တားမြစ်မှုများ မပြုလုပ်ရန် တောင်းဆိုထား ကြောင်း သိရသည်။
စစ်အစိုးရက ၁၉၉၀ ပြည့်တွင် ပြုလုပ်သည့် ရွေးကောက်ပွဲရလဒ်အရ အနိုင်ရရှိခဲ့သည့် အမျိုးသားဒီမိုကရေစီအဖွဲ့ချုပ်(NLD)ပါတီ ကိုအာဏာလွှဲပြောင်းမပေးဘဲ နိုင်ငံတကာမှ အသိအမှတ်ပြုရန် ရွေးကောက်ပွဲ တခုကို ထပ်မံပြုလုပ်ခြင်း ဖြစ်ကြောင်း နိုင်ငံရေး အ ကဲခတ်များက သုံးသပ်သည်။
| < Prev | Next > |
|---|