မြန်မာ - မွတ်စလင်များကို သီးခြားကူညီပေးနေသော ဦးမြင့်စိန် ခေါ် Ibrahim Selamat က “သူတို့အုပ်စုက မလေးနိုင်ငံသား ညီအကို ၂ ယောက်နဲ့စဖြစ်တာ၊ အကိုဖြစ်တဲ့သူက လွတ်အောင် ထွက်ပြေးတော့ ကျန်ခဲ့တဲ့ ညီဖြစ်သူကို သတ်လိုက်တာ၊ အဲဒါ ဒီနိုင်ငံသားမျက်မြင်သက်သေတွေကြောင့် အခင်းဖြစ်ပြီး တပတ်အကြာမှာ မိတာ၊ တရားရုံးမှာ တောက်လျှောက် စစ်ဆေးလာပြီး ဒီနေ့ သေဒဏ်ပေးလိုက်တာပါ” ဟု ဧရာဝတီသို့ ပြောသည်။
မလေးရှားနိုင်ငံ ကွာလာလမ်ပူ မြောက်ပိုင်း Selayang ခရိုင်တွင် လွန်ခဲ့သော ၂၀၀၅ ခုနှစ်ဇွန်လက ယင်းအဖွဲ့ သည် အသက် ၂၁ နှစ်အရွယ်ရှိ မလေးရှားနိုင်ငံသား လူငယ်တဦးကို ရက်ရက်စက်စက် သတ်ဖြတ်ခဲ့ခြင်းကြောင့် ယခုကဲ့သို့ သေဒဏ်ပေးခံရခြင်း ဖြစ်သည်။
သေဒဏ်ပေးခံရသူများနှင့် အတူ အလုပ်လုပ်ကိုင်နေသော အမည်မဖော်လိုသူတဦးက “ ဒီအမှုက ၂၀၀၅ ကတည်းက သူတို့ ကျူးလွန်ထားတဲ့ လူသတ်မှုပေါ့၊ တရားရုံးက ကြိုးမိန့်ချလိုက်တယ်၊ ထပ်ပြီးတော့ ရင်ဆိုင်ရဦး မှာ၊ သူတို့မှာ တခြားပြစ်မှုတွေ အများကြီး ကျူးလွန်ထားတယ်” ဟုပြောသည်။
ယင်းတို့သည် အုပ်စုဖွဲ့ကာ ဆိုးသွမ်းနေသောလူများ ဖြစ်ပြီး ထိုအုပ်စုတွင် မလေးရှားလူမျိုးများလည်း ပါဝင်ကြောင်း သိရသည်။
တရားခံများမှာ စလင်း၊ မောင်မောင်၊ ဇော်ဇော်၊ နာခူး၊ ကာစင်နှင့် ဇော်ဦးတို့ဖြစ်ကြပြီး စလင်း၊ မောင်မောင်နှင့် ဇော်ဇော်တို့ ၃ ဦးသည် တခြားပြစ်မှုများကို ကျူးလွန်ထားကြောင်း ဦးမြင့်စိန်က ဆိုသည်။
၎င်းအမှုနှင့်ပတ်သက်၍ လူသတ်မှုကျူးလွန်ခဲ့သူ ၆ ဦး၏ ရှေ့နေမှာ အယူခံဝင်လိမ့်ဦးမည် ဖြစ်ကြောင်း AP သတင်းဌာနကလည်း ဖော်ပြထားသည်။
| < Prev | Next > |
|---|
