အဆိုပါ အဆောက်အဦးကို သီလဝါ ရေတပ် သင်္ဘောကျင်း၏ ဘယ်ဘက်ကပ်လျက်တွင် ဆောက်နေကြောင်း သင်္ဘောကျင်း ဆောက်လုပ်ရေးတွင် ပါဝင်နေသူ တဦးနှင့် နီးစပ်သူတဦးက ပြောသည်။
အဆိုပါ ဆောက်လုပ်ရေး လုပ်ငန်းတွင် မြန်မာအင်ဂျင်နီယာ များနှင့်အတူ မြောက်ကိုရီးယား အင်ဂျင်နီယာများပါ ပါဝင် ဆောက်လုပ်နေကြောင်း သိရသည်။
စစ်အစိုးရ လက်ထက်ကတည်းက စတင် ဆောက်လုပ်နေခြင်းဖြစ်ပြီး အစိုးရအပြောင်းအလဲတွင် လုပ်ငန်းကို ခေတ္တ ရပ်ထားခဲ့ကြောင်း၊ ယခုအခါ လူအင်အား၊ စက်အင်အားများနှင့် နေ့ဆိုင်း ညဆိုင်းခွဲကာ ဆက်လက် ဆောက်လုပ် နေကြောင်း ဆောက်လုပ်ရေး လုပ်ငန်းတွင် ပါဝင်သူနှင့် နီးစပ်သူက ဆိုသည်။
“မြေတူး၊ မြေသယ်စက်ကြီးတွေ ၄၊ ၅ လုံးလောက်နဲ့ ညဘက်ဆို မီးတွေထွန်းပြီး လုပ်နေတာပဲ။ အဲဒီစက်ကြီးတွေ ငှားခက တနေ့ကို တခုအတွက် ကျပ် သိန်း ၅၀ လောက်ပေးရတယ်” ဟု ၎င်းက ဆက်ပြောသည်။
ယခုလက်ရှိတွင် အဆောက်အအုံ သက်သက်ကိုသာ ဆောက်လုပ်နေခြင်း ဖြစ်ပြီး ပြင်ပမှ ကြည့်လျင် သာမန် ဆောက်လုပ်ရေး လုပ်ငန်းခွင် အတိုင်းပင်ဖြစ်ကြောင်း၊ အင်ဂျင်နီယာများ အပါအဝင် လခစားဝန်ထမ်း ၂၀၀ နှင့် နေ့စားဝန်ထမ်း ၅၀၀ ကျော်တို့ အလုပ်လုပ်နေကြကြောင်း၊ အဆောက်အအုံမှာ အစိမ်းရောင်ဖြစ်၍ အတွင်း၌ သင်္ဘော ၂ စီးစာ နေရာရှိကြောင်း၊ အလယ်တွင် လျှောက်လမ်းတခု ရှိကြောင်း၊ အဆောက်အအုံထဲမှ ရထားသံလမ်းကဲ့သို့သော သံလမ်းတခု ထုတ်ထားပြီး အဆိုပါ သံလမ်းကို ရေထဲသို့ ချထားကြောင်း မျက်မြင် တွေ့ခဲ့သည့် သူကပြောသည်။
အဆောက်အအုံမှာ အပေါက် ၂ ပေါက် ပါရှိပြီး တပေါက်လျှင် ပေ ၂၀ ခန့်ရှိကြောင်း၊ တံခါးက အဖြူရောင်တပ်ထားပြီး ထို အပေါက်များထဲမှ သံလမ်း ၂ ခုသည် ရေထဲသို့ ဆင်းသွားကြောင်း၊ အင်ဂျင်နီယာများက ရေငုပ်သင်္ဘောကို “ငှက်ပျောဖူး” ဟု စကားဝှက်နှင့် ပြောကြောင်း မြောက်ကိုရီးယား အင်ဂျင်နီယာများကိုပါ တွေ့ခဲ့သော သူက ဆိုသည်။
ဆောက်လုပ်ရေး လုပ်ငန်းများကို ရေထဲတွင် လုပ်ကိုင်ရသောကြောင့် ဝန်ထမ်းများက ရှင်ဥပဂုတ္တ ဖောင်မျှောခြင်း၊ ရေငန်ပိုင် ဦးရှင်ကြီး တင်ချင်း စသည့် ရိုးရာ နတ်တင်ခြင်းများ ပြုလုပ်ကြရာ မြောက်ကိုရီးယား အင်ဂျင်နီယာများပါ လိုက်ပါ လုပ်ဆောင်သည်ဟု သိရသည်။
ယခုလက်ရှိ အဆောက်အအုံပိုင်းကိုသာ လုပ်ဆောင်နေခြင်းဖြစ်ပြီး ပြင်ပ အဆောက်အအုံ ပြီးသွားပါက ဝန်ထမ်းအားလုံး ဖယ်ပေးရမည် ဖြစ်ကြောင်း၊ ရေငုပ်သင်္ဘော ဆောက်လုပ်ရန် နောက်ထပ် တဖွဲ့ လာရောက်မည်ဖြစ်ကာ ထိုအချိန်တွင် ထိုနေရာကို အဝင်အထွက် အားလုံး ရှင်းလင်း ပိတ်ဆို့လိုက်တော့မည် ဖြစ်ကြောင်း အင်ဂျင်နီယာ တဦး၏ ပြောဆိုချက်ကို ကိုးကား၍ ၎င်းနှင့်နီးစပ်သူက ပြောပြသည်။
လောလောဆယ် အဆောက်အအုံ၏ အနောက်ဘက်ကို ဖွင့်ထားကြောင်း၊ အထဲတွင် သံငြမ်းများကိုလည်း တွေ့ရကြောင်း ၎င်း၏ ပြောဆိုချက်အရ သိရသည်။
မြန်မာ့ တပ်မတော် (ရေ) သည် ၁၉၈၈ ခုနှစ်နောက်ပိုင်းတွင် တပ်မတော် ကြည်း၊ လေ တို့နှင့်အတူ အင်အားဖြည့်ဆည်းမှုများ ပြုလုပ်ခဲ့သည်ကို တွေ့ရသည်။
မြန်မာ့တပ်မတော်အကြောင်း လေ့လာရေးသားခဲ့သည့် မောင်အောင်မျိုး၏ “တပ်မတော်ကို တည်ဆောက်ခြင်း” ဆိုသည့် စာအုပ်တွင် တပ်မတော် (ရေ) သည် “ရေညိုမှသည် ရေပြာသို့” ဆိုသည့် ဆောင်ပုဒ်အတိုင်း ပင်လယ်သွား သင်္ဘောများအား ကိုယ်တိုင် တည်ဆောက်ရန်အထိ ရည်မှန်းထားကြောင်း ရေးသားထားသည်။
တပ်မတော် (ရေ) တွင် ပေါ့ပါးသွက်လက်သည့် လှည့်ကင်း စစ်သင်္ဘော (Frigates) များ၊ အကြီးစား သင်္ဘော (အရှည် ၇၅ မီတာနှင့် အထက် corvettes) များ တည်ဆောက်ရေးနှင့် နည်းပညာပိုင်းကိုပါ ဖြည့်ဆည်းနေကြောင်းလည်း သိရသည်။
၂၀၀၀ ပြည့်နှစ်မှ စတင်၍ တပ်မတော် (ရေ) ၏ အကြီးစား စစ်သင်္ဘောတည်ဆောက်ရေး စီမံကိန်းများကို စတင် အကောင် အထည် ဖော်ခဲ့ရာ ၎င်းနှစ် စက်တင်ဘာလ၌ ၇၇ မီတာ (၂၅၂ . ၆၂ ပေ) ရှည်သည့် UMS 771 အမျိုးအစား စစ်သင်္ဘောကြီး တစင်းကို ပြည်တွင်း၌ပင် တည်ဆောက်ခဲ့သည်။ ၎င်းသင်္ဘောကို အနော်ရထာဟု အမည်ပေးခဲ့ကြောင်း မောင်အောင်မျိုးက ရေးသားထားသည်။ အဆိုပါ စစ်သင်္ဘောတွင် အသုံးပြုသော လက်နက်ကိရိယာများနှင့် ရေဒါ စနစ်များမှာ တရုတ်ပြည်ဖြစ် များဖြစ်ကြောင်းလည်း ၎င်းစာအုပ်ကဆိုသည်။
ဒုတိယမြောက် တည်ဆောက်သည့် ရေယာဉ်မှာ UMS 772 သင်္ဘောကြီး အမျိုးအစားပင်ဖြစ်ပြီး ၂၀၀၁ ခုနှစ်က စတင် အသုံးပြုခဲ့သည်။ ၂၀၀၅ ခုနှစ်က တတိယမြောက် စစ်သင်္ဘော UMS 773 ကိုတည်ဆောက် ခဲ့ပြီး ယခုလက်ရှိတွင် ပေါ့ပါး မြန်ဆန်သည့် ကင်းလှည့်ရေယာဉ်အမျိုးအစား F – 108 ကိုတည်ဆောက်နေသည်။
၎င်းအပြင် ဒုံးပျံ ဆင်ထားသည့် စစ်ရေယာဉ်များကိုလည်း တရုတ်နှင့် ယူဂိုဆလားဗီးယား နိုင်ငံများမှ ဝယ်ယူခဲ့ကြောင်း လေ့လာသူတို့၏ အဆိုအရ သိရသည်။
