မေး။ ။ ခုနောက်ဆုံး ထွက်တဲ့ တစ္ဆေလမ်း အခွေမှာ ကိုယ်ပိုင်သံစဉ် ရော့ခ်စစ်စစ်လို့ ပြောထားတယ်။ အဲဒီတော့ ကိုဇော်ဝင်းထွဋ်ရဲ့ ရော့ခ် စစ်စစ်ဆိုတာ ဘာကိုဆိုလိုတာလဲ သိပါရစေ။ ဖြေ။ ။ ရော့ခ် စစ်တယ်ဆိုတာ ရော့ခ် ဂီတနားလည်သူတွေ၊ ရော့ကာ အချင်းချင်းဆိုရင်တော့ သဘော ပေါက်တာပေါ့။ ကျနော်တို့ ဆိုတာတွေကို လူတွေသဘောပေါက်သွားတဲ့ဟာ၊ ပရိသတ်နား စွဲသွားတဲ့ဟာတွေ တော့ ပါမှာမဟုတ်ဘူး။ ကျနော်တို့ ယုံကြည်တာ ကျနော်တို့ အသွေးအသားက ထွက်လာတဲ့ ကျနော်တို့ ကြုံတွေ့ ရတဲ့ အတွေ့အကြုံတွေ ကျနော်တို့ ကြုံတွေ့ရတဲ့ ဒီ music အရရော ကိုယ့်ရဲ့ ဘဝအတွေ့အကြုံအရရော ဒါတွေကိုပဲ ဖော်ထုတ်တာ။ လူငယ်တွေလို အသည်းကွဲရင် တပုဒ်ရတယ် ဆိုတာမျိုး ဖန်တီးထားတာ မျိုးတော့ မဟုတ်ဘူး။
မေး။ ။ အဲဒီထဲမှာမှ ယုံကြည်တယ် ဆိုတာကို တခုလောက် ပြောပြပေးပါ။
ဖြေ။ ။ ကျနော်တို့ ယုံကြည်တာက ဘယ်ကိစ္စမဆို ကိုယ့်ရဲ့ စိတ်မပါဘဲနဲ့ လုပ်ရင် အဓိပ္ပာယ်မရှိဘူး။ ကိုယ့်ကိုယ်ကိုယ် ညာရာ ရောက်တယ်။ အထူးသဖြင့် ဂီတ ဖန်တီးတဲ့နေရာမှာ ပိုလိုတယ်။
မေး။ ။ ဒီ စီးရီးကို ဘာဖြစ်လို့ ကိုယ်ပိုင်သံစဉ်ချည်းပဲ လုပ်တာလဲ။
ဖြေ။ ။ အမှန်အတိုင်းပြောရရင်တော့ အရင်တုန်းက ဒီ ကိုယ်ပိုင်သံစဉ်၊ ကော်ပီ ဆိုတာတွေကို ကျနော်တို့ ကပဲ စပြီးငြင်းကြ၊ ခုန်ကြလုပ်ခဲ့ကြတာပဲ။ အခုချိန်မှာတော့ ကိုယ်ပိုင်သံစဉ်ရယ် ကော်ပီရယ် ပြောတာထက် music တခုက ကိုယ်ပိုင်ဟန် ဘယ်လောက်ပါလဲ ဆိုတာကို ပြောချင်တယ်။ ကျနော်က ကိုခင်မောင်တိုး သီချင်းကို ယူဆိုမယ်ဆိုရင် ဒါ ကိုယ်ပိုင်လို့ ပြောလို့မရဘူးလေ။ တချို့ own tune တော့မဟုတ်ဘူး။ ဒါပေမယ့် ထူးဆန်းတာရှိတယ်။ အရင်တုံးက မင်းချစ်သူ ရေးခဲ့တဲ့ ဂန္ထဝင်စိမ်းဆို ကော်ပီပဲ။ ဒါပေမယ့် နားထဲမှာ ဒီစာသားနဲ့ သံစဉ်ကစွဲသွားတော့ ကော်ပီသီချင်း လို့တောင် တခါတလေ မေ့သွားတယ်။ အဓိက ကျနော်ဆိုလိုတာက ကိုယ်ပိုင် ဟန်တခုပါဖို့ပဲ လိုပါတယ်။
