ကန့်ကွက်စာကို ပြည်ထောင်စု ရွေးကောက်ပွဲ ကော်မရှင်က လက်ခံခဲ့ပြီး နေပြည်တော်ရှိ စည်ပင်သာယာရေး ဟိုတယ်တွင် ဒေါက်တာ မေဝင်းမြင့်တို့ ၂ ဦး တည်းခိုနေစဉ် ရဲ၊ စစ်ဖက် ရေးရာ လုံခြုံရေး (စရဖ) အဖွဲ့ဝင်များနှင့် စည်ပင်သာယာ ၀န်ထမ်းတို့က အနှောင့်အယှက် ပေးခဲ့သည်ဟု NLD ဗဟို အလုပ်အမှုဆောင် ဦးဝင်းတင်က ဧရာဝတီသို့ ပြောသည်။
ယင်းဟိုတယ်တွင် တည်းခိုရန် ခွင့်မပြုကြောင်းနှင့် ပြစ်မှုကျူးလွန်ပါက မည်သည့်ပုဒ်မနှင့် အရေးယူခံရမည် စသော သတိပေးချက်များကို အာဏာပိုင်များက လက်မှတ် ရေးထိုးခိုင်းကြောင်း ဦးဝင်းတင်က ဆက်လက် ပြောပြသည်။
အာဏာပိုင်များ၏ အနှောင့်အယှက်ပေးမှုကြောင့် ဗဟို အလုပ်အမှုဆောင် အမျိုးသမီး ၂ ဦးသည် ရန်ကုန်သို့ လိုင်းကားနှင့် နေ့ချင်းပြန်ခဲ့ကြရကြောင်း သိရသည်။
NDF က ကြယ် ၂ ပွင့်ပါ အလံနှင့် ခမောက်ပုံ အမှတ်တံဆိပ်ကို ပါတီအတွက် အသုံးပြုမည်ဖြစ်ပြီး ကန့်ကွက်လိုက ၇ ရက် အတွင်း လာရောက်ကန့်ကွက်ရန် ရွေးကောက်ပွဲ ကော်မရှင်က ဇွန်လ ၃၀ ရက်နေ့တွင် အစိုးရ သတင်းစာများမှ ကြေညာခဲ့ သည်။ NLD ဗဟို အလုပ်အမှုဆောင်များက ဇူလိုင်လ ၅ ရက်နေ့တွင် သွားရောက် ကန့်ကွက်ခဲ့သည်။
NLD သည် မူလက ကြယ်တလုံးနှင့် ခွပ်ဒေါင်းပုံကို အလံနှင့် ပါတီအမှတ် တံဆိပ်အဖြစ် အသုံးပြုခဲ့ပြီး ၁၉၉၀ ရွေးကောက်ပွဲ အကြိုကာလတွင် ရွေးကောက်ပွဲ ကော်မရှင်က ချပေးသော အသုံးပြုနိုင်သည့် ပါတီ အမှတ် တံဆိပ် အမျိုးအမျိုးအနက် ဦးချစ်ခိုင်နှင့် ဦးခင်မောင်ဆွေတို့က ခမောက်ပုံကို ရွေးချယ်ခဲ့ရာ NLD ပါတီ၏ အမှတ်တံဆိပ်သည် ခမောက်ဖြစ်လာကြောင်း သိရသည်။
စစ်အစိုးရက ကျင်းပပေးမည့် ၂၀၁၀ ရွေးကောက်ပွဲသည် တရားမျှတခြင်း မရှိဟုဆိုကာ ပြီးခဲ့သည့် မတ်လ ၂၉ ရက်နေ့တွင် ပါတီကို ထပ်မံ မှတ်ပုံမတင်ရန် NLDက ဆုံးဖြတ်ခဲ့သည်။
မကွေးတိုင်း၊ ရန်ကုန်တိုင်း နှင့် ပဲခူးတိုင်း တို့မှ NLD အဖွဲ့ဝင်များကလည်း ကန့်ကွက်လွှာများကို ရွေးကောက်ပွဲ ကော်မရှင်ထံ ပေးပို့ကြကြောင်း သိရသည်။
NLD ပါတီ ဗဟိုအလုပ်အမှုဆောင် ၄ ဦးတို့က ရွေးကောက်ပွဲကို လက်ခံခဲ့ကြပြီး NDF ပါတီကို မေလ ၆ ရက်နေ့တွင် ဖွဲ့စည်းခဲ့ ပြီးနောက် မေလ ၂၇ ရက်နေ့တွင် ပါတီတည်ထောင်ခွင့် လျှောက်ထားခဲ့ကြသည်။
| < Prev | Next > |
|---|
