ရှေ့နေကြီး ဦးအောင်သိန်းကို ပုသိမ်ထောင်သို့ ပြောင်းရွှေ့လိုက်ပြီး ရှေ့နေကြီး ဦးခင်မောင်ရှိန်အား မြောင်းမြထောင်သို့ ပြောင်းရွှေ့လိုက်သည်ဟု အေအေပီပီက ပြောသည်။အေအေပီပီအဖွဲ့၏အတွင်းရေးမှူး ဦးတိတ်နိုင်က “သူတို့ကို ၄ လပဲ အမိန့်ချထားတာ၊ မကြာခင်မှာ ပြန်လွတ်လာမယ့်လူတွေဖြစ်ပါတယ်။ အဲဒီလို မကြာခင်မှာပြန်လွတ်လာမယ့်လူတွေကို ထောင်ပြောင်းတယ်ဆိုတာကတော့ ဒီရှေ့နေကြီးတွေနဲ့ သူတို့ရဲ့မိသားစုတွေကို ဒုက္ခရောက်အောင် ရည်ရွယ်ချက်ရှိရှိနဲ့ လုပ်ဆောင်တာ ဖြစ်ပါတယ်” ဟု ပြောသည်။
“နောက်တချက်ကတော့ နိုင်ငံတကာအသိုင်းအဝန်းရဲ့မျက်စိအောက်မှာရှိနေတဲ့ အင်းစိန်ထောင်လိုနေရာမျိုးမှာ မထားချင်လို့ ပြောင်းရွှေ့လိုက်တာလည်း ဖြစ်ပါတယ်” ဟုလည်း ဦးတိတ်နိုင်က ဆက်ပြောသည်။
အဆိုပါရှေ့နေကြီး ၂ ဦးသည် ထင်ရှားသည့် နိုင်ငံရေးအကျဉ်းသားများဖြစ်ကြသည့် ကိုမင်းကိုနိုင်နှင့် ၈၈ မျိုးဆက်ကျောင်းသားအဖွဲ့ဝင်များ၊ လူရွှင်တော် ဇာဂနာ၊ အန်အယ်လ်ဒီပါတီဝင် မစုစုနွေး၊ အရှင်ဂမ္ဘီရ အစရှိသော နိုင်ငံရေးလှုပ်ရှားသူများ၏အမှုများကို လိုက်ပါဆောင်ရွက်ခဲ့ကြသူများ ဖြစ်သည်။
၎င်းရှေ့နေကြီး ၂ ဦးအား ယခုလ ၇ ရက်နေ့က တရားရုံးတော်ကို မထီမဲ့မြင်ပြုသည်ဟူသော စွပ်စွဲချက်ဖြင့် ရှန်ကုန်ရှိ ဗဟိုတရားရုံးချုပ် ထောင်ဒဏ် ၄ လစီ ချမှတ်ခဲ့ပြီး ထိုနေ့ည ၁၀ နာရီခန့်တွင် အာဏာပိုင်တို့က နေအိမ်အသီးသီး၌ ဖမ်းဆီးခဲ့သည်။
သက်ဆိုင်ရာက နေအိမ်သို့လာရောက်မဖမ်းမီ ရှေ့နေကြီး ဦးအောင်သိန်းက “နိုင်ငံရေးအမှုတွေကို လိုက်ပါဆောင်ရွက်ပေးရမလားဆိုပြီး အာဃာတထားတဲ့သဘောတော့ သက်ရောက်တာပေါ့။ ဓမ္မနဲ့ အဓမ္မကတော့ ဒီလိုပါပဲဗျာ … လောလောဆယ် အဓမ္မက နိုင်နေတယ်၊ တချိန်မှာတော့ ဓမ္မ နိုင်ရမှာပေါ့ဗျာ” ဟု ဧရာဝတီကို ပြောဆိုခဲ့သည်။
ယမန်နေ့နံနက် အာရုံတက်ချိန်က ကိုမင်းကိုနိုင်အပါအဝင် ထင်ရှားသည့်ကျောင်းသားခေါင်းဆောင်များကို ဝေးလံသီခေါင်သည့် နယ်စပ်ဒေသများရှိ အကျဉ်းထောင်များသို့ ပြောင်းရွှေ့လိုက်ပြီး မစုစုနွေးအား မန္တလေးထောင်သို့ ပြောင်းရွှေ့လိုက်သည်။
ယမန်နေ့နံနက် ၃ နာရီဝန်းကျင်မှ နံနက် ၆ နာရီခွဲ့အတွင်း နိုင်ငံရေးအကျဉ်းသား ၂၁ ဦးကို အင်းစိန်ထောင်မှ နယ်ထောင်အသီးသီးသို့ ပြောင်းရွှေ့ခဲ့သည်ဟု နိုင်ငံရေးအကျဉ်းသား မိသားစုဝင်များက ဧရာဝတီကို ပြောဆိုကြသည်။
| < Prev | Next > |
|---|