မေး။ ။ ဒီဘက်နှစ်ပိုင်းမှာ အရင်တုန်းက ကော်ပီတွေ ဆိုခဲ့တဲ့ မြန်မာပြည်က ရော့ကာတွေ ကိုယ်ပိုင် သံစဉ်တွေ ဆိုလာတာ တွေ့ရတယ်။ နောက်ထပ်လည်း ထွက်ဦးမယ်လို့ ကြားတယ်။ ရေစီးကြောင်း ပြောင်းလာ တယ်လို့ ထင်လား။ ပရိတ်သတ်က တောင်းဆိုတာလား။
ဖြေ။ ။ တကယ် ရိုးရိုးသားသား ပရိသတ်ကတော့ ဘာမှ မတောင်းဆိုဘူးခင်ဗျ။ သီချင်း ပေါက်ရင် အကုန်လိုက်ဆိုမှာပဲ။ များသောအားဖြင့် ကိုယ်ပိုင်သံစဉ် ပြောင်းဆို ကြတယ်ဆိုတဲ့ သဘောက ကော်ပီ ဆိုရတာ အားမရတော့လို့။ ကျနော်တို့ ကိုယ်တိုင်လည်း ဆိုခဲ့တာပဲ။ အားမရလို့ ကိုယ်ပိုင်ဟန် ပါချင်လို့ ကိုယ်ပိုင်သံစဉ် ဆိုတာပဲ။ နောက်ပြီး နဂို original ရှိပြီးသားတွေကနေ ကင်းလွတ်ချင်တာ။ original ရှိပြီးသားတွေက ကိုယ်ပြောချင်တာ ပြောလို့မရဘူး။ ကိုယ်လုပ်ချင် တာတွေက ရှိကိုရှိနေတာ။ ဘယ်သူမဆို နောင်တချိန် ထားခဲ့ရင် ကိုယ့်ဟန်ပန်တွေကိုပဲ ထားခဲ့ချင်မှာပဲ။ ဒါကြောင့် ပြောင်းဆိုတာလို့ ကျနော်ထင်တယ်။
မေး။ ။ မြို့မငြိမ်းလည်း ကော်ပီ ရေးခဲ့တာပဲဆိုတော့လေ အဲဒီခေတ်က သီချင်းတွေနဲ့ သီချင်း ပရိတ်သတ်တွေနဲ့ အခုခေတ် ပရိသတ်တွေနဲ့ ဘယ်လိုကွာခြားတယ်ဆိုတာ ထင်မြင်ချက်ပေးပါဦး။
ဖြေ။ ။ အဲဒီခေတ်က အဖြူထည် ပရိတ်သတ်ပေါ့နော်။ အဲဒီခေတ်က မြို့မငြိမ်းတို့ လုပ်သွားတယ် ဆိုတာက ဒီသီချင်းတွေကိုပဲ ဗမာဟန်နဲ့ ပြန်လုပ်သွားတာ သူတို့ကိုယ်တိုင်ကလည်း music ကိုနားလည် တာကော၊ သူတို့ ကိုယ်တိုင်လည်း တကယ့်အတီးသမားတွေ ဖြစ်တယ်။ မြန်မာ့ဂီတကိုကော၊ ကမ္ဘာ့ ဂီတကော မွှေနှောက်ပြီးမှ သူတို့က ဒီသီချင်းတွေ ထွက်လာတာကိုး။ ကျနော်တို့ ဒီခေတ်မှာလို ကော်ပီကို တထပ်တည်း ဆိုတဲ့ပုံစံမဟုတ်ဘူးလေ။ သူတို့ ကော်ပီလုပ်ခဲ့ပေမယ့်လည်း ကျနော်တို့ စိတ်ထဲမှာ ကိုယ်ပိုင်သံစဉ်လို့ပဲ ထင်ခဲ့ကြတာ။
မေး။ ။ အရင်တုန်းက အင်တာဗျူးတွေထဲမှာ ကျနော်ကတော့ အမြဲတမ်းရော့ခ်ပဲလို့ ပြောလေ့ရှိတယ်နော်။ နောက်ပိုင်းမှာ ဘာဖြစ်လို့ အမုန်းမြို့ရဲ့အဝေးမှာလိုမျိုး ဘလူးစ် သီးသန့်အခွေဆိုပြီး လုပ်ခဲ့တာလဲ။
