မိုးသက်လေပြင်းသည် ရှမ်းပြည်နယ် မူဆယ်ခရိုင် အတွင်းရှိ ကြူကုတ် (ပန်းဆိုင်း)၊ တာမိုးညဲ၊ လားရှိုး၊ ကွမ်းလုံ၊ မန္တလေး တိုင်း ညောင်ဦး၊ စစ်ကိုင်းတိုင်း အရာတော်မြို့နယ်နှင့် ချင်းပြည်နယ် တွန်းဇံမြို့များ၌ ပြီးခဲ့သည့် အင်္ဂါနေ့က တိုက်ခတ်ခဲ့ခြင်း ဖြစ်သည်။
လားရှိုးမြို့နယ် ပန်ဟုန်ရွာတွင်လည်း လေပြင်းတိုက်ခတ်ပြီး သစ်ပင်များ ပြိုလဲမှုကြောင့် သစ်ကိုင်းကျိုးပိ၍ ကလေးငယ် ၂ ဦး သေဆုံးပြီး ကလေး၂ ဦး ဒဏ်ရာ ရရှိခဲ့ကြောင်း၊ ယင်းမိုးသက်လေပြင်း တိုက်ခတ်ရာ မြို့နယ်များရှိ ဒေသခံ စုစုပေါင်း ၁၄ ဦး ဒဏ်ရာရရှိ ခဲ့ကြောင်း သတင်းစာ က ဖော်ပြထားသည်။
လားရှိုးမြို့မှ ဦးစိုင်းမြင့်မောင်က“လားရှိုးမြို့ပေါ်မှာတော့ အများကြီးတော့ မဟုတ်ဘူး၊ မိုးလေကျပြီးတော့ ၁၀ မိနစ်လောက်ပါပဲ၊ ခြံထဲမှာ အပင်လေး နည်းနည်းပါးပါး ကျိုးတယ်၊ လမ်းတွေမှာ အပင်တွေ ကျိုးတယ်၊ ဒါလောက်ပါပဲ”ဟု ဧရာဝတီသို့ ပြောပြသည်။
ယင်း မိုးသက်လေပြင်း တိုက်ခတ်သောကြောင့် အဆောက်အအုံ တချို့ အမိုးလန်ခြင်း၊ သစ်ပင်များပြိုလဲခြင်း နှင့် တယ်လီဖုန်းတိုင် ပြိုလဲပြတ်တောက်ခြင်းများ ဖြစ်ပွားခဲ့ပြီး ဒဏ်ရာရသူများမှာ သက်ဆိုင်ရာ မြို့နယ်ရှိ ဆေးရုံများတွင် ဆေးကုသမှု ခံယူလျက် ရှိ ကြောင်း သိရသည်။
အလားတူပင် ယခုလ ၁၆ ရက်နေ့ (သင်္ကြန် အတက်နေ့)တွင်လည်း မိုးသက်လေပြင်း တိုက်ခတ်ခဲ့သည့် အတွက် မန္တလေးမြို့ ကျုံးမြောက်ဘက်ခြမ်းရှိ ရေကစား မဏ္ဍပ်တချို့ ပြိုကျပျက်စီးခဲ့သည်။
ထို လေပြင်း တိုက်ခတ်မှုမှာ ၁၀မိနစ်ခန့်သာ ကြာမြင့်သော်လည်း မန္တလေးနန်းတွင်း၏ မြောက်ဘက်ခြမ်းရှိ မဏ္ဍပ် ၁၄ ခုခန့် ပျက် စီးသွားကြောင်း၊ အလုပ်သမားဆေးရုံကြီးရှေ့ရှိ ကျန်းမာရေးဝန်ကြီးဋ္ဌာန မဏ္ဍပ် နှင့် တခြားသော မဏ္ဍပ်တခုတို့ ပြိုကျသွား ကြောင်း မန္တလေးမြို့ခံများက ပြောသည်။
| < Prev | Next > |
|---|
