အောက်တိုဘာ ၁၇ ရက်နေ့အထိ ၃ ရက်ကြာ ကျင်းပမည့် ယင်းရှမ်းယဉ်ကျေးမှုပွဲတွင် International Conference on Shan Studies with Exhibitions and Performing arts အမည်ရှိ စာတမ်း ဖတ်ခြင်းပါဝင် ပြီး ချူလာလောင်ကွန်း တက္ကသိုလ် ယဉ်ကျေးမှု အနုပညာမဟာဌာန(Art faculty)နှင့် ရှမ်းတိုင်းရင်းသား အဖွဲ့  အစည်း များ ပူးပေါင်းကာ ကျင်းပခဲ့ခြင်းဖြစ်သည်၊ ဤအခမ်းအနားတွင် ရှမ်းသမိုင်းကြောင်းများ၊ ရှမ်းအစားအသောက်များ၊ ရိုးရာ ၀တ်စားဆင်ယင်မှုများ အကြောင်း တို့ကို ဓာတ်ပုံများဖြင့်လည်း ခင်းကျင်းပြသခဲ့သည်။
ရှမ်းစာပေနှင့်ယဉ်ကျေးမှုကော်မတီမှ ဆရာဦးစိုင်းက“အခု ဒီမှာ ကျနော်တို့ပြုလုပ်ရတဲ့ ရည်ရွယ်ချက်ကတော့ ရှမ်းလူမျိုးတွေရဲ့ သမိုင်းတွေ ယဉ်ကျေးမှုတွေကို နိုင်ငံတကာကလူတွေ သိအောင် ထိုင်းလူမျိုးတွေ သိအောင်နဲ့ ကျနော်တို့ရှမ်းတွေထဲက ကိုယ့်လူမျိုးရဲ့ ရိုးရာတွေ ယဉ်ကျေးမှုတွေ သမိုင်းတွေကို သေသေချာချာ မသိတဲ့လူတွေ သိစေချင်တဲ့ ရည်ရွယ်ချက်ပါ၊ နောက်တခုက ခုခေတ်မှာ တချို့ လူတွေက ကိုယ့်ဓလေ့ ကိုယ့်ဘာသာကို လေ့လာ ရမှန်းလည်းမသိ သိလည်းဘာလုပ်မလဲဆိုတဲ့ အတွေးမျိုးရှိတဲ့သူ တွေကို ကိုယ့်ယဉ်ကျေးမှု ကိုယ့်ဓလေ့ရိုးရာကို ချစ်မြတ်နိုးစေလိုတဲ့ စေတနာနဲ့လုပ်ကြတာပါ” ဟု ဧရာဝတီသို့ ရှင်းပြသည်၊
ရှမ်းရိုးရာ အစားအစာနှင့်ပတ်သက်၍လည်း ရှမ်းစာပေနှင့်ယဉ်ကျေးမှုကော်မတီ မှ မနန်းယဉ်က စာတမ်း တစောင် ရေးသားကာ အင်္ဂလိပ်ဘာသာဖြင့် ဖတ်ကြားခဲ့သည်။
စာတမ်းရှင် မနန်းယဉ်က“ကျမ အနေနဲ့အခုလို နိုင်ငံတကာပရိသတ်တွေ ထိုင်းလူမျိုးတွေနဲ့ မြန်မာတိုင်းရင်းသား တွေရဲ့ ရှေ့မှာ ရှမ်းအစားအစာအကြောင်းကို တင်ပြခွင့်ရတာ တကယ့်ကိုပဲ ဂုဏ်ယူပါတယ်၊ ကျမတို့ ရိုးရာ အစား အသောက်တွေဟာ ရှေးကမိဘဘိုးဘွားတွေ နှစ်ပေါင်းရာထောင်ချီ စားသောက်လာခဲ့ကြတဲ့ အစားအစာတွေမို့  လည်း ဖြစ်တယ်လေ၊ ရှမ်းမှန်ရင် တို့ဟူးကြိုက်တယ်၊ ပဲပုတ်ကြိုက်တယ်”ဟုပြောပြသည်၊