ဖြေ။ ။ ဘလူးစ်ဆိုတာက ရော့ခ် ရဲ့ အဖေပဲလေ။ ဘလူးစ်တွေကနေပဲ ရော့ခ်အန်ရိုးလ်တို့ မက်တယ်လ် တို့ဘက် ရောက်လာတာပဲ။ ကျနော်ကိုယ်တိုင် ဒီဘလူးစ်ကို လုပ်လိုက်တာက နားထောင်နေတဲ့ ပရိသတ်ကို အနည်းဆုံး ဒီခွေကို မကြိုက်ရင်တောင်မှ ဘလူးစ်ဆိုတာ ရှိပါလား၊ ဒီလိုပါလား။ သိစေချင်လို့ တတ်နိုင်သမျှ တကယ့် ဘလူးစ်အစစ်တွေနဲ့ ကျနော်လုပ်ခဲ့တယ်။
မေး။ ။ ဒါဆို ကိုဇော်ဝင်းထွဋ် အနှစ်သက်ဆုံး ဂီတ အမျိုးအစားက ဘာလို့ပြောမလဲ။
ဖြေ။ ။ အမှန်အတိုင်းပြောရရင်တော့ ဘလူးစ် စစ်စစ်နဲ့ ရော့ခ်ပဲ။ ဘလူးစ်ဆန်တဲ့ ရော့ခ်လို့ ပြောရင်ပို မှန်မယ်။
မေး။ ။ ဟစ်ပ်ဟော့တို့ ရက်ပ် တို့ကို ဘယ်လိုမြင်လဲ။ ဂီတအမျိုးအစား တခုလို့ မြင်ပါသလား။
ဖြေ။ ။ သူ့ကို ဂီတ အမျိုးအစားတခုလို့ ကျနော်မြင်ပါတယ်။ ဒါပေမယ့် ကျနော်တို့နဲ့ မသက်ဆိုင်တဲ့ ဂီတလို့ ပဲမြင်တယ်။ ကျနော်တို့ အတွက် ဂီတဆိုတာက သံစဉ် တခုရှိမယ် ရော့ခ်ဆိုလည်း ရော့ခ်၊ ဘလူးစ်ဆိုလည်း ဘလူးစ်ပေါ့နော်၊ သူ့ scale ထဲမှာ မှ ကျနော်တို့က ဆိုသွားတာကိုး။ ဒီ scale ကိုပဲ ကျနော်တို့က ပုံစံ အမျိုးမျိုးနဲ့ ဆိုသွားမယ်။ ဟစ်ပ်ဟော့မှာက စကားပြောသလို၊ တိုင်မင်ပေါ်မှာပဲ ဆိုတာ ဆိုတော့ ကျနော်တို့ အတွက် music အပြည့် မဖြစ်ဘူးပေါ့။
မေး။ ။ ဗမာပြည်မှာ ဟဲဗီးရော့ခ်ကို ကိုဇော်ဝင်းထွဋ်က စခဲ့တယ်လို့ ပြောနိုင်မလား။
ဖြေ။ ။ ကျနော်တို့ ရှေ့မှာလည်း ရှိခဲ့ပါတယ်။ ကျနော်တို့ ခေတ်မှာကျတော့ ရော့ခ် အရသာ music ကာလာ Tone ကအစ အနီးစပ်ဆုံး တူအောင် ပိုပြီးလုပ်နိုင်ခဲ့တာပေါ့လေ။ အစစ အရာရာ တိုးတက်လာတယ်။ နောက် တခွေတည်းမှာပဲ ရော့ခ်တွေအများ ကြီး ထည့်နိုင်တဲ့ အခြေအနေပေါ့။ အရင်တုန်းကတော့ ရော့ခ် အမြန် တပုဒ် ထည့်မယ်၊ ကန်းထရီး တပုဒ်ထည့်မယ်၊ နောက် ထိုင်း သီချင်းတပုဒ်ထည့်မယ်။ တရုတ်သီချင်း တပုဒ် ပါမယ်။ ဟိုး ရှေးခေတ်တုန်း ကတော့ ဒီလိုပဲ ဆိုကြတာပဲ။ ကျနော်တို့ ခေတ်မှာတော့ ရော့ခ် ဆို ရော့ခ်ချည်းပဲ၊ ဟဲဗီး မက်တယ်လ်ဆို မက်တယ်လ်ကြီးပဲကို စလုပ်ခဲ့တာပါ။
