ယင်းဆုံးဖြတ်ချက်တွင် မြန်မာ့အရေးလှုပ်ရှားသူ မခင်ဥမ္မာ အပါအ၀င်၊ ကမ္ဘောဒီးယား၊ လာအို၊ ဖိလစ်ပိုင် နှင့် စင်ကာပူနိုင်ငံ ကိုယ်စားလှယ်များ ပါဝင်သည်။
စင်ပြိုင်အာဆီယံအဖွဲ့မှ မစ္စ ဒက်ဘီ စတူးဟတ်က“မနေ့ညက ထိုင်းနိုင်ငံခြားရေးဌာနက ဒီ ၅ နိုင်ငံက ကိုယ်စားလှယ်တွေကို ခေါ်ပြီးတော့ အာဆီယံခေါင်းဆောင်တွေနဲ့ အာဆီယံ CSO အဖွဲ့ အစည်း အဝေးတွေကို တက်ဖို့ခွင့်မပြုတော့ဘူးဆိုပြီးပြောပါတယ်၊ ဒါဟာအာဆီယံ ပဋိညာဉ်နဲ့ အာဆီယံလူ့အခွင့်အရေး လုပ်ငန်းစဉ်ကို နောက် ပြန်ဆွဲတာပါ”ဟု ဧရာဝတီသို့ ပြောသည်။
ယနေ့မှ စတင်ပြီး လာမည့် အောက်တိုဘာ၂၅ ရက်နေ့ အထိ ကျင်းပသည့် ၁၅ ကြိမ်မြောက် အာဆီယံ ထိပ်သီး အစည်းအဝေးပွဲ ၏ တစိတ်တဒေသအဖြစ် အာဆီယံ နိုင်ငံခေါင်းဆောင်များနှင့် လူထုအခြေပြု လူမှုအဖွဲ့အစည်း ကိုယ်စားလှယ်များ အစည်းအဝေးတက်ရောက်ရန် ပြည်ပအခြေစိုက် ဒီမိုကရေစီနှင့် ဖွံ့ဖြိုးတိုးတက်ရေး ကွန်ယက် အဖွဲ့ ၏ ဥက္ကဌ မခင်ဥမ္မာ ကိုမြန်မာကိုယ်စားလှယ်အဖြစ် အာဆီယံ လူထုအခြေပြု လူမှုအဖွဲ့အစည်းများ ညီလာခံ (APF) တွင် ရွေးချယ်ခဲ့ခြင်း ဖြစ်သည်။မခင်ဥမ္မာနှင့်အတူ ကမ္ဘောဒီးယား လူ့အခွင့်အရေးနှင့် ဖွံ့ဖြိုးတိုးတက်ရေး အဖွဲ့မှ Nay Vanda၊ လာအို ရှေ့နေအဖွဲ့မှ Manichunh Philaphanh၊ ဖိလစ်ပိုင် Task Force Detainees အဖွဲ့မှ အမှုဆောင် ဒါရိုက်တာ Sr.Cres Lucero နှင့် စင်ကာပူအခြေစိုက် Task Force on Asean Migrant Workers အဖွဲ့မှ Sinapan Samydorai တို့လည်း အစည်းအဝေးသို့ တက်ရောက်ခွင့် ပိတ်ပင်ခံရကြောင်း သိရသည်။
“အာဆီယံ CSOနဲ့ပတ်သက်ပြီးတော့ အာဆီယံ ခေါင်းဆောင်တွေရဲ့ဆုံးဖြတ်ချက်ကို အရမ်း စိတ်ပျက်မိတယ်၊ ဒါဟာ အာဆီယံက ရှေ့တလှမ်းတိုးပြီးတော့ နောက် ၂ လှမ်းဆုတ်လိုက်တာပါ၊ အရင်တကြိမ်ကလည်း ၂နိုင်ငံ တက်ရောက်ဖို့ ပိတ်ပင်ခံရတယ်၊ အခု ၅ နိုင်ငံဆိုတော့ အာဆီယံ အပေါ်ထားတဲ့ ယုံကြည်မှုကတော့ ပိုဆိုး သွားစေပါတယ်”ဟု မခင်ဥမ္မာက ပြောသည်။
အာဆီယံ ပဋိညာဉ်အရ နိုင်ငံခေါင်းဆောင်များနှင့် လူထုအခြေပြု လူမှုအဖွဲ့အစည်းများ တွေ့ဆုံသည့် အစီအစဉ် ကို ယမန်နှစ်က စတင်ခဲ့ရာ မြန်မာနိုင်ငံ ကိုယ်စား ရွေးချယ်ခံခဲ့ရသည့် မခင်ဥမ္မာကိုဆွေးနွေးသည့်နေရာ သို့ ၀င်ခွင့် မပြုရန် မြန်မာအစိုးရ က ကန့်ကွက်ခဲ့သည်။
