အရှင်ပညာစာရကို သြဂုတ်လ ၆ ရက်နေ့တွင် ပထမအကြိမ် ရုံးထုတ်ခဲ့ပြီး ဒုတိယအကြိမ်အဖြစ် သြဂုတ်လ ၁၆ ရက်ကို သတ်မှတ်ခဲ့သော်လည်း အကြောင်းကြောင်းကြောင့် ၁၇ ရက်နေ့သို့ ရွှေ့ခဲ့ခြင်း ဖြစ်ကြောင်း သိရသည်။“ပထမအကြိမ် ရုံးထုတ်တုန်းကတော့ များများ မေးမြန်းစစ်ဆေးတာ မလုပ်ခဲ့ပါဘူး။ ဒုတိယ အကြိမ်မှာတော့ တရားလိုပြ သက်သေ နှစ်ယောက်ကို စစ်ဆေးပါတယ်။ ဆရာတော်ကတော့ သူ့အပေါ်စွဲထားတဲ့ အမှုတွေကို ငြင်းပါတယ်” ဟု တရားခွင်သို့ သွားရောက် နားထောင်ခဲ့သူတဦးက ဧရာဝတီသို့ ပြောသည်။
အရှင်ပညာစာရအား တရားစွဲထားသည့် အမှုပေါင်း ၇ ခုတွင် ပုဒ်မ ၄၂၀ လိမ်လည်မှု၊ ပုဒ်မ ၂၉၅ (က) ဘာသာသာသနာ ညှိုးနွမ်းစေမှု၊ ပုဒ်မ ၄၀၆ ယုံကြည်အပ်နှံထားသည့် ပစ္စည်းကို အလွဲသုံးစားမှု၊ ပုဒ်မ ၅၀၅ နိုင်ငံတော် တည်ငြိမ်ရေးကို ထိပါးနှောင့်ယှက်မှု၊ ပုဒ်မ ၂၉၂ သာသနာ့နယ်မြေကို အခကြေးငွေဖြင့် ငှားရမ်းအသုံးပြုမှု၊ နိုင်ငံခြားငွေ လဲလှယ်ရေး အက်ဥပဒေ ပုဒ်မ ၂၄ (၁)၊ စည်ပင်သာယာ အက်ဥပဒေ ပုဒ်မ ၆၁ (ဂ) စသည့် ပုဒ်မ တို့ဖြင့် စွပ်စွဲကာ အစိုးရက တရားလိုလုပ်၍ တရားစွဲဆိုထားကြောင်း ဒေသခံရှေ့နေတဦးက ပြောသည်။
အရှင်ပညာစာရကို တရားရုံးထုတ်ချိန်တွင် လုံခြုံရေး တင်းကျပ်စွာချထားကြောင်း၊ နောက်ထပ် ရုံးထုတ်မည့်ရက်မှာ သြဂုတ်လ ၂၄ ရက်နေ့ သို့မဟုတ် လကုန်တွင် ဖြစ်နိုင်ကြောင်း၊ အမှုကို ရေရှည် အချိန်ဆွဲထားမည့်သဘော မတွေ့ရကြောင်း တရားရုံးနှင့် နီးစပ်သူတဦးက ပြောသည်။
အရှင်ပညာစာရကို စစ်တွေခရိုင် ဒုတိယတရားသူကြီး ဒေါ်ဝါ၀ါထွန်း ဦးဆောင်၍ တရားလိုဘက်မှ ဦးထွန်းသိန်းနှင့် ဒေါ်မာလာ ဆိုသူ နှစ်ဦးတို့ကို စစ်ဆေးမေးမြန်းခဲ့သည်ဟု တရားခွင်သို့ တက်ရောက်ခဲ့သူက ပြောသည်။
အရှင်ပညာစာရအား တရားလိုလုပ်၍ ဦးဆောင်တရားစွဲဆိုရာတွင် အစိုးရရှေ့နေများ ပါဝင်ပြီး ဆရာတော်ဘက်မှ ရှေ့နေ ဒေါ်အေးနုစိန်က လိုက်ပါဆောင်ရွက်ကြောင်း သိရသည်။
အရှင်ပညာစာရဘက်မှ လိုက်ပါ အကျိုးဆောင်ပေးသူ ရှေ့နေအပါအ၀င် နီးစပ်သူအားလုံးကို အာဏာပိုင်များက လိုက်လံစောင့် ကြည့်နေကြောင်း ဒေသခံများက ဆိုသည်။
အရှင်ပညာစာရကို ဇူလိုင်လ ၂၇ ရက်နေ့တွင် စစ်တွေ ခရိုင် ရဲမှူးကြီး ခင်မောင်ထွေး ဦးဆောင်၍ လာရောက်ဖမ်းဆီးပြီး စစ်တွေအမှတ် ၁ ရဲစခန်းတွင် လူဝတ်လဲ ချုပ်နှောင်ခဲ့သည်။ ထို့အပြင် ကျောင်းတိုက်တွင် လက်ခံစောင့်ရှောက်ထားသည့် မိဘမဲ့ကလေး ၁၀၀ ခန့်ကိုလည်း မကွေးတိုင်းနှင့် မန္တလေးတိုင်းများသို့ ပို့ဆောင်လိုက်သည်။
| < Prev | Next > |
|---|
