ရေအားလျှပ်စစ် ထုတ်လုပ်နိုင်ရန်အတွက် ယခုအခါ ဒုဌ၀တီမြစ်ကို ပိတ်၍ ရေလှောင်ထားပြီး မြစ်ရိုး တလျှောက် နေထိုင်သည့် ဒေသခံများကို ရွှေကျင်၊ သဲသည်၊ ကျောက်ခဲကောက်ခြင်းများ မလုပ်ကြရန် အသိပေးထားသည်ဟု မြန်မာ့ လျှပ်စစ် ဓာတ်အားပေးလုပ်ငန်း (တိုင်းရုံး) မှ တာဝန်ရှိသူတဦးက ဧရာဝတီသို့ ပြောသည်။
“ရေကို ထိန်းနိုင်တယ် မထိန်းနိုင်ဘူးဆိုတာ မသိတဲ့အခါကျတော့၊ မတော်တဆ တခုခုများဖြစ်ရင်၊ ရေဆင်းလာရင် အမှုမဲ့ အမှတ်မဲ့ ဖြစ်သွားမှာစိုးလို့ အသိပေးရခြင်းဖြစ်သည်” ဟု ၎င်းက ပြောသည်။
လှောင်ထားသည့် ရေနည်းသွားသည့်အချိန်တွင် ဒေသခံများက ငါးဖမ်းခြင်း၊ ရွှေကျင်ရန် ကျောက်ခဲကောက်ခြင်း သဲကျုံးခြင်း များ ပြုလုပ်လေ့ရှိသောကြောင့် ထိုသို့ မလုပ်ကြရန် ရက်ပေါင်း ၂၀ ခန့် ကြိုတင် အသိပေးထားသည်ဟု သိရသည်။
ဒုဌတီမြစ်နှင့် ဧရာဝတီမြစ် ၂ ခုပေါင်းဆုံသည့် နေရာမှ ရဲရွာစီမံကိန်းအထိ ကျေးရွာပေါင်း ၅၀ ခန့်ရှိပြီး ၎င်း မြစ်အနီး အနားတလျှောက်တွင် ကျေးရွာ ၂၀ ကျော်ရှိသည်။
ရေအားလျှပ်စစ် စီမံကိန်းအတွက် စက် ၄ လုံးရှိသည့်အနက် တလုံးကို စတင် လည်ပတ်သွားမည်ဟု မန္တလေးမြို့ရှိ လျှပ်စစ်ဓာတ်အားပေးလုပ်ငန်းမှ တာဝန်ရှိသူက ဆိုသည်။
စက်တစ်လုံးလျှင် စက်တပ်ဆင်အား ၁၉၇ ဒသမ ၅ မဂ္ဂါဝပ်ရှိပြီး စက် ၄ လုံးအတွက် စုစုပေါင်း ၇၉၀ မီဂ္ဂါဝပ်ရှိမည် ဖြစ်ကြောင်း လည်း ၎င်းက ဆိုသည်။
ရဲရွာ ရေအားလျှပ်စစ်စီမံကိန်းသည် မြန်မာနိုင်ငံ၌ လက်ရှိတည်ဆောက်ပြီးစီးသွားသော ရေအားလျှပ်စစ် စီမံကိန်းများအနက် အကြီးဆုံးဖြစ်သည်ဟု သိရသည်။
ယင်း စီမံကိန်းအရ လည်ပတ်မည့် စက်တလုံးမှ ထွက်ရှိလာမည့် လျှပ်စစ်ဓာတ်အားများကို မဟာလျှပ်စစ် ဓာတ်အားလိုင်းများမှ တဆင့် တနိုင်ငံလုံးသို့ ဖြန့်ဖြူးပေးသွားမည်ဖြစ်ကြောင်း သူက ဆက်ပြောသည်။
ရဲရွာ ရေအားလျှပ်စစ် စီမံကိန်းအတွက် မြစ်ငယ် မြစ်ပေါ်တွင် ရေလှောင်တမံများ တည်ဆောက်၍ လျှပ်စစ် ဓာတ်အား ထုတ်လုပ်နိုင်ရန်အတွက် ၁၉၂၀ ပြည့်နှစ်တွင် ဗြိတိန် ကုမ္ပဏီတစ်ခုက စတင် ဆောင်ရွက်ခဲ့ခြင်း ဖြစ်သည်။
ထို့အပြင် ၁၉၅၄ ခုနှစ်မှ ၁၉၉၆ ခုနှစ်အတွင်း ရဲရွာ ရေအားလျှပ်စစ်စီမံကိန်း စတင်နိုင်ရေး အကြိုလေ့လာစူးစမ်းမှုများကို ဗြိတိန်၊ ဂျပန်နှင့် ဗီယက်နမ် ကုမ္ပဏီများက အသေးစိတ် စူးစမ်းလေ့လာမှုများ ဆောင်ရွက်ခဲ့ကြသည်။
ရေအားလျှပ်စစ်စီမံကိန်း စတင်နိုင်ရေးအတွက် လွန်ခဲ့သော ၉ နှစ်ခန့်တွင် ဂျပန်နိုင်ငံ Nippon Koei ကုမ္ပဏီက ဒီဇိုင်း ရေးဆွဲခဲ့ပြီး ၂၀၀၃ ခုနှစ်တွင် အသေးစိတ် ဒီဇိုင်းထုတ်လုပ်ခြင်းနှင့် တည်ဆောက်ရေးလုပ်ငန်းများကို ဆွစ်ဇာလန်နိုင်ငံ Colenco Power Engineering ကုမ္ပဏီနှင့် စာချုပ်ချုပ်ဆိုခဲ့ကြောင်း သိရသည်။
| < Prev | Next > |
|---|
