ထိုင်းနိုင်ငံ ကန်ချနဘူရီ ခရိုင်နှင့် တနင်္သာရီတိုင်း ထားဝယ်မြို့ကို ဆက်သွယ်သော ကားလမ်းသည် KNU တပ်မဟာ ၄ လှုပ်ရှားသည့် ဒေသတွင် တည်ရှိပြီး Italian-Thai Development (ITD) ကုမ္ပဏီက ဖောက်လုပ်နေခြင်း ဖြစ်သည်။ထားဝယ်ရေနက်ဆိပ်ကမ်း စီမံကိန်း မစတင်မီ ပတ်ဝန်းကျင် အပေါ် အကျိုးသက်ရောက်မှုများကို စနစ်တကျ လေ့လာရန် လိုကြောင်း KNU အထွေထွေ အတွင်းရေးမှူး နော်စီဖိုးရာစိန်က အင်္ဂါနေ့တွင် ပြောလိုက်သည်။
“ဖွံဖြိုးတိုးတက်ရေး လုပ်ငန်းအားလုံးက နိုင်ငံတကာဥပဒေအတိုင်းပဲ ဖြစ်ရမယ်။ ပတ်ဝန်းကျင်ကို ပျက်စီးစေပြီးတော့ လူတွေကို ကောင်းကျိုး မပေးမှာကို ကျမတို့ မလိုလားပါဘူး” ဟု နော်စီဖိုးရာစိန်က ဧရာဝတီသို့ ပြောသည်။
စီမံကိန်း၏ အကျိုးသက်ရောက်မှုကို ဒေသခံပြည်သူများ သိရှိရန် လိုအပ်ပြီး စီမံကိန်းတည်ဆောက်ရေးနှင့် ပတ်သက်၍ ပြည်သူတို့က ဆုံးဖြတ်ပိုင်ခွင့်ရှိသည်ဟု နော်စီဖိုးရာစိန်က ဆက် ပြောသည်။
လူ့အခွင့်အရေးအဖွဲ့များကလည်း စီမံကိန်းကြောင့် ဒေသခံများ ဆုံးရှုံးမှု ကြီးမားကြောင်း ပြောဆိုနေကြသည်။
KNU က ထိုစီမံကိန်းနှင့် ပတ်သက်ပြီး ၎င်းတို့၏ အရေးယူ ဆောင်ရွက်ချက်များသည် ဒေသခံတို့၏ သဘောထားအပေါ် မူတည်သည်ဟု လေသံပစ်ထားသည်။
KNU က ယခင်တပတ်ကပင် ITD ကုမ္ပဏီကို ဆက်သွယ်ပြီး မော်တော်ယာဉ်များ သွားလာခွင့် ပိတ်ပင်ထားမှုကို အသိပေးပြီးဖြစ်သည်ဟု သိရကြောင်း ကရင်တိုင်းရင်းသား သတင်းဌာနတခုဖြစ်သည့် Kwekalu ၏ အယ်ဒီတာ အယ်နာက ပြောသည်။
သို့သော်လည်း စီမံကိန်းဒေသ အလုပ်သမားများအတွက် ရိက္ခာသယ်ပို့ပေးသည့် မော်တော်ယာဉ်တချို့ သွားလာနေခြင်းကို KNUက ခွင့်ပြုထားသည်ဟု အယ်ဒီတာ အယ်နာက ဆိုသည်။
ထားဝယ်ရေနက်ဆိပ်ကမ်းစီမံကိန်းသည် စတုရန်းမိုင် ၁၀၀ ခန့် (၂၅၀ စတုရန်း ကီလိုမီတာ) အကျယ်အ၀န်းရှိကြောင်း စီမံကိန်း ဆောက်လုပ်ခွင့်ရ ITD ကုမ္ပဏီ၏ မှတ်တမ်းများအရ သိရသည်။
မြန်မာအစိုးရ သတင်းစာများတွင် ဖော်ပြထားချက်အရ ထားဝယ်ရေနက်ဆိပ်ကမ်းတွင် ကုန်တင် သင်္ဘောကြီး ၂၅ စင်း တပြိုင်တည်း ဆိုက်ကပ်နိုင်ပြီး တနှစ်လျှင် ကုန်ပစ္စည်း မက်ထရစ် တန်ချိန် သန်း ၁၀၀ နီးပါး အတင်အချ ပြုလုပ်နိုင်မည်ဟု ဆိုသည်။
ဥရောပနှင့် အင်ဒိုချိုင်းနားကို ဆက်သွယ်ရန် ဖြတ်လမ်းဖြစ်လာပြီး စင်ကာပူထက်သာမည်ဟု ဆိုထားသော ထားဝယ် ရေနက်ဆိပ်ကမ်း စီမံကိန်း၏ အရေးပါပုံ၊ စီမံကိန်းကြောင့် နိုင်ငံ၏ စီးပွားရေး တိုးတက်လာနိုင်ပုံတို့ကို မြန်မာစာနယ်ဇင်းများတွင် ဖော်ပြခဲ့ပြီးဖြစ်သည်။
| < Prev | Next > |
|---|