“ဒီလ ၆ ရက်နေ့က စပြီး ဘုရားသုံးဆူဂိတ်ကို ပြန်ဖွင့်တယ်။ အခုလို ဂိတ်ဖွင့်လိုက်တော့ ကျနော်တို့ ကုန်သည်တွေအတွက် ကောင်းတာပေါ့။ နယ်စပ်က လူတွေလည်း လွတ်လွတ်လပ်လပ် ဟိုဘက်ဒီဘက် သွားလာလို့ရတော့ အားလုံး အဆင်ပြေတယ်လေ။ မဟုတ်ရင် တရားမ၀င်လမ်းက နေ့တိုင်း သွားနေရတယ်” ဟု မွန်ကုန်သည်တဦးက ပြောသည်။
ထိုင်းနယ်ခြားစောင့် တပ်ဖွဲ့ဝင် ၂ ဦးကို နအဖနှင့် ငြိမ်းချမ်းရေး ယူထားသော တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA) တပ်ဖွဲ့ဝင်များက ဖမ်းဆီးခေါ်ဆောင်သွားပြီးနောက် ဘုရားသုံးဆူဂိတ်ကို ပိတ်ထားခဲ့ခြင်းဖြစ်သည်။
ယခုအခါ မနက် ၆ နာရီမှ ညနေ ၆ နာရီအတွင်း နယ်စပ်ဖြတ်ကျော် သွားလာမှုကို ခွင့်ပြုထားကြောင်း ဒေသခံကုန်သည်များက ပြောသည်။
ဘုရားသုံးဆူဘက်မှ ပရိဘောဂ ကုန်ပစ္စည်းများ ထိုင်းဘက်သို့ အဓိက တင်သွင်းပြီး ထိုင်းဘက်မှ စားသောက်ကုန်များနှင့် အ၀တ်အထည်များကို အဓိက တင်ပို့သည်ဟု သိရသည်။
“လူတယောက်ဆိုရင် ဘတ် ၅၀၊ ကားတစီးဆိုလည်း ဘတ် ၅၀ စီ ပေးရတယ်။ ကုန်ဖိုးကလည်း အလေးချိန်နဲ့ ပေးရတယ်။ ထိုင်းဘက်က ဝင်လာတဲ့ နိုင်ငံခြားသားတွေက ဘုရားသုံးဆူဈေးအထိ လာလည်လို့ရတယ်” ဟု ဒေသခံတဦးက ဆိုသည်။
ယခု ဘုရားသုံးဆူဂိတ်ကို ဖွင့်လှစ်ခြင်းနှင့် ပတ်သက်၍ ထိုင်းထောက်လှမ်းရေး အဖွဲ့ဝင်တဦးက “အခု ဖွင့်တာက ဘုရားသုံးဆူက ဗျူဟာမှူးနဲ့ ထိုင်းနယ်စပ် ကော်မတီတို့ ညှိပြီးဖွင့်တာဆိုတော့ ဘယ်လောက် ကြာကြာဖွင့်မလဲဆိုတာ စောင့်ကြည့်ရမယ်။ ဘာဘဲပြောပြော အခုလို ပိတ်ထားတဲ့ ဂိတ်တခု ပြန်ပွင့်လာတာတော့ နှစ်နိုင်ငံ နယ်စပ်က လူတွေအတွက် ကောင်းတယ်လို့ ကျနော်မြင်ပါတယ်” ဟု ပြောသည်။
ယခုနှစ် နိုဝင်ဘာလ ၇ ရက်နေ့မှ စတင်၍ နိုဝင်ဘာ လလယ်အထိ ဘုရားသုံးဆူမြို့နယ်တွင် နယ်ခြားစောင့်တပ် ဖွဲ့ရေးကို လက်မခံသည့် DKBA တပ်များနှင့် နအဖ စစ်အစိုးရတပ်များ တိုက်ပွဲဖြစ်ပွားခဲ့ပြီး ဒေသခံများ ထောင်ချီ၍ ထိုင်းဘက်နှင့် ပြည်တွင်းရှိ နီးစပ်ရာမြို့များသို့ ထွက်ပြေးမှုများ ရှိခဲ့သည်။
နိုဝင်ဘာ လကုန်ပိုင်းတွင်မူ အခြေအနေ ပြန်လည် တည်ငြိမ်လာခဲ့ကြောင်း စောင့်ကြည့်လေ့လာသူများက ပြောသည်။
| < Prev | Next > |
|---|