မေး။ ။ နိုင်ငံတကာမှာလည်း စစ်ပွဲတွေကို ရော့ကာတွေက ဆန့်ကျင်တာမျိုးတွေ့ရတယ်။ အဲဒါနဲ့ပတ်သက်လို့ ဘယ်လိုအမြင်ရှိပါသလဲ။
ဖြေ။ ။ အဓိကကတော့ ကမ္ဘာသူ ကမ္ဘာသားတွေ တယောက်နဲ့တယောက် ငြိမ်းငြိမ်း ချမ်းချမ်း အတူယှဉ်တွဲ ပြီးတော့ ဘယ်လိုနေမလဲဆိုတာ အရေးကြီးတယ်။ ရော့ကာ တွေရဲ့ သင်္ကေတက Love Peace and Joy ပဲ။ စစ်ဖြစ်တာကို လုံးဝလက်မခံဘူး။ လူတယောက်နဲ့ တယောက် အနိုင်ကျင့်တာ လုံးဝလက်မခံဘူး။
ဥပမာ - ကျနော့် ပွဲတခုမှာဆို လူက ငါးထောင်၊ ခြောက်ထောင်ရှိတယ်။ သူတို့ လုံခြုံရေးတွေ ချထားတယ်။ ဒါပေမယ့် ဒီ လူငါးထောင်၊ ခြောက်ထောင်ကို စစ်သားချထားလဲ စစ်သား ၂၀၀ နဲ့ ဘယ်လိုမှ မနိုင်ဘူး။ ကျနော် မိုက္ကရိုဖုံးနဲ့ အော်တာ။ ဒီလူတွေ ကျနော့် ပရိသတ်တွေ၊ မိတ်ဆွေတွေ၊ ကျနော်ထိန်းမယ်လို့အော်တာ။ အဲဒီမှာ စစ်သားတွေ ဖယ်ပေးလိုက်တယ်။ ပရိသတ်တွေ ပျော်သွားပြီးတော့မှ အတူ သီချင်းဆိုကြတာ။ ကျနော်လည်း ထိန်းရင်းနဲ့သီချင်းဆိုလိုက်တာ ၃၇ ပုဒ်။ အဲဒီ ခရီးစဉ်မှာ အများဆုံး ဖြစ်သွားတယ်။ အဓိက လူတွေကို နိုင်ဖို့က မေတ္တာတရားနဲ့ပဲ ထိန်းလို့ရတယ်ဆိုတာ ကျနော်ပြောချင်တာပါ။ လူတယောက်ကို ဇွတ် သွားပြီး ထိန်းလို့ မရပါဘူး။ လူဟာ ဘယ်သူမဆို၊ ဘယ်လိုကောင်ကြီးဖြစ်ဖြစ် ကိုယ့်ကို ဂရုစိုက်တာ၊ ကြင်နာ သနားတာ၊ မေတ္တာ တရားကို အကုန်ခံယူချင်တဲ့ လူချည်းပဲလေ။
ကျနော့် ဒီတစ္ဆေလမ်းမှာ “ပြန်လည်မွေးဖွားလာတယ်” ဆိုတဲ့ သီချင်းက အဲဒီသဘောမျိုးကို ဆိုတာပဲ။ ကျနော်တို့ တယောက်နဲ့ တယောက် မုန်းရလွန်းလို့ ကမ္ဘာကြီး ကျဆုံးနေပြီဆိုပြီး စပ်ထားတာလေ။ သုခမိန်လှိုင် ရေးတာပါ။ ပြီးတော့ ဒီမှာ သုံးထားတဲ့ ပုံလေးကိုက လက်ဘနွန်မှာရှိတဲ့ ကျနော့်မိတ်ဆွေ လက်ဆောင်ပေး ထားတာ။ လက်ဘနွန်က အနည်းဆုံး ၁၀ ခါလောက် ပြန်လည်ထူထောင်ထားတဲ့ တိုင်းပြည်။ ဒီလိုမအေးချမ်းတဲ့၊ ကျီးလန့် စာစားနေရတဲ့ တိုင်းပြည်ရဲ့ ပုံကလေးကို ကျနော် ဒီသီချင်းမှာ အမှတ်တရအနေနဲ့ သုံးထားတယ်။ ဒီထဲမှာ ပါပါတယ်။ စာသားတွေ ဖတ်ကြည့်လိုက်ရင် သိတယ်။
