ကျပ် ၅၀ တန်၊ ၁၀၀ တန်၊ ၂၀၀ တန် အဖြစ် သုံးစွဲနေသည့် တိုကင်များကို ဇန်နဝါရီ ၁ ရက်နေ့က နယ်စပ်ဒေသ စစ်ဆေးရေးနှင့် ကွပ်ကဲရေး (နစက) ဒေသ (၆) လက်အောက်ခံ နယ်မြေ မောင်တောမြို့နယ် ကညင်တောရွာတွင် ဖမ်းမိခဲ့ခြင်းဖြစ်သည်။
အဆိုပါ ကျေးရွာနေ အထက်တန်းပြ ဆရာမ တယောက်က “ကညင်ချောင်း ရွာမှာ တိုကင် ၉ သိန်းကျော် ဖိုးလောက် အဖမ်းခံရလို့ တော်တော်လေး ဂယက်ရိုက်နေတယ်။ ကျမတို့ဆီမှာ အနုတ်မရှိတော့ ဒါကိုပဲ သုံးကြရတာ” ဟု ဆိုသည်။ကျပ်ငွေ အကြွေ ရှားပါးမှုကြောင့် မြန်မာ တပြည်လုံးရှိ ကုန်စုံဆိုင်၊ လက်ဘက်ရည်ဆိုင်၊ ကွမ်းယာဆိုင် အစရှိသော ဆိုင်များတွင် အကြွေအစား သကြားလုံး၊ တစ်ရှူးထုပ်၊ ဆေးလိပ်၊ ဘောလ်ပင်၊ ဖရောင်းတိုင် အစရှိသည်တို့ကို ပြန်အမ်း နေသည်မှာ ၁၀ စုနှစ် တခုခန့်ရှိပြီ ဖြစ်သည်။
မောင်တောမြို့နယ်တွင်လည်း ၂၀၀၇ ခုနှစ်ခန့်က စတင်ကာ သက်ဆိုင်ရာ ဈေးဆိုင်အမည်များဖြင့် တိုကင်များရိုက်နှိပ်၍ အကြွေအစား တွင်တွင်ကျယ်ကျယ် အသုံးပြုလာခဲ့ကြကြောင်း သိရသည်။
ယခုဖမ်းမိသွားသော တိုကင်လက်မှတ်များမှာ မောင်တောမြို့တွင်းရှိ ဈေးဆိုင်များတွင် လက်ရှိ အသုံးပြု နေသော တိုကင်များဖြစ်နေသောကြောင့် ပြည်သူများလက်ထဲတွင် လည်ပတ်နေသော တိုကင်များ အားလုံး သုံးမရဖြစ်သွားသည်ဟု မောင်တောမြို့မှ ဆရာတော် ဦးဝီရကမိန့်သည်။
“ပြန်လာဝယ်တဲ့ တိုကင်တွေက ဆိုင်တွေက တကယ် ထုတ်ပေးထားတာတွေလား၊ အတု လုပ်ထားတာလား ဆိုတာ စဉ်းစားစရာ ဖြစ်သွားတော့ ဆိုင်တွေက မယူရဲတော့ဘူး။ တကယ် အသုံးပြုနေပြီး လက်ထဲမှာ တိုကင်တွေ ကိုင်ထားတဲ့ ဒကာ၊ ဒကာမတွေ ဒုက္ခရောက်တာပေါ့” ဟု ဆရာတော်က ပြောသည်။
ယခု ဖမ်းဆီးရမိသည့် ကျပ် ၉ သိန်းကျော်ဖိုး တိုကင်များကို လူတဦးတည်းဆီမှ ဖမ်းဆီးရမိခဲ့ခြင်း ဖြစ်သည်။
မောင်တောမြို့တွင်သာမက တခြားသောမြို့များတွင်လည်း အကြွေရှားပါးမှုကြောင့် ဆိုင်ရှင်၏ လက်မှတ်နှင့် ငွေတန်ဖိုးရေးကာ တိုကင်အဖြစ် အသုံးပြုကြကြောင်း သိရသည်။