ပြပွဲကို လာရောက်ကြသော ဧည့်ပရိသတ်များအား ရှမ်းရိုးရာ အစားအစာများကို နမူနာကျွေးမွေးသည်။
ပြခန်းများတွင် ရှမ်းရိုးရာ အ၀တ်အစားများ၊ ရှမ်းလူမျိုးများ၏ ရှင်ပြုပွဲ ကျင်းပပုံများနှင့် ရှေးက ရှမ်းစော်ဘွားများ၏ ဟော်နန်းကြီးများကို ဓာတ်ပုံများဖြင့် ပြသထားပုံမှာလည်း အထူးစိတ်ဝင်စားဖွယ်တွေ့ရှိရသည်။
ရှမ်းအမျိုးသမီးအဖွဲ့ မှ နန်းဆိုင်နောင့်က ရှမ်းရိုးရာ ၁၂ရာသီပွဲတော်များအကြောင်းကို ဓာတ်ပုံပြကွက်များ ဖြင့် သရုပ်ပြ စာတမ်းတင်ပြီး ရွာပုန်း ရွာရှောင်များ အကြောင်းကိုလည်း ဓာတ်ပုံများဖြင့် ခင်းကျင်းပြသသွားသည်။
“ကျမတို့ရှမ်းမှာက ဗမာတွေလို တန်းခူး ကဆုန်မခေါ်ဘူး ပထမလ ဒုတိယလခေါ်တယ်။ အဲဒီလတွေမှာ ရာသီ အလိုက်ပွဲတော်တွေရှိတယ်၊ ဥပမာ မီးပုံပွဲ၊ ကောက်သစ်စားပွဲ စသဖြင့်ပေါ့လေ၊ ပြီးတော့ ကျမတင်ပြတာတွေ ထဲမှာ နိုင်ငံအတွင်းမှာ အာဏာပိုင်တွေ စစ်တပ်တွေက နှိပ်စက်လို့ရွာကိုစွန့်ကာ ထွက်ပြေးပုန်းရှောင်နေရတဲ့ ရွာပုန်းရွာရှောင်တွေရဲ့ လက်ရှိဘ၀အခြေအနေတွေကို ပြည်တွင်းကရထားတဲ့ ပုံတွေနဲ့ပါ တင်ပြထားပါတယ်”ဟု နန်းဆိုင်နောင့် က ဆိုသည်။
ယနေ့အခမ်းအနားသို့ ရှမ်းလူမျိုး ရဟန်းတော်များ၊ နိုင်ငံခြားသားများ၊ ထိုင်းလူမျိုးများနှင့် ရှမ်းတိုင်းရင်းသားများ အပါအ၀င် မြန်မာနိုင်ငံသားများ စိတ်ဝင်တစား လာရောက်လေ့လာကြသည်ကို တွေ့ ရသည်၊ မနက်ဖြန်တွင် စာတမ်းဖတ်ပွဲနှင့် ဓာတ်ပုံပြပွဲများ ရှိတော့မည်မဟုတ်ဘဲ ရှမ်းရိုးရာ ယဉ်ကျေးမှုအကများ တေးသီချင်းများနှင့် တူရိယာလက်စွမ်းပြများဖြင့် သရုပ်ပြ ဖျော်ဖြေတင်ဆက်မည်ဟု သိရသည်၊
ယခင်ကလည်း မြန်မာတိုင်းရင်းသားများထဲမှ ရခိုင်သမိုင်း စာတမ်းဖတ်ပွဲနှင့် မွန်သမိုင်း စာတမ်းဖတ်ပွဲများကို ဤ ချူလာလောင်ကွန်း တက္ကသိုလ်မှ ပြုလုပ်ပေးခဲ့ဖူးသည်။
| < Prev | Next > |
|---|
