၎င်း လေဆင်နှာမောင်းမှာ သာကေတမြို့နယ်အတွင်းသို့ ဇူလိုင် ၂၀ ရက်နေ့၊ နေ့လယ် ၂ နာရီ ၃၀ ခန့်က ဝင်ရောက် တိုက်ခတ်ခဲ့ခြင်း ဖြစ်သည်။“လမ်းဆုံထိပ်က လေထိတဲ့ အိမ် ၄ လုံးစလုံး အမိုးတွေလန်ကုန်တယ်။ လူတွေတော့ ထိခိုက်ဒဏ်ရာရတာ မရှိဘူး၊ သေဆုံးတာလည်းမရှိဘူး” ဟု သန်လျင်တံတား အိမ်ရာဝန်းအတွင်း နေထိုင်သူတဦးက ပြောသည်။
အဆိုပါ အိမ်ရာဝန်းမှာ သန်လျင် - ရန်ကုန် တံတားဆောက်လုပ်ရေး ၀န်ထမ်းများအား ချထားပေးသော မြေနေရာဖြစ်ပြီး နေထိုင်သူ အများစုမှာ အစိုးရ၀န်ထမ်းများနှင့် အငြိမ်းစားများ ဖြစ်ကြောင်း သိရှိရသည်။
လေဆင်နှာမောင်းသည် အဆိုပါ အိမ်ရာဝန်းအတွင်း တိုက်ခတ်ခဲ့ပြီး ကြယ်ငါးပွင့် သင်္ဘောကျင်း အနောက်၊ ဆီအုန်းစက်ရုံကို အဖျားခတ် တိုက်သွားသောကြောင့် အမိုးတချို့လန်သွားခဲ့ကြောင်း သိရှိရသည်။
“အဲဒီ စက်ရုံ အမိုး ၂ ချပ်လန်သွားတာကို နေ့ခင်းပိုင်းမှာ ချက်ခြင်းပြင်ကြတယ်။ သက်ဆိုင်ရာကလည်း လာကြည့်ပေးတယ်။ လူနေအိမ် ၄ လုံး ထိသွားတာ နေမရတော့လို့ ကိုယ်ထူကိုယ်ထစနစ်နဲ့ လုပ်ကြတယ်။ အခု အိမ်အမိုးတွေ ပြန်မိုးနေကြပြီ” ဟု စက်ရုံအနီး သာကေတ ၁၀ ရပ်ကွက်တွင် နေထိုင်သူ တဦးက ပြောသည်။
သာကေတ ဆီအုန်းစက်ရုံမှာ ဗိုလ်ချုပ်မှူးကြီး ကတော် ဒေါ်ကြိုင်ကြိုင်၏တူ ပိုင်ဆိုင်သည်ဟု သိရှိရသည်။ အဆိုပါ စက်ရုံမှ ဆီချက်သည့်အခါ ထွက်ပေါ်လာသော အနံ့ဆိုးများ၏ ဒဏ်ကို မခံနိုင်သောကြောင့် အဆိုပါ စက်ရုံနှင့် အနီးဆုံး သာကေတ ၆ ရပ်ကွက်တွင် နေထိုင်သူများက အာဏာပိုင်များကို တိုင်ခဲ့ဖူးကြောင်း သိရှိရသည်။
“ဆီအုန်းစက်ရုံနဲ့ ကပ်နေတဲ့ ရပ်ကွက်က အနံ့တွေ မခံနိုင်လွန်းလို့ အထက်ကို တိုင်ဖူးတယ်။ ဘယ်သူမှ အရေးမယူတဲ့အပြင် တိုင်တဲ့သူနေတဲ့ အိမ်ကိုတောင် စက်ရုံပိုင်ရှင်က ၀ယ်ဖို့လုပ်ခဲ့သေးတယ်” ဟု ၆ ရပ်ကွက် တွင် နေထိုင်သူ တဦးက ပြောဆိုသည်။
| < Prev | Next > |
|---|