ကာကွယ်ရေးဦးစီးချုပ်နှင့် စစ်တပ်သည် ၂၀၁၁-၂၀၁၂ ဘဏ္ဍာရေးနှစ် အစိုးရ အသုံးစရိတ်စုစုပေါင်းမှ ကာကွယ်ရေး အသုံးစရိတ်အဖြစ် ၂၅ ရာခိုင်နှုန်းကျော် သုံးစွဲလိမ့်မည် ဖြစ်သည်။ မတ်လ ၁ ရက်နေ့က ထုတ်ပြန်သည့် နိုင်ငံတော် ပြန်တမ်းအရ ယခုဘဏ္ဍာရေးနှစ်အတွက် လျာထားချက်တွင် စစ်သုံးစရိတ်မှာ ကျပ် ၁.၈ ထရီလီယံ (အမေရိကန် ဒေါ်လာ သန်း ၂ ထောင်) ဖြစ်ပြီး စုစုပေါင်း ဘတ်ဂျက်၏ ၂၃.၆ ရာခိုင်နှုန်းအထိ ရှိသည်။
၂၀၀၈ ခုနှစ် နိုဝင်ဘာလအတွင်းက စစ်အစိုးရ တပ်မတော် ကြည်း၊ ရေ၊ လေ ကွပ်ကဲရေးမှူးအဖြစ် တာဝန်ယူခဲ့သူ ဗိုလ်ချုပ်ကြီးဟောင်း၊ လက်ရှိ လွှတ်တော်ဥက္ကဋ္ဌ သူရဦးရွှေမန်းသည် မြောက်ကိုရီးယားနိုင်ငံသို့ သွားရောက် လည်ပတ်ကာ စစ်ရေးအတွက် အရေးပါသည့် ထုတ်လုပ်မှုများအား လေ့လာခဲ့စဉ် မြောက်ကိုရီးယား ရေတပ်ကိုလည်း သွားရောက်ခဲ့ သေးကြောင်း ပေါက်ကြားခဲ့သည့် လျှို့ဝှက် အစီအရင်ခံစာတွင် ပါရှိသည်။
ယခုနှစ် ဇွန်လအတွင်းကလည်း စစ်လက်နက် ပစ္စည်းများ တင်ဆောင်၍ မြန်မာပြည်သို့ ဦးတည် လာနေသည့် မြောက် ကိုရီးယား သင်္ဘောတစင်းကို အမေရိကန် ရေတပ်က တားမြစ်သဖြင့် လာလမ်းအတိုင်း ပြန်လှည့်သွားခဲ့ရသည်။ ၂၀၀၉ ခုနှစ်က မြန်မာရေပိုင်နက်ကို ဦးတည်လာခဲ့သော မြောက်ကိုရီးယားသင်္ဘော Kang Nam (1) သည် အမေရိကန် ရေတပ်က နောက်ယောင်ခံ ဖိအားပေးခဲ့ပြီးနောက် မိခင်နိုင်ငံဘက်သို့ ပြန်လည်လှည့်ပြန် သွားခဲ့ဖူးသည်။
၂၀၀၇ ခုနှစ် ဧပြီလက မြန်မာနှင့်မြောက်ကိုရီးယားနိုင်ငံတို့ ၂ နိုင်ငံဆက်ဆံရေး ပြန်လည်ထူထောင်ပြီး လပိုင်း အကြာတွင် မြောက်ကိုရီးယားသင်္ဘောတစင်းသည် မြန်မာနိုင်ငံ သီလ၀ါ နိုင်ငံတကာ ဆိပ်ကမ်း (MITT) သို့ ဆိုက်ရောက် လာခဲ့ဖူးသည်။
မြန်မာနှင့် မြောက်ကိုရီးယားအစိုးရတို့သည် ၁၉၈၃ ခုနှစ်က သံတမန် ဆက်ဆံရေး ရပ်ဆိုင်းခဲ့သည်။ ထိုနှစ်က မြန်မာနိုင်ငံသို့ အလည်လာရောက်သော တောင်ကိုရီးယား သမ္မတ ချန်ဒူးဝမ် နှင့်အဖွဲ့အား ရန်ကုန်မြို့ အာဇာနည် ဗိမာန်တွင် မြောက် ကိုရီးယား ကွန်မန်ဒိုတို့က ဗုံးခွဲတိုက်ခိုက်ရာ သမ္မတ ချန်ဒူးဝမ် သေဆုံးခြင်း မရှိသော်လည်း ၀န်ကြီး ၄ ဦး အပါအ၀င်၂၁ ဦး သေဆုံးပြီး နောက်ပိုင်း သံတမန် ဆက်ဆံရေး ရပ်သွားခြင်း ဖြစ်သည်။
ထိုကဲ့သို့ မြန်မာနှင့် မြောက်ကိုရီးယားတို့သည် ၂ နိုင်ငံ သံတမန် ပုံမှန် ဆက်ဆံရေး ရပ်ဆိုင်းခဲ့ရာမှ မကြာသေးသော နှစ်များ အတွင်း တိတ်တဆိတ် ဆက်ဆံရေးများ ပြုလုပ်လာခဲ့ကာ ပြီးခဲ့သည့် ၂၀၀၇ ခုနှစ် ဧပြီလတွင် တရားဝင် ဆက်ဆံရေး ပြန်လည် စတင်ခဲ့သည်။
| < Prev | Next > |
|---|