မေး။ ။ အင်ပါယာ ကျသွားတယ်လို့ထင်တယ်။ ဘာကြောင့်ပါလဲ။
ဖြေ။ ။ အမှန်အတိုင်းပြောရင် ကျနော်တို့ နေရာတနေရာ ရသွားပြီ။ အဲဒီအချိန်မှာ တီးဝိုင်းတ၀ိုင်းဟာ လာသမျှ၊ တွေ့သမျှကို တီးမယ်ဆိုလို့ရှိရင် အဆင့်မရှိတော့ဘူး။
မေး။ ။ ကိုဝေထွန်းတို့ ကိုကျင်ခမ်းဖုန်းတို့ မရှိတော့တဲ့ နောက်ပိုင်းမှာ ကျသွားတယ်လို့ထင်တယ်။
ဖြေ။ ။ ဝေထွန်းတို့ ဗိုလ်ကျင်တို့ ရှိတဲ့ အချိန်မှာ စီးပွားရေးအရ အတော်အောင်မြင် နေတဲ့ ဝိုင်းတဝိုင်းလို့ ပြောလို့ရတယ်။ သူတို့ ဘာကြောင့် ထွက်သွားလဲ ဆိုတာကတော့ မတူတော့လို့။ သူတို့ ဖန်းတီးချင်တာ တမျိုး ဖြစ်မယ်။ ကျနော်တို့ တယောက်နဲ့ တယောက် မုန်းလို့ လမ်းခွဲတာမျိုးမဟုတ်ဘူး။ သူတို့ ထွက်သွားပြီးကတည်းက ရှိသမျှ အဆိုတော်တွေနဲ့ လိုက်ပြီး တီးတာမျိုးကို ကျနော်တို့ နည်းနည်း ရှောင်လိုက်တယ်။ နောက်ပြီး ကျနော်တို့ များသောအားဖြင့် ကုမ္ပဏီတွေနဲ့ အဆင်မပြေဘူး။ ကျနော်တို့ကို လာပြီးအသုံးချတာမျိုးလည်း မခံနိုင်ဘူး။ ကျနော် တို့ ဘာပစ္စည်းမှ သွားပြီး မရောင်းချင်ဘူး။ အခု ကျနော့် တစ္ဆေလမ်းဆိုရင် ကျနော်ရဲ့ အရုပ်တွေ ကျနော်ရဲ့ ဒီဇိုင်း တွေပဲ သုံးမယ်။ ဘယ်ဟာနဲ့ပတ်သက်ပြီး ဘယ်ကုမ္ပဏီကိုမှ လိုက်ကြော်ငြာ ပေးတာ မဖြစ်ချင်ဘူး။ မေး။ ။ မြန်မာပြည်ရဲ့ ဂီတ ဈေးကွက်အနေအထားကို ဘယ်လို မြင်လဲ။
ဖြေ။ ။ ဂီတဈေးကွက်ကတော့ ကျနော်က အစကတည်းက မျှော်လင့်ပြီးသားပဲ။ ဗွီစီဒီတွေ ပေါ်လာတယ်၊ ကာရာအိုကေတွေ ပေါ်လာတယ်။ ပရိသတ်ကို တအား အလိုလိုက်ပြီးတော့ ရှင်းရှင်းပြောရရင် ဂီတကို ရောင်းပြီးတော့ ကြော်ငြာနေရတာ။ လက်ရှိကြော်ငြာနေတဲ့ ဆပ်ပြာ၊ ကော်ဖီမစ်၊ သွားတိုက်ဆေးတွေနဲ့ သိပ်မကွာချင်တော့ဘူး။ အခွေကို နားထောင်ချင်လို့ ဝယ်တဲ့ ပရိသတ်ဆိုတာ တော်တော်ကို ရှားသွားပြီ။
