လွန်ခဲ့သည့် ၂ ရက်က အဆိုတော် ချစ်ကောင်းအား ၎င်းနှင့်ပတ်သက်သည့် အမျိုးသမီးတဦးက ဓားဖြင့် ရန်ပြုသဖြင့် ညာဘက်ခြေထောက်တွင် ပြတ်ရှသည့်ဒဏ်ရာရရှိပြီး စိုးရိမ်ဖွယ်မရှိကြောင်းနှင့် ရန်ကုန်ဆေးရုံကြီးမှ ယနေ့ဆင်းမည်ဟု ဂီတအသိုင်းအ၀န်းက ပြောသည်။
အဆိုတော် ချစ်ကောင်း၏ ပရိသတ်တဦးက “ကြားရတာ စိတ်မကောင်းပါဘူး။ ချစ်ကောင်းက ဒီဘက်နောက်ပိုင်း ပွဲတွေမှာ အစီအစဉ်မှူးလဲ လုပ်သဗျ၊ သူက အသံသြဇာနဲ့ ဟန်ပန်တွေလဲ ကောင်းတယ်” ဟု ပြောသည်။
တခြား ပရိသတ်တဦးကလည်း “အနုပညာနယ်ပယ်မှာ ကြာရှည်ရပ်တည်နိုင်တဲ့ သူ့အစွမ်းအစ လေးကို သဘောကျပေမယ့် သူ့ ကိုယ်ရေးကိုယ်တာကိစ္စအတွက်တော့ အထူးတလည် မခံစားမိပါဘူး” ဟု ပြောသည်။
အခင်းဖြစ်ပွားမှုသည် အဆိုတော် ချစ်ကောင်း၏ ကိုယ်ရေးကိုယ်တာများနှင့် ပတ်သက်နေ သောကြောင့် အနုပညာ အသိုင်းအ၀န်းက အကျယ်တ၀င့် ပြောကြားခြင်း မရှိပေ။
အနုပညာအသိုင်းအ၀န်းနှင့် ရင်နှီးသူများက ဗိုလ်ချစ် ဟုခေါ်သော အဆိုတော် ချစ်ကောင်းသည် ၁၉၈၀ ကျော် ကာလများ ကတည်းက တေးရေး ၀င်းမင်းထွေး၏ ကော်ဖီခါးခါး တေးစီးရီးဖြင့် အောင်မြင်မှု ရရှိခဲ့သူ ဖြစ်သည်။
| < Prev | Next > |
|---|
