ဦးပြည့်ဖြိုးတေဇက“အပန်းဖြေရင်းနဲ့ ချစ်ကြည်ရေး ကစားဖို့ ရောက်လာတာ၊ သန်ဘက်ခါကျတော့ ချင်းမိုင် အားကစားကွင်းမှာ ကစားမယ်”ဟု ဧရာဝတီသို့ ပြောသည်။
ဦးပြည့်ဖြိုးတေဇ သည် ရန်ကုန် ယူနိုက်တက် ဘောလုံး အသင်း ပိုင်ရှင် ဦးတေဇ ၏ သား ဖြစ်သည်။
ယခု ခရီးစဉ်တွင် အသင်းနည်းပြ မြန်မာ့လက်ရွေးစင် ဘောလုံးသမားဟောင်း ဦးမျိုးလှိုင်ဝင်းလည်း ပါဝင်သည်။
ဦးမျိုးလှိုင်ဝင်းက“ချင်းမိုင် FC ဘောလုံးအသင်းရဲ့ ခြေစွမ်း ဘယ်လိုရှိတယ်ဆိုတာကိုတော့ လေ့လာပြီးပြီ၊ ကစားအားတော့ သိပ်မရှိဘူး၊ ဘောလုံးကျွမ်းကျင်မှုတော့ ရှိတယ်”ဟု ဆိုသည်။
ရန်ကုန် ယူနိုက်တက် အသင်းတွင် စုစုပေါင်း ကစားသမားနှင့် နည်းပြ အပါအ၀င် လူ၄၀ ပါဝင်ပြီး မကြာသေးမီက ၀ယ်ယူခဲ့သည့် ဘရာဇီး လူမျိုးကစားသမား လီယိုနာဒို အပြင် အသင်းခေါင်းဆောင် နိုင်ဂျီးရီးယားသား ဟန်ဆင်၊ မြန်မာ့ လက်ရွေးစင် ဂိုးသမား အောင်အောင်ဦး၊ မျိုးမင်းထွန်းတို့လည်း ပါဝင်သည်။
လူငယ်မျိုးဆက်သစ် ကစားသမား လွင်ကိုနိုင်မှာမူ လိုက်ပါလာခြင်းမရှိပေ။
ရန်ကုန်ယူနိုက်တက် ကစားသမားများသည် ခရီးစဉ်အတွင်း ချင်းမိုင်မြို့ ဒွိုင်ဆူထေ့ တောင်ပေါ်ရှိ ဘုရားနှင့် Night Safari သို့လည်း သွားရောက် လည်ပတ်မည်ဟု သိရသည်။
ချင်းမိုင် FC ဘောလုံးအသင်းနှင့် လာမည့် ဇူလိုင်လ ၂၄ ရက် စနေနေ့တွင် ချင်းမိုင် နှစ် ၇၀၀ ပြည့် အားကစားကွင်းတွင် ညနေ ၃ နာရီတွင် ကစားမည်ဟု သိရသည်။
မြန်မာဘောလုံးအသင်း တသင်းအနေဖြင့် ယင်း ချင်းမိုင်မြို့ အားကစားကွင်းကို ဒုတိယအကြိမ်လာရောက်ကစားခြင်းဖြစ်ပြီး နည်းပြ ဦးမျိုးလှိုင်ဝင်း အနေဖြင့်လည်း ဒုတိယအကြိမ် ခြေချခြင်းဖြစ်သည်။
၁၉၉၅ ခုနှစ် အရှေ့တောင်အာရှ ဆီးဂိမ်းပြိုင်ပွဲကို ယင်းနှစ် ၇၀၀ ပြည့် ကွင်းတွင် ကျင်းပရာ မျိုးလှိုင်ဝင်း၊ သန်းတိုးအောင်၊ ကြည်လွင် စသည့် နာမည်ကြီး ဘောလုံးသမားများ ပါဝင်သည့် မြန်မာ့လက်ရွေးစင်အသင်း ဆီးမီးဖိုင်နယ်တွင် ဗီယက်နမ်အသင်း ကို ရှုံးပြီး ထွက်ခဲ့ရသည်။
< Prev | Next > |
---|