အသက် ၆၅နှစ် အရွယ်ရှိပြီ ဖြစ်သော ဦးဝင်းအောင်သည် ဦးနှောက်သွေးကြောပြတ်ပြီး ရုတ်တရက် ကွယ်လွန်သွားခြင်း ဖြစ်ကြောင်း အင်းစိန်အကျဉ်းထောင် သတင်းရပ်ကွက်က ဆိုသည်။
ယနေ့ထုတ် စစ်အစိုးရ သတင်းစာများတွင် သူ၏ နာရေးကြော်ငြာ ပါဝင်သော်လည်း ဦးဝင်းအောင် (ထားဝယ်) ဟုသာ ဖော်ပြထားပြီး နိုင်ငံခြားရေး ၀န်ကြီး အဖြစ် တာဝန်ထမ်းဆောင်ခဲ့ကြောင်း ဖော်ပြခြင်း မရှိပေ။ဦးဝင်းအောင်သည် ယခင် ထောက်လှမ်းရေးအကြီးအကဲ ဒုတိယ ဗိုလ်ချုပ်ကြီး ခင်ညွန် ၏ လက်ရုံးတဆူ ဖြစ်ခဲ့သည်။ ဒုတိယ ဗိုလ်ချုပ်ကြီး ခင်ညွန့်သည် အစိုးရအဖွဲ့ အတွင်း အခက်အခဲများနှင့် ရင်ဆိုင်နေရကြောင်း ၂၀၀၄ခုနှစ် ဇူလိုင်လက အင်ဒိုနီးရှားနိုင်ငံတွင် ကျင်းပသည့် အာဆီယံ အစည်းအဝေး တက်ရောက်စဉ် ပြောဆိုခဲ့သည်။
၂၀၀၄ခုနှစ် စက်တင်ဘာလတွင် စစ်အစိုးရက သူနှင့် နိုင်ငံခြားရေး ဒုဝန်ကြီး ဦးခင်မောင်ဝင်းတို့ကို ရာထူးမှ အနားယူစေခဲ့သည်။ သူ၏ နေရာတွင် စစ်လေ့ကျင့်ရေးအရာရှိချုပ် ဗိုလ်ချုပ်ဉာဏ်ဝင်းဖြင့် အစားထိုးခဲ့သည်။
ထိုသို့ ဖြစ်ပျက်ခဲ့ပြီးနောက် အောက်တိုဘာလတွင် ဗိုလ်ချုပ်မှူးကြီး သန်းရွှေ နှင့် ဒု ဗိုလ်ချုပ်မှူးကြီး မောင်အေးတို့က ဗိုလ်ချုပ်ကြီးခင်ညွန်နှင့် စစ်ထောက်လှမ်းရေးအဖွဲ့ကို အရေးယူခဲ့သည်။ မူဆယ် ၁၀၅မိုင် အကောက်ခွန်ဂိတ် အရှုပ်တော်ပုံမှ စတင်ပြီး တပြည်လုံးရှိ ထောက်လှမ်းရေး အရာရှိ ကြီးငယ်များကို ထိန်းသိမ်းလိုက်ခြင်း ဖြစ်သည်။
ဦးဝင်းအောင်သည် ၂၀၀၄ခုနှစ်မှ ၂၀၀၆ခုနှစ် အထိ နေအိမ်အကျယ်ချုပ် ချခံခဲ့ရသည်။ ထို့နောက် အာဏာ အလွဲသုံးစားပြုမှုနှင့် ထောင်ဒဏ် ၇နှစ်ကျခံရပြီး အင်းစိန်ထောင်တွင် ချုပ်နှောင်ခံရကြောင်း သိရသည်။
၎င်းသည် ဦးနေ၀င်း၏ မြန်မာ့ဆိုရှယ်လစ်လမ်းစဉ်ပါတီက တိုင်းပြည်ကို အုပ်ချုပ်နေစဉ်ကာလအတွင်း ဗိုလ်မှူးချုပ်တင်ဦး ခေါင်းဆောင်သည့် ထောက်လှမ်းရေးအဖွဲ့ကြီးတွင် ဗိုလ်မှူးအဖြစ် တာဝန်ထမ်းဆောင်ခဲ့သည်။ မျက်မှန်တင်ဦးဟု လူသိများသော ဗိုလ်မှူးချုပ်တင်ဦး ရာထူးမှ ဖယ်ရှားခြင်းခံရသည့်အခါတွင် ဦးဝင်းအောင်သည် အာရှတိုက်နိုင်ငံများသို့ ကောင်စစ်ဝန်ချုပ်အဖြစ် ပို့ဆောင်ခံရသည်။ ဗြိတိန်နိုင်ငံ နှင့် ဂျာမနီနိုင်ငံတို့တွင် သံအမတ်ကြီးအဖြစ် တာဝန် ထမ်းဆောင်ခဲ့ပြီးနောက် ၁၉၉၈ခုနှစ်တွင် နိုင်ငံခြားရေး ၀န်ကြီး ဖြစ်လာသည်။
လက်ရှိ နိုင်ငံခြားရေးဝန်ကြီး ဦးဉာဏ်ဝင်းနှင့် မတူသည့် အချက်တခုမှာ ဦးဝင်းအောင်သည် နိုင်ငံခြားရေးဝန်ကြီး တာဝန် ထမ်းဆောင်စဉ်ကာလတွင် သတင်းမီဒီယာများနှင့် ဆက်ဆံရေး ပြေပြစ်သူတဦး ဖြစ်ပြီး၊ Time မဂ္ဂဇင်း အပါအ၀င် နိုင်ငံခြားမီဒီယာများ၏ တွေ့ဆုံမေးမြန်းမှုကို လက်ခံခဲ့ခြင်း ဖြစ်သည်။
“ကျနော်ကိုယ်တိုင် ဒီမိုကရေစီသမား တယောက်ပါ၊ ကျနော်ရော ကျနော့်ကလေးတွေပါ စစ်မှန်တဲ့ ဒီမိုကရေစီစနစ်ရဲ့ အောက်မှာ နေချင်ပါတယ်၊ ဒီလိုစိတ်ကူးမျိုး ဗိုလ်ချုပ်မှူးကြီးသန်းရွှေနဲ့ စစ်တပ်က တခြား ခေါင်းဆောင်တွေမှာလည်း ရှိပါတယ်”ဟု Time မဂ္ဂဇင်း နှင့် တွေ့ဆုံ မေးမြန်းခန်းတခုတွင် ပြောခဲ့သည်။
ဦးဝင်းအောင်သည် ဘာသာရေးစာပေများ နှင့် နိုင်ငံရေး ဆောင်းပါးများကို ရေးသားခဲ့သည်။ ၎င်း၏ ကလောင်အမည်မှာ စည်သူငြိမ်းအေး ဖြစ်သည်။
ဦးဝင်းအောင်တွင် သားသမီး ၃ ဦး၊ မြေး ၃ ဦး ရှိကြောင်း နာရေးကြော်ငြာတွင် ဖော်ပြထားသည်။ ဇနီးဖြစ်သူ၏ အမည်မှာ ဒေါ်စံယုံ ဖြစ်သည်။
သားအငယ်ဆုံးဖြစ်သူ ဦးသောင်းစုငြိမ်းသည် ရန်ကုန်အခြေစိုက် 7days ဂျာနယ်တွင် အယ်ဒီတာချုပ် အဖြစ် တာဝန်ယူနေကြောင်းသိရသည်။
| < Prev | Next > |
|---|
