ပြီးခဲ့သည့် အပတ်အတွင်းက မကွေးတိုင်း ပခုက္ကူမြို့ရှိ သာသနာ့ဝိပုလရာမ ပါဠိတက္ကသိုလ် ကျောင်းတိုက်သို့ သွားရောက်ခဲ့သောကြောင့် ဒေသခံ အာဏာပိုင်များ၏ ဖမ်းဆီးထိန်းသိမ်းခံထားရသည့် မလှလှဝင်းသည် အစာရေစာ စားသောက်ခြင်းမရှိသည့်အတွက် ယခုအခါ ပခုက္ကူထောင်မှ ဆေးရုံသို့ ပို့ဆောင်ထားရကြောင်း ထောင် အသိုင်းအဝိုင်းက ပြောသည်။
“ရေပဲသောက်တယ်။ မေးရင် ခေါင်းညိတ်တယ်၊ ခေါင်း ခါတယ်။ ထောင်ပိုင်က ဆရာဝန်ခေါ်ပြတယ် ကြား တယ်”ဟု ပခုက္ကူထောင်နှင့်နီးစပ်သူ တဦးက ဧရာဝတီသို့ပြောသည်။
ပခုက္ကူထောင်သို့ ဧရာဝတီမှ ဆက်သွယ်မေးမြန်းခဲ့သော်လည်း ဖြေဆိုခြင်းမရှိ၍ အသေးစိတ်အခြေအနေကို သီးခြားအတည်ပြုနိုင်ခြင်း မရှိသေးပါ။
ပခုက္ကူဒေသခံ တဦးကလည်း“သူက ဘာလိုချင်တယ် ဘာတောင်းတယ်ဆိုတာတော့ ဘာမှမကြားမိဘူး။ အခု ပခုက္ကူဆေးရုံရောက်နေတယ် ဆိုတာပဲ သိရတယ်”ဟု ပြောသည်။
မလှလှဝင်းသည် ရန်ကုန်မြို့ သာကေတမြို့နယ်မှဖြစ်ပြီး ပခုက္ကူမြို့ရှိ အဆိုပါ ကျောင်းတိုက်သို့ သွားရောက် ခဲ့ရာ ကျောင်းတိုက်မှအထွက်တွင် ၎င်းအပါအဝင် လိုက်ပါပို့ဆောင်ပေးသူ ပခုက္ကူမှ ကိုစောလင်းနိုင်နှင့် ကိုမြင့်နိုင်တို့ကိုပါ အာဏာပိုင်များက ဖမ်းဆီးထိန်းသိမ်းခဲ့ခြင်းဖြစ်သည်။
၎င်းတို့ကို အာဏာပိုင်များက ပခုက္ကူထောင်တွင်း ထိန်းသိမ်းထားကာ ပြည်ပမီဒီယာများနှင့် ဆက်သွယ်သည် ဟု စွဲချက်တင်ထားပြီး ရုံးတင်စစ်ဆေးနေကြောင်း ဒေသခံများက ဆိုသည်။
သြဂုတ်လအတွင်းကလည်း ၎င်း သာသနာ့ဝိပုလရာမ ပါဠိတက္ကသိုလ် ကျောင်းတိုက်မှ ဆရာတော် ဦးဝိသုဒ္ဓ ထိန်းသိမ်းခံရသည်ဟု သိရသည်။
အဆိုပါ ပခုက္ကူမြို့၌ ရွှေဝါရောင်တော်လှန်ရေးဖြစ်ပွားခဲ့သည့်၂၀၀၇ ခုနှစ် စက်တင်ဘာ ၅ ရက်နေ့တွင် သံဃာ ၅၀၀ ကျော် မေတ္တာပို့ လမ်းလျှောက်ဆန္ဒပြခဲ့ရာ လုံခြုံရေးတပ်ဖွဲ့ဝင်များက အကြမ်းဖက် ဖြိုခွဲခဲ့သည်။ သံဃာ ၃ ပါး ကို ဓာတ်တိုင်တွင် တုပ်နှောင်ကာ ရိုက်နှက်ခဲ့သောကြောင့် မြန်မာပြည် အနှံ့အပြားမှ ရဟန်း ရှင်လူများ စိတ်ဆိုးဒေါသထွက်ခဲ့ကြသည်။
ထိုဖြစ်ရပ်ကို စစ်အစိုးရက ပြန်လည် တောင်းပန်ခြင်း မပြုသဖြင့် နိုင်ငံအနှံ့မှ သံဃာတော်များက ၂၀၀၇ ခု စက်တင်ဘာ ၁၈ ရက်မှစ၍ အာဏာပိုင် တို့ကို ပတ္တနိကုဇ္ဇန ကံဆောင် သပိတ်မှောက်ခဲ့သည်။ ထို့ပြင် သံဃာ တော်များ မေတ္တာပို့ဆန္ဒပြကြွချီရာမှ လူထုလှုပ်ရှားမှုအသွင်သို့ ကူးပြောင်းခဲ့သည်။ အာဏာပိုင်တို့က စက်တင် ဘာ ၂၆ နှင့် ၂၇ ရက်နေ့တို့တွင် ရန်ကုန်မြို့ရှိ ဆန္ဒပြမှုများကို အကြမ်းဖက် ပစ်ခတ် ဖြိုခွင်းကာ သံဃာနှင့် သီလရှင်များကို ဖမ်းဆီး တရားစွဲပြီး နှစ်ရှည် ထောင်ဒဏ်များ ချမှတ်လိုက်သည်။
| < Prev | Next > |
|---|