မေး။ ။ ခိုးကူးခွေကြောင့် ဈေးကွက် ပျက်နေတာလား။
ဖြေ။ ။ ခိုးကူးတဲ့ သူတွေအတွက် ဥပဒေက ဒီမှာ မထွန်းကားဘူးဖြစ်နေတယ်။ ဒီခိုးကူး ရောင်းတဲ့သူတွေက စီးပွား ဖြစ်ပြီးတော့ ဘာပဲပြောပြော ဝင်ငွေလေး ရနေတော့ ကျနော်တို့ကပဲ အလုပ်ပေးထားရသလို ဖြစ်မနေ ပေဘူးလား။ ဒီ စီဒီချပ်တွေကို ခိုကူးပြီးတော့ ရောင်းပြီးတော့ မှီခိုနေရတဲ့ မိသားစုတွေက တော်တော်များလာပြီ။ ရန်ကုန်မှာ အရင် ငှက်ပျောသီး ရောင်းတဲ့ကောင် ငှက်ပျောသီး ရောင်းတော့မှာ မဟုတ်တော့ဘူး။ မီးပွိုင့်မှာ ဒီဗွီဒီ သွားရောင်းတော့မှာကိုး။ တဘက်တလမ်းက ကုသိုလ်ရတယ်လို့ တွေးရမလို ဖြစ်နေတာပေါ့နော်။
မေး။ ။ အဆိုတော်တွေက ဘာလို့အသစ်တွေ မထွက်လာရတာလဲ။ အဟောင်းတွေပဲ ပြန်ပြန်ဆိုနေကြတာ တွေ့ရတယ်။
ဖြေ။ ။ ဒါကတော့ ကျနော်ထင်တယ်။ အဆိုတော်တွေ ဆိုတာကတော့ လောလောဆယ် ဆိုနေရတဲ့ ကလေးတွေပေါ့ ဘယ်လောက်တောင် သနားစရာကောင်းလဲ ဆိုတော့ တချို့ဆိုရင် တကိုယ်တော်ခွေ တခွေမှ မထွက်ဘဲနဲ့ ဒီနေ့ နာမည်ကြီး အဆိုတော် ဖြစ်နေတဲ့ သူတွေ အများကြီးရှိတယ်။ အဲဒီတော့ ထုတ်လုပ်သူတွေနဲ့ ဆိုင်တာပေါ့။ အရင်ခေတ်တုန်းကလို အဆိုတော် တယောက်တည်းကို တင်ပေးမယ့် ထုတ်လုပ်သူမရှိတော့ဘူး။
အရင်တုန်းက အေးချမ်းမေ ထားပါတော့။ အေးချမ်းမေကို အပိုင်မွေးတယ်။ စာချုပ်ချုပ်တယ်။ တင်ပေးတယ်။ သူ့အခွေ သိန်းနဲ့ ချီရောင်းရတယ်။ သူအဆိုတော်လည်း ဖြစ်သွားတယ်။ သူတို့လည်း အကျိုးရှိတယ်။ ဒီနေ့တော့ အဲလို မဟုတ်တော့ဘူး။ အဆိုတော်တွေကို နှစ်ပုဒ်၊ သုံးပုဒ် အဲလိုပဲ ခေါ်ဆိုခိုင်းတော့တယ်။
ဥပမာပြောရရင် L ဆိုင်းဇီပေါ့။ သူကိုယ်တိုင်ရေးနိုင်တယ်၊ သူ ကိုယ်တိုင်ဆိုနိုင်တယ်၊ လူကလည်း ချစ်စရာ ကောင်းတယ်။ ဒါပေမယ့် သူဝင်လာတဲ့ အချိန်မှာ ထုတ်လုပ်ရေးတွေက ဒီလိုပဲ ခေါင်းကျက် ခေါင်းစား၊ အမြီးကျက် အမြီးစား ဆိုတဲ့ အခြေအနေ ဖြစ်နေတယ်။ အကယ်၍ အေးချမ်းမေ ခေတ်ကလို တကယ့် ကုမ္ပဏီကြီး တခုကနေ ကဲသမီးကို ခွေသုံးခွေ ထုတ်မယ်။ ရော့ ဘယ်လောက်ပေးထားမယ် ဆိုတာမျိုး ခု မရှိဘူး။ ဒီက ထုတ်လုပ်သူတွေ က ယူကောင်းတုန်း ယူမယ်။ သင်္ကြန်ဆိုရင်လည်း သင်္ကြန်ခွေ ရိုက်လိုက်မယ်။ အဲတော့ အကုန်လုံးကျတာ။ ရုပ်ရှင်ကော၊ ဂီတကကော။ ကောင်းတဲ့ အလားအလာတော့ မဟုတ်ဘူး။
မေး။ ။ အဆိုတော်တွေ အနေနဲ့ရပ်တည်ရတာ အခက်အခဲ ရှိလို့လား။
ဖြေ။ ။ ကျနော်တို့ စဉ်းစားတာနဲ့ ဒီနေ့ အဆိုတော်တွေ စဉ်းစားတာနဲ့ တူမှာ မဟုတ်ဘူး။ ကျနော် နဂိုကတည်းက အဖေတွေကော၊ အမေတွေကော၊ အဖိုးတွေကော ဒီဂီတလောကထဲကဆိုတော့ ဒီပြင် အလုပ်လည်း လုပ်မှာမဟုတ်ဘူး။ ကျနော်က နောက်ဆုံးအချိန် အထိလည်း ဆိုမှာပဲလေ။ ကားဝယ်ရောင်း လုပ်ဖို့လည်း မရှိဘူး။ အမှန်အတိုင်းပြောရရင် သီချင်းဆိုနေရင်းနဲ့ပဲ စင်ပေါ်မှာပဲ သေသွားချင်တယ်။
မေး။ ။ ကိုဇော်ဝင်းထွဋ်ရဲ့ မိသားစုဘဝနဲ့ အဆိုတော်ဘဝကို ဘယ်လိုခွဲခြား နေထိုင်လဲ။
ဖြေ။ ။ ကျနော်တို့ အနေအထားမှာ ဘယ်သူမဆို ဘ၀ နှစ်ခုကို ရင်ဆိုင်ရမှာပဲ။ ဘ၀တခုက တာဝန်အရ လုပ်ရတယ်။ မယုံကြည်တာ မလုပ်ချင်တာတွေ လုပ်ရတယ်။ နောက်တခုက စိတ်ကူး၊ အိပ်မက် လေးပေါ့။ ဖြစ်ချင်တာတွေ အဲဒီထဲမှာရှိနေတယ်။ အဲဒီ နှစ်ခုက တကယ်တော့ နီးနီးလေးပေါ့။ အဲဒီနှစ်ခု အတူတူဖြစ်သွားရင် ဘ၀နှစ်ခုလုံးက ပျော်စရာပေါ့။ ဒီနှစ်ခုကို တပြိုင်တည်းလုပ်နိုင်ဖို့က ကိုယ့်ကို တကယ်နားလည်တဲ့ မိန်းမ တယောက် နောက်ကလိုတယ်။ ကျနော်က ကံကောင်းတယ်။ ကိုယ့်ကိုနားလည်တဲ့ မိန်းမရခဲ့တယ်။
မေး။ ။ သားနဲ့ သမီးကကော ကိုယ်မျှော်လင့်တဲ့ အတိုင်းအတာ ရောက်ရဲ့လား။ ရောက်နေပြီလား။
ဖြေ။ ။ ကျနော်မျှော်လင့်ခဲ့တာက ကလေးနှစ်ယောက်လုံးကို အတန်းထဲမှာ ပထမရဖို့ မမျှော်လင့်ဘူး။ သို့သော် အတန်းထဲမှာ ပျော်စေချင်တယ်။ နောက်ကြီးလာရင်လည်း လူကောင်းလေးတွေ ဖြစ်စေချင်တာ၊ ဒါကျနော့်ရည်ရွယ်ချက်။ သူတို့ကိုယ်သူတို့ ဒီလောကကြီးထဲမှာ ဘယ်လိုပျော်အောင်နေမလဲ။ လောကကြီးမှာ ကိုယ်တယောက်တည်း နေလို့မရဘူး။ ကိုယ်တယောက်တည်း ထိပ်ဆုံးရောက်လို့ မရဘူးဆိုတာ ကျနော် သူတို့ ငယ်ငယ်ကတည်းက ခေါင်းထဲ ထည့်ပေးထားတာ။ ကလေးတွေကို ငယ်ငယ် ကတည်းကနေ don't တခုမှ မပြောခဲ့ဘူး။ သူတို့ကို ကိုယ် သွားစေချင်တဲ့ဘက်ကို လမ်းကြောင်းပြီး အဓမ္မလုပ်တာမျိုး၊ ဇွတ်လုပ်တာမျိုး မရှိခဲ့ဘူး။ ကလေးတွေက သူတို့လိုချင်တာ အမြဲရတော့ သူတို့က လောကကြီးကိုလည်း ချစ်တယ်။ အားလုံး ကလည်း သူတို့ကို ချစ်တယ်လို့ထင်ကြတယ်။ အဲဒါကောင်းတာပေါ့။ ကျနော်ကျေနပ်တယ်။
မေး။ ။ အလှူအတန်းတွေလည်း တော်တော်လုပ်ဖြစ်တယ်နော်။ အဲလိုလုပ်ရတဲ့ ရည်ရွယ်ချက်က။
ဖြေ။ ။ အဲလို လျှောက်လုပ်နေတဲ့ သဘောက အဓိက ကျနော်မနေနိုင်တာပေါ့။ ကိုယ့်ရှေ့မှာ တယောက်ယောက်က လိုအပ်နေတာရှိရင် ကျနော်မနေနိုင်ဘူး။ ဘေးအိမ်က ကလေးတွေ နေမကောင်းရင် ဆေးခန်းပို့ပေး အဲလိုပဲ လုပ်လာတာ။ နာဂစ်နဲ့ကြုံတော့ ဒါ မြန်မာတပြည်လုံးမှာ တာဝန်ရှိတဲ့ သဘောဆိုတော့ ဒီမှာပဲ ကျနော်တို့ သူငယ်ချင်းတွေ အားလုံး စုပြီး လုပ်ပေးခဲ့တာ။
ကံကောင်းတာက ကျနော်တို့က သိပြီးတဲ့ လူတွေ ဖြစ်တယ်။ ကျနော်ခေါ်သွားတဲ့ လူတွေကလည်း နာမည်ရှိတဲ့ သူတွေ။ သူတို့မျက်နှာ မြင်ကတည်းက လူတွေက ခဏပဲဖြစ်ဖြစ် သူတို့ရဲ့ ဒုက္ခကိုမေ့သွားတယ်။ အဲဒီမှာတင် ကျနော်တို့ ကုသိုလ်ရသွားတယ်။ ကျနော်တို့ ဆောက် ပေးထားတဲ့ ကျောင်းမှာဆို ကျောင်းသား ၁၃၀ ကျော် လောက် ရှိမယ်။ အသက်ကြီးသွားလို့ရှိရင် ကျနော့်မှာ လုပ်စရာမရှိတော့ဘူးဆိုရင် ဒီလူမှုရေး လုပ်ငန်းတွေကို ဖောင်ဒေးရှင်းတခုဖွဲ့ပြီး လုပ်သွားချင်တယ်။
မေး။ ။ ပြည်တွင်း ပြည်ပက ပရိသတ်တွေကို ဘာပြောချင်လဲ။
ဖြေ။ ။ ကျနော်က ကျနော့်ပရိသတ်တွေ ဘက်မှာပဲရှိမှာပါ။ ကျနော့်ရဲ့ သဘောတရားကိုက အားနည်းတဲ့လူ ဘက်မှာနေချင်တယ်။ ကျနော့်ပရိသတ်က ကျနော့်ကို အရမ်းမျှော်လင့်ထားတယ် ဆိုတာလည်း ကျနော်သိတယ်။ အဲဒီမျှော်လင့် ထားသလို ကျနော်မပေးနိုင်သေးဘူးလို့ ထင်တာပဲ။ ။
| < Prev | Next > |
|---|
