စက်တင်ဘာ ၁၈ ရက်နေ့ ရုံးချိန်းတွင် ဒေါ်အောင်ဆန်းစုကြည် ကိုယ်တိုင် တက်ရောက်ရန် သက်ဆိုင်ရာ အာဏာပိုင်များအား တင်ပြခဲ့သည်ကို ခွင့်မပြုကြောင်း သတင်းတပ်ဖွဲ့က အကြောင်း ပြန်ခဲ့ခြင်းဖြစ်ဟု ဆိုသည်။ဦးဉာဏ်ဝင်းက“ သတင်းတပ်ဖွဲ့က သူတို့နဲ့ မဆိုင်ဘူး၊ တရားရုံးနဲ့သာ ဆိုင်တယ်လို့ ပြောတယ်၊ ဒါဟာ မမှန်ဘူးလို့ ထင်ပါတယ်၊ တရားရုံးက ဘယ်သူ တက်ပါ ဘယ်သူမတက်ပါနဲ့လို့ ပိတ်ထားတာမှ မရှိဘဲ၊ ထိန်းသိမ်းခံထားရတဲ့ ဒေါ်အောင်ဆန်းစုကြည်ကို ထ်ိန်းသိမ်းတဲ့နေရာမှာ ကြီးကြပ်တဲ့ သတင်းတပ်ဖွဲ့ အနေနဲ့သာ ရုံးကို ရောက်အောင် ပို့ပေးနိုင်တယ်လို့ ကျနော်တို့ ဒီလိုပဲ နားလည်ပါတယ်” ဟု ဧရာဝတီသို့ ပြောသည်။
တရားရုံး အယူခံ ကြားနာရာတွင် လျှောက်လဲသူ မပါဘဲ ကြားနာ၍ ရသော်လည်း ကြားနာခွင့် ရရေးမှာ ကာယကံရှင်၏ ဆန္ဒဖြစ်ကြောင်း၊ သို့သော် ယခုကဲ့သို့ သက်ဆိုင်ရာ တာဝန်ရှိဌာနက ငြင်းပယ်ခဲ့သည့် အတွက် ထပ်မံ၍ တင်ပြ တောင်းဆိုရန် မဖြစ်နိုင်ကြောင်းလည်း ၎င်းက ဆက်လက် ပြောဆိုသည်။
အဆိုပါ အယူခံလွှာတွင် ဥပဒေကြောင်းဆိုင်ရာ အချက် ၁၁ ချက်ပါဝင်ပြီး၊ ၁၉၇၄ ခုနှစ် အခြေခံ ဥပဒေဆိုင်ရာ နှင့် ဥပဒေ အဓိပ္ပာယ်ဖွင့်ဆိုချက်များ ပါဝင်သည်ဟု သိရှိရသည်။
ဒေါ်အောင်ဆန်းစုကြည်၏ အယူခံကို ရန်ကုန်တိုင်း တရားရုံးက စက်တင်ဘာ ၄ ရက်နေ့ တွင် လက်ခံခဲ့ပြီး လျှောက်လဲချက် ကြားနာရန် စက်တင်ဘာလ ၁၈ ရက်နေ့ နံနက် ၁၀ နာရီတွင် ရုံးချိန်းပေးထားသည်။
ဒေါ်အောင်ဆန်းစုကြည်ကို ပြီးခဲ့သော သြဂုတ်လ ၁၁ရက်နေ့တွင် တိုင်းတရားရုံးက နေအိမ် အကျယ်ချုပ် ၁နှစ်ခွဲ ချမှတ်ခဲ့သည့် အပေါ် ယခုကဲ့သို့ အယူခံဝင်ခြင်း ဖြစ်သည်။
ဒေါ်အောင်ဆန်းစုကြည်သည် မေလအတွင်း ၎င်း၏နေအိမ်သို့ တိတ်တဆိတ် ဝင်ရောက်ခဲ့သော အမေရိကန် နိုင်ငံ သား ဂျွန် ဝီလျံ ယက်ထော ကြောင့် ရုံးတင်တရားစွဲခံခဲ့ရခြင်းဖြစ်သည်။
ထိုအမှုတွင် အင်းစိန်ထောင်တွင်း အထူးတရားရုံးက ဒေါ်အောင်ဆန်းစုကြည်ကို ထောင်ဒဏ် ၃ နှစ် ချမှတ်ခဲ့ သည်။ သို့သော် စစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေ၏ အမိန့်ဖြင့် ကျခံရမည့် ထောင်ဒဏ်ကို ထက်ဝက် လျှော့ချကာ ဆိုင်းငံ့ ပြစ်ဒဏ် နေအိမ် အကျယ်ချုပ် ၁ နှစ်ခွဲ စီရင်ချက် ချမှတ်ခံခဲ့ရသည်။
ပြစ်ဒဏ်လျှော့ပေါ့ရခြင်း အကြောင်းအရင်းမှာ ဒေါ်အောင်ဆန်းစုကြည်သည် ဗိုလ်ချုပ်အောင်ဆန်း၏ သမီး ဖြစ်၍ လည်းကောင်း၊ ရပ်ရွာ အေးချမ်း သာယာရေးနှင့် တည်ငြိမ်ရေးကို ရှေးရှု၍ လည်းကောင်း၊ အာဃာတ မရှိစေရေး အတွက် လည်းကောင်း၊ ဒီမိုကရေစီ လမ်းကြောင်းတွင် အနှောင့်အယှက် မဖြစ်စေရေးအတွက်လည်းကောင်း ဖြစ်သည်ဟု ဆိုသည်။
ဒေါ်အောင်ဆန်းစုကြည်သည် ၂၀၀၃ ခုနှစ် မေလတွင် ဖြစ်ပွားခဲ့သော ဒီပဲယင်းအကြမ်းဖက်တိုက်ခိုက်မှု အပြီးမှ စတင်၍ နေအိမ် အကျယ်ချုပ်ဖြင့် အထိန်းသိမ်းခံနေရသည့် ၆ နှစ်ပြည့်ခါနီး အချိန်တွင် ယခုကဲ့သို့ တရားစွဲဆို ခံရခြင်း ဖြစ်သည်။ ၁၉၈၉ ခုနှစ်မှ စ၍ နေအိမ် အကျယ်ချုပ် ဘ၀ဖြင့် နေရချိန် စုစုပေါင်း ၁၃ နှစ်ကျော်ပြီ ဖြစ်သည်။
| < Prev | Next > |
|---|
