ထိုင်းနိုင်ငံတောင်ပိုင်း ဖူးကက် အပန်းဖြေစခန်း တနေရာတွင် ပြုလုပ်သော အရှေ့တောင်အာရှ နိုင်ငံများအသင်း (အာဆီယံ) အစည်းအဝေးတွင် မြန်မာနိုင်ငံအပြောင်းအလဲ ကိစ္စ နှင့် ပတ်သက်၍ ကဆစ် ဖိရုမ်း က သတင်းထောက်များ ကို ယမန်နေ့က ပြောကြားခဲ့ခြင်း ဖြစ်သည်။
“အာဆီယံ အဖွဲ့အနေနဲ့ ဒေသတွင်း လူ့အခွင့်အရေး အခြေအနေတွေကို တိုးတက်ဆောင်ရွက်နိုင်ဖို့ဆိုရင် မြန်မာနိုင်ငံမှာ အပြောင်းအလဲတွေ မဖြစ်မနေလုပ်ဖို့ လိုအပ်တယ်”ဟု အာဆီယံ နိုင်ငံခြားရေးဝန်ကြီးများစည်းဝေးပွဲ ဥက္ကဋ္ဌ ကဆစ် ဖိရုမ်းက ပြောသည်။
မြန်မာနိုင်ငံ အပြောင်းအလဲ အတွက် လိုလားသည့် အာဆီယံ နိုင်ငံခြားရေးဝန်ကြီးများ၏ ဆန္ဒများကို မြန်မာနိုင်ငံ ခြားရေး ၀န်ကြီး ဦးဉာဏ်ဝင်းသိအောင်လည်းပြောကြားခဲ့ကြောင်း ၎င်းက ဆိုသည်။
အာဆီယံနှင့် ဆွေးနွေးဖက်နိုင်ငံများ အစည်းအဝေးတွင် အမေရိကန် အပါအဝင်နိုင်ငံပေါင်း ၂၆ နိုင်ငံ တက်ရောက်မည် ဖြစ် ကြောင်း သိရှိရသည်။
အာဆီယံ အတွင်းရေးမှူးချုပ် ဆူရင် ပစ်ဆူဝမ် (Surin Pitsuwan) ကလည်း မြန်မာနိုင်ငံတွင် ပြုပြင်ပြောင်းလဲမှု ကိစ္စနှင့် ပတ်သက်၍ ဒေသ အဖွဲ့အစည်း၏ ဂုဏ်သိက္ခာကို ကျဆင်းစေကြောင်း ယမန်နေ့က သတင်းထောက်များကို ပြောကြားခဲ့သည်။
“မြန်မာနိုင်ငံ ပြဿနာ မဖြေရှင်းနိုင်သေးသရွေ့ အာဆီယံ အနေနဲ့ ကမ္ဘာကို ဆက်လက် ရှင်းပြနေရဦးမယ်” ဟု ဆူရင် ပစ်ဆူဝမ်က ဆို သည်။
ရန်ကုန်မြို့၊ အင်းစိန် အကျဉ်းထောင်အတွင်း တရားရင်ဆိုင်နေရသော ဒေါ်အောင်ဆန်းစုကြည်ကို အမြန်ဆုံး လွှတ်ပေးရန် အာဆီယံအဖွဲ့ အလှည့်ကျ ဥက္ကဌ တာဝန်ယူထားသည့် ထိုင်းနိုင်ငံက မေလအတွင်း ထုတ်ပြန်ကြေညာ၍ တောင်းဆိုခဲ့သည်။
အဆိုပါ တောင်းဆိုမှုကို မြန်မာစစ်အစိုးရက အာဆီယံ လုပ်ထုံးလုပ်နည်းနှင့် မညီသည့်အပြင် အကြောင်းအရာအားဖြင့် မှန်ကန်ခြင်း မရှိသောကြောင့် အာဆီယံဥက္ကဌ တာဝန်ယူထားသော ထိုင်းနိုင်ငံ၏ ကြေညာချက်ကို အလေးအနက် ကန့် ကွက်သည် ဟူ၍ တန်ပြန် ကြေညာခဲ့ရာမှ နှစ်နိုင်ငံ တင်းမာမှုများ ရှိခဲ့သည်။
ယခု အာဆီယံ အစည်းအဝေးတက်ရောက်နေသော နိုင်ငံခြားရေးဝန်ကြီး ဦးဉာဏ်ဝင်း ခေါင်းဆောင်သည့် မြန်မာ ကိုယ်စားလှယ် အဖွဲ့က သတင်းထောက်များကို ရှောင်ရှားနေသဖြင့် မြန်မာပြည် ဆိုင်ရာ မေးခွန်းများကို ထိုင်းနိုင်ငံ ခေါင်းဆောင်များကိုသာ အားကိုးနေရကြောင်း သတင်းထောက်များက ပြောသည်။
ထိုင်းဝန်ကြီးချုပ်၊ ထိုင်းနိုင်ငံခြားရေးဝန်ကြီးတို့နှင့် တွေ့ဆုံရာတွင် သတင်းထောက်များ မေးသည့် မေးခွန်း အားလုံးနီးပါး မှာ လည်း မြန်မာပြည် နိုင်ငံရေးအခြေအနေနှင့် မြန်မာစစ်အစိုးရ အကြောင်းများ ဖြစ်နေကြောင်းလည်း သိရသည်။
| < Prev | Next > |
|---|