ငွေအကြွေရှားပါးမှုကြောင့် ပြန်အမ်းသည့် ပစ္စည်းများကို စားသုံးသူ တို့က လက်မခံချင်ကြသဖြင့် ထိုသို့ တိုကင် ပြုလုပ်ကာ ပြန်အမ်းခြင်း ကျယ်ပြန့်လာခြင်းဖြစ်သည်။ ကုန်စိမ်း ဆိုင်များတွင်မူ နံနံပင်၊ ငရုပ်သီးစိမ်း၊ ခရမ်းချဉ်သီးတို့ကို အကြွေအဖြစ် ပြန်အမ်းကြသည်။
တချို့သော ကုန်စုံဆိုင်၊ စားသောက်ဆိုင်နှင့် ကွမ်းယာဆိုင်တို့ကမူ ဝယ်နေကျ ဖောက်သည်ကို အကြွေ ပြန်မအမ်းတော့ဘဲ စာရင်းမှတ်ထားသည့် စနစ်နှင့် လည်ပတ်ကြသည်ဟု သိရသည်။
“ဥပမာ ၂၀၀ အမ်းရမယ်ဆိုရင် မအမ်းတော့ဘဲ နောက်တခါအတွက် ပေါင်းမှတ်ထားတာမျိုး၊ ဒါမှမဟုတ် စားသုံးသူဘက်က ပေးစရာကျန်တယ်ဆိုရင်လည်း အဲဒီလိုပဲ ဆိုင်ရှင်က မှတ်ထားလိုက်တာမျိုး လုပ်ကြတယ်” ဟု ရန်ကုန်မြို့နေ ကုမ္ပဏီ ဝန်ထမ်းတဦးက ပြောပြသည်။
စစ်အစိုးရက ၅၀၀ ကျပ်တန်၊ ၁၀၀၀ ကျပ်တန်နှင့် ၅၀၀၀ ကျပ်တန်များကိုသာ အသစ်ထုတ်လုပ်သော်လည်း ၅၀ ကျပ်၊ ၁၀၀ ကျပ်၊ ၂၀၀ ကျပ် အစရှိသည့် အကြွေများကို အသစ်ထုတ်လုပ်ခြင်း မရှိသောကြောင့် အကြွေရှားပါးသည့် ပြဿနာကို ရင်ဆိုင်နေကြရကြောင်း၊ ထိုသို့ အကြွေရှားပါးသည့် ပြဿနာကို မဖြေရှင်းနိုင်သေးကြောင်း ရန်ကုန် အခြေစိုက် သတင်းထောက်တဦးက သုံးသပ်သည်။
“ငွေအကြွေအစား ပစ္စည်းတွေကို ပြန်အမ်းတော့ စားသုံးသူက မလိုချင်တဲ့ပစ္စည်းအတွက်ပါ ငွေ အပိုကုန်ရသလိုဖြစ်တယ်၊ ပစ္စည်းအစား တိုကင်ကို အသုံးပြုပြန်တော့လည်း အလွယ်တကူ အတု လုပ်နိုင်တော့ ရောင်းတဲ့သူဘက်က ထိခိုက်တယ်” ဟု သူက ဆိုသည်။
ဘူးသီးတောင် မောင်တော နယ်စပ် စီးပွားရေးသတင်းများ ရေးသားနေသည့် ပြည်တွင်း သတင်းထောက် တဦးကလည်း တတိုင်းပြည်လုံးတွင် တိုကင်အသုံးပြုကာ မောင်တောမြို့နယ်ကဲ့သို့ ဖမ်းမိပြီး အသုံးမပြုခွင့် မရတော့လျှင် သာမန်ပြည်သူများ နစ်နာမည်ဟု ပြောသည်။
| < Prev | Next > |
|---|