ထို APF ညီလာခံသို့ ယခုနှစ် ပြည်တွင်းက တက်ရောက်လာသော အဖွဲ့အစည်းများမှာ အမျိုးသမီးရေးရာ၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်း(ကြံ့ဖွံ့)နှင့် မူးယစ်ဆေးဝါး တိုက်ဖျက်ရေးအဖွဲ့များ တက်ရောက် ကြောင်း သိရသည်။
ထိုင်းနိုင်ငံသည် လက်ရှိ အာဆီယံဥက္ကဋ္ဌ အဖြစ်တာဝန်ယူစဉ်အချိန်အတွင်း အာဆီယံအဖွဲ့ကို ပိုမိုကျယ်ပြန့် လာစေရန် ဒေသတွင်းရှိ CSO များကို ၂ကြိမ်တိုင်တိုင် အစည်းအဝေးသို့ တက်ရောက်ခွင့်ရရေးကြိုးပမ်းခဲ့သည်။
အာဆီယံခေါင်းဆောင်များရှေ့တွင် အမျိုးသမီးနှင့် ကလေးများအခွင့်အရေးကို ပြောဆိုရန်စီစဉ်လာသော လာအို နိုင်ငံမှ ရှေ့နေဖြစ်သူ Manichunh Philaphanhက“အစည်းအဝေးက ကျမတို့ကို ငြင်းပယ်တော့ ကျမတို့ အရမ်း စိတ်ပျက်မိပါတယ်”ဟု ဧရာဝတီသို့ ပြောသည်။
“ဒီနေ့ အစည်းအဝေးကို တက်လာတဲ့ ကိုယ်စားလှယ်တွေက အစိုးရ အထောက်အပံ့ကို ခံယူနေတဲ့သူတွေပါ၊ လွတ်လပ်တဲ့သူ တယောက်မှ မပါပါဘူး၊ CSO များကို ငြင်းပယ်လိုက်တာ အရမ်းစိတ်မကောင်း ဖြစ်မိတယ်” ဟု Nay Vanda ကလည်း ပြောသည်။
CSO ကိုယ်စားလှယ်များကို ငြင်းပယ်လိုက်ပြီးနောက် အာဆီယံခေါင်းဆောင်များနှင့် တွေ့ဆုံရသည်မှာ လွတ်လပ် မှု မရှိဟု ယူဆသဖြင့် အင်ဒိုနီးရှား၊ မလေးရှားနှင့်ထိုင်း ကိုယ်စားလှယ်များက လည်း အစည်း အဝေးခန်းမထဲမှ ထွက်ခွာသွားကြောင်းသိရသည်။
“လွတ်လပ်တဲ့ CSO တွေကိုငြင်းလိုက်တာက ဒေသတွင်း ဒီမိုကရေစီရေးကို ငြင်းပယ်လိုက်တာပါပဲ၊ ကျနော်တို့ CSOတွေက ခေါင်းဆောင်တွေနဲ့စေ့စပ်ဆွေးနွေးဖို့ လိုလားပေမယ့် သူတို့က အခွင့်အရေး မပေးဘူး”ဟု Sr. Cres Lucero က ပြောသည်။
အာဆီယံ ပဋိညာဉ်စာတမ်းအရ အာဆီယံ လူ့အခွင့်အရေးအဖွဲ့ကို ဖွဲ့စည်းရန်ပါရှိပြီး အဆိုပါ အာဆီယံ လူ့အခွင့် အရေးအဖွဲ့သည် ဒေသတွင်းရှိ လူဦးရေ သန်းပေါင်း ၅၇၇ ၏ လူ့အခွင့်အရေးကို ကာကွယ်မြှင့်တင်နိုင်ရန် ဖြစ် ကြောင်း အာဆီယံ တာဝန်ရှိသူများ၏ ပြောကြားချက်အရ သိရသည်။
“လွတ်လပ်တဲ့ CSO အဖွဲ့တွေကို ငြင်းပယ်လိုက်တာက အာဆီယံ ပဋိညာဉ်နဲ့ လူ့အခွင့်အရေး အဖွဲ့အပေါ်ထားတဲ့ ယုံကြည်မှုကို လျော့ပါးစေပါတယ်”ဟု စင်ကာပူမှ Sinapan Samysorai ကဆိုသည်။
ယင်း ၁၅ ကြိမ်မြောက် အာဆီယံ ထိပ်သီး အစည်းအဝေးပွဲသို့ ၀န်ကြီးချုပ် ဗိုလ်ချုပ်ကြီး သိန်းစိန် တက်ရောက်နေ ကြောင်း သိရသည်။
ဤသတင်းအား ဧရာဝတီ သတင်းထောက် ဝေမိုးက အာဆီထိပ်သီး ညီလာခံကျင်းပနေသော ထိုင်းနိုင်ငံ ချာ့အမ်းမြို့မှ ပေးပို့သည်။
| < Prev | Next > |
|---|
