“ကျနော်တို့ကတော့ တော်တော်လေးကို စိုးရိမ်တယ်။ ဘာဖြစ်လို့လဲဆိုတော့ သူတို့ကို အဆက်အသွယ် မရတော့ဘူး၊ စခန်း တခုကို ပြောင်းသွားပြီ ဆိုရင် တာဝန်ရှိသူတွေ အချင်းချင်းတော့ ပြောမှာပဲ။ အဲဒီ အခါကျရင် ပြောင်းသွားတဲ့ လူတွေ ကတော့ ပိုပြီးတော့ အဖိနှိပ်ခံရမှာပဲ” ဟု မျိုးချစ်လူငယ်များ အဖွဲ့ မှ တာဝန်ခံတဦးဖြစ်သူ ကိုအောင်နိုင်သူက ဧရာဝတီသို့ ပြောသည်။
အဆိုပါ Kajang မြို့နယ်၊ Semenyih အရပ် လူဝင်မှုကြီးကြပ်ရေးဌာန (လဝက) အချုပ်ခန်းတွင် ရှိသော မြန်မာပြည်သား ၅၉၈ ဦး မည်သည့် ဒေသသို့ ရောက်ရှိသွားမည်ကို မသိရသေးဟု ဆိုသည်။
နေရာသစ်သို့ ရောက်ရှိပြီး ၎င်းတို့နှင့် အဆက်အသွယ် ပြတ်သွားပါက လူ့အခွင့်အရေး ချိုးဖောက်မှု အခြေအနေများကို သိရတော့မည် မဟုတ်ဟု ကိုအောင်နိုင်သူက ပြောသည်။
ယခုလ ၁ ရက်နေ့က Semenyih စခန်းတွင် မြန်မာ အလုပ်သမားများ ဆန္ဒပြကြရာ အာဏာပိုင်တို့က အကြမ်းဖက် နှိမ်နှင်းလိုက်သည် ဟူသော သတင်းများလည်း ထွက်ပေါ်ခဲ့သည်။ ထိန်းသိမ်းခံနေရသူများထဲတွင် ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး (UNHCR) က ဒုက္ခသည်အဖြစ် အသိအမှတ် ပြုထားသူတချို့လည်း ပါဝင်သည်။
၎င်း ထိန်းသိမ်းရေး စခန်းမှ မကြာခင်ရက်ပိုင်းက လွက်မြောက်ခဲ့သူ ကိုသန့်ဇင်က မလေးရှား အာဏာပိုင်များ၊ UNHCR တာဝန်ရှိသူများ အနေဖြင့် ထိန်းသိမ်းခံနေရသူများကို အကူအညီ ပေးသင့်သည်ဟု ဆိုသည်။
“အရမ်း ဒုက္ခရောက်တယ်။ ကျနော်လည်း ကြုံတွေ့ ခဲ့ရလို့ သိတယ်။ နေမကောင်းဘူး ဆိုရင် ကျန်းမာရေး အတွက် ပြခွင့် မရှိဘူး။ သူတို့ ကျွေးတဲ့ အစားအစားတွေကလည်း အာဟာရ မဖြစ်ဘူး”ဟု ပြောသည်။
လွန်ခဲ့သည့် ၂ လ ကလည်း မလေးရှား အချုပ်ခန်းတခုတွင် ကြွက် ကြောင့် ဖြစ်ပွားသည့် အဖျားရောဂါ တမျိုးကြောင့် မြန်မာ အလုပ်သမား ၂ ဦး သေဆုံးသွားသည်။ ထိန်းသိမ်းခံရစဉ် အနိုင်ကျင့် နှိပ်စက်သည်ဟူသော သတင်းများလည်း မကြာခဏ ထွက်ပေါ်လျက်ရှိသည်။
“ပြီးခဲ့သည့် ၆ နှစ်အတွင်း ထိန်းသိမ်းခံရစဉ် သေဆုံးသွားသူ တရားမဝင် နိုင်ငံခြားသား အရေအတွက်မှာ ၁၃ဝဝ ရှိသည်” ဟု မလေးရှားနိုင်ငံထုတ် The Star သတင်းစာ အင်တာနက် စာမျက်နှာတွင် ၂ဝဝ၈ ခုနှစ် ဒီဇင်ဘာလ ၁၈ ရက်နေ့က ရေးသားထားသည်။
ဆင်းရဲသည့် အာရှနိုင်ငံများမှ အလုပ်သမား အများအပြား မလေးရှားနိုင်ငံတွင် သွားရောက် အလုပ် လုပ်ကိုင်လျက်ရှိသည်။ ထိုအထဲတွင် မြန်မာပြည်သား ၅ သိန်းခန့် ရှိမည်ဟု ခန့်မှန်းကြသည်။ နယ်စပ်မှ တရားမဝင် ဝင်ရောက်ပြီး အလုပ် ရှာဖွေသူများ ရှိသကဲ့သို့ အလုပ်သမား အေဂျင်စီများနှင့် ဆက်သွယ်ပြီး တရားဝင် သွားရောက်သူများလည်း ရှိနေသည်။
| < Prev | Next > |
|---|
