စစ်အစိုးရက နိုင်ငံရေး အကျဉ်းသားများကို ကြီးလေးသည့် ပြစ်ဒဏ်များ ချမှတ်နေခြင်းနှင့် နိုင်ငံရေး အမှုလိုက် ရှေ့နေများကို ဖမ်းဆီးထောင်ချ နေခြင်းတို့သည် နိုင်ငံတွင်း တရားဥပဒေ စိုးမိုးမှု မရှိခြင်းပင် ဖြစ်ကြောင်း ဒေါ်အောင်ဆန်း စုကြည်က မစ္စတာ ဂန်ဘာရီအား ပြောကြားလိုက်သည်ဟု အမျိုးသား ဒီမိုကရေစီအဖွဲ့ချုပ် (အန်အယ်လ်ဒီ) ပြောခွင့်ရ ပုဂ္ဂိုလ် ဦးဉာဏ်ဝင်းကို ကိုးကား၍ ရန်ကုန်မြို့ရှိ သံတမန် အသိုင်းအ၀န်းက ပြောသည်။စစ်အစိုးရက မကြားသေးခင်ကပင် နိုင်ငံရေး လှုပ်ရှားသူများနှင့် ဧရာဝတီ မြစ်ဝကျွန်းပေါ်ဒေသ နာဂစ် မုန်တိုင်း ဒုက္ခသည်များကို အကူအညီ ပေးနေသူများအား ကြီးလေးသည့် ထောင်ဒဏ်များ ချမှတ်ခဲ့သည်။
ယမန်နေ့က အစိုးရ ဧည့်ဂေဟာ၌ ဒေါ်အောင်ဆန်း စုကြည်နှင့် တွေ့ဆုံရာတွင် မြန်မာနိုင်ငံ၏ လက်ရှိ နိုင်ငံရေး အခြေအနေများကို ဒေါ်အောင်ဆန်း စုကြည် သိရှိနေခြင်း အတွက် ကမ္ဘာ့ကုလသမဂ္ဂ အထွေထွေ အတွင်းရေးမှူးချုပ်၏ မြန်မာနိုင်ငံဆိုင်ရာ အထူးအကြံပေး အရာရှိ မစ္စတာ အီဗရာဟင် ဂန်ဘာရီက များစွာအံ့အားသင့်သွားခဲ့ ကြောင်းလည်း ရန်ကုန်မြို့မှ အနောက်တိုင်း သံတမန် တဦးကပြောဆိုသည်။
“ဒေါ်အောင်ဆန်းစုကြည်ဟာ လက်ရှိအခြေအနေတွေကို အများကြီး သိနေပါတယ်” ဟု ၎င်း အနောက်တိုင်း သံတမန်က ပြောသည်။
ဒေါ်အောင်ဆန်းစုကြည်သည် နိုင်ငံရပ်ခြားမှ ထုတ်လွှင့်သည့် ရေဒီယို အစီအစဉ်များကို နားထောင်လေ့ရှိကြောင်း နှင့် ကျန်းမာရေးလည်း ကောင်းမွန်ကြောင်း ၎င်းက ထည့်သွင်း ပြောကြားသည်။
မြန်မာနိုင်ငံ အမှန်တကယ် ပြုပြောင်းလဲရေးအတွက် ကုလသမဂ္ဂ၏ ဆောင်ရွက်ချက်များ ပျက်ကွက်သည့်အပေါ် အားမလိုအားမရ ဖြစ်မှုကိုလည်း မစ္စတာ ဂန်ဘာရီနှင့် တွေ့ဆုံစဉ်၌ ဒေါ်အောင်ဆန်းစုကြည်က အထင်အရှားဖော် ပြခဲ့ကြောင်းလည်း သိရသည်။
အန်အယ်လ်ဒီ ခေါင်းဆောင်များ ဖြစ်သော ဦးအောင်ရွှေ၊ ဦးညွန့်ဝေ၊ ဦးသန်းထွန်း၊ ဦးစိုးမြင့်၊ ဦးလှဖေနှင့် ဒေါ်အောင် ဆန်းစုကြည်တို့သည် ယမန်နေ့က မစ္စတာ ဂန်ဘာရီနှင့် အစိုးရ ဧည့်ဂေဟာ၌ တချိန်တည်း အတူတကွ တွေ့ဆုံခဲ့ ပြီး တွေ့ဆုံချိန် တနာရီခွဲခန့် ကြာမြင့်ခဲ့သည်။
ထို့အပြင် မစ္စတာ ဂန်ဘာရီသည် ရှမ်းအမျိုးသား ဒီမိုကရေစီအဖွဲ့ချုပ် (အက်စ်အန်အယ်လ်ဒီ) ကိုယ်စားလှယ်များနှင့်လည်း တွေ့ဆုံကြောင်း သိရသည်။
ကုလသမဂ္ဂ၏ ထုတ်ပြန်ချက်တွင် “မစ္စတာ ဂန်ဘာရီသည် ယခု မြန်မာနိုင်ငံသို့ ရောက်ရှိချိန်မှ စတင်၍ အတိုက်အခံ နိုင်ငံရေး ပါတီအဖွဲ့ဝင်များ အပါအ၀င် တခြားသော နိုင်ငံရေးပါတီများ၊ ပြောဆိုဆွေးနွေး သင့်သူများနှင့် ကျယ်ကျယ်ပြန့်ပြန့် တွေ့ဆုံကြောင်း” ဖော်ပြထားသည်။
| < Prev | Next > |
|---|
