ဧရာဝတီ

ရုပ်ရှင်၊ ဂီတ အသိုင်းအ၀န်းမှ နာမည်ကြီး အနုပညာရှင်များသည် ယခုနှစ်ပိုင်းအတွင်း လူမှုရေးလုပ်ငန်းများကို ပိုမို စိတ်ဝင်စားလာပြီး တိုးတက် လုပ်ကိုင်လာကြကြောင်း တွေ့ရှိရသည်။

ပြီးခဲ့သည့် ၂၀၀၉ ခုနှစ်တွင် သရုပ်ဆောင် ပြေတီဦးက ပြေတီဦးပညာရေး ဖောင်ဒေးရှင်းဟူ၍ ထူထောင်ခဲ့ သကဲ့သို့ သရုပ်ဆောင် ရဲတိုက်ကလည်း ယခုနှစ် ဇန်န၀ါရီလ ၁ ရက်နေ့မှစ၍ ရဲတိုက်ဖောင်ဒေးရှင်းကို ထူထောင်ကာ သဘာဝဘေးဒဏ် ကယ်ဆယ်ရေးလုပ်ငန်းများ၊ လေလွင့်ကလေးငယ်များ စောင့်ရှောက်ရေးလုပ်ငန်းများ လုပ်ကိုင်တော့မည်ဟု သိရသည်။

တေးရေးတေးဆို စိုးသိင်္ခ၊ မေခလာ၊ နှင်းဧကရီ၊ စိုးပိုင်၊ မေရွက်ဝါ၊ အနဂ္ဃ၊ ဂျေမီ၊  ချမ်းအေးဝင်း၊ ဂျီတုန်း၊ သုတ (Cyclone)၊  ကိုရဲလွင်(မဇ္ဈိမလှိုင်း)၊ တေးရေး ကိုနေ၀င်း၊ ဆောင်းဦးလှိုင်၊ သားထွေး၊ ကောင်းပြည့်၊ ကျားပေါက် (Big Bag)၊ နိုင်ဇော် (Lazy Club)၊ ကိုရဲလွင် (မဇ္ဈိမလှိုင်း) စသည့် ဂီတအနုပညာရှင်များသည်လည်း လူမှုရေး လုပ်ငန်းများတွင် အင်တိုက်အားတိုက် ပါဝင်လာသည်ကို တွေ့ရသည်။

ပြေတီဦး၊ ရဲတိုက်စသည့် အနုပညာရှင်များ ဖောင်ဒေးရှင်း တည်ထောင်၍ လူမှုရေးလုပ်ငန်းများ ဆောင်ရွက်နေခြင်းနှင့် အနုပညာရှင်များ လူမှုရေးလုပ်ငန်းများတွင် စိတ်ပါဝင်စားလာခြင်းကို နာရေးကူညီမှုအသင်း ထူထောင်ထားသူ သရုပ်ဆောင် ဦးကျော်သူက ထောက်ခံသည်ဟု ပြောသည်။
“အနုပညာရှင်ဆိုတာ ပြည်သူလူထုက အာရုံစိုက်နေတာ။ တိုင်းပြည်ရဲ့ မျက်နှာဖုံးလို့ ခေါ်မယ်ဆိုလည်း ရတယ်။ လူမှုရေး ကိစ္စတွေကို ထိထိရောက်ရောက်လေး လုပ်ပေးနိုင်တယ်ဆိုရင်တော့ အကောင်းဆုံးပါပဲ” ဟု ၎င်းက ပြောသည်။

ရုပ်ရှင် သရုပ်ဆောင် ဦးကျော်သူသည် ၂၀၀၁ ခုနှစ် ဇန်န၀ါရီလတွင် နာရေးကူညီမှု အသင်းကို စာရေးဆရာ၊ ဒါရိုက်တာကြီး ဦးသုခ၏ လမ်းညွှန်မှုဖြင့် ဦးစီး တည်ထောင်ခဲ့ပြီး ၂၀၀၇ ခုနှစ် မတ်လတွင် သုခကုသိုလ်ဖြစ် ဆေးခန်း တိုးချဲ့ဖွင့်လှစ်ခဲ့သည်။

ဦးကျော်သူက လူမှုရေးလုပ်ငန်းများ၌ အကူအညီပေးရာတွင်လည်း ငွေကြေး စာရင်းဇယား တိကျရုံသာမက၊ အမှန်တကယ် အကူအညီလိုအပ်ပြီး ဒုက္ခရောက်သူများဆီ ထိထိရောက်ရောက် ပံ့ပိုးနိုင်ရန် အရေးကြီးကြောင်း၊ တခြား အဖွဲ့အစည်းများက ကြားမှ လှူပေးသည့် ကိစ္စမျိုး မဖြစ်သင့်ကြောင်း အကြံပြုသည်။

သရုပ်ဆောင် ရဲတိုက်သည် မတည်ငွေ ကျပ် သိန်း ၇၀ ဖြင့် ရဲတိုက်ဖောင်ဒေးရှင်းကို ထူထောင်လိုက်ပြီဖြစ်သည်။

ရဲတိုက်ဖောင်ဒေးရှင်းတွင် ကော်မတီဝင်အဖြစ်ပါဝင်သော ဦးရဲနိုင်မိုးက “နာဂစ်ဖြစ်တဲ့ ၂၀၀၈ ကတည်းက ရဲတိုက်က အခုလို လုပ်ချင်တယ်လို့ ပြောခဲ့ဖူးတယ်။ အဲဒီတုန်းကလည်း သူကိုယ်တိုင် လိုက်ကူညီတာတွေရှိတယ်။ အခုလ ၁ ရက်နေ့မှာ ကိုယ့်အဖွဲ့တွေချည်းပဲ အစည်းအဝေးလေး လုပ်ပြီး တည်ထောင်ဖြစ် သွားတာပါ” ဟု ပြောသည်။

သဘာဝ ဘေးအန္တရာယ် ကျရောက်ပါက အမြန်ဆုံးကူညီနိုင်ရန်၊ လေလွင့်ကလေးငယ်များဘ၀ ပြန်လည်ထူထောင်ရန်နှင့် ပညာရေး၊ ကျန်းမာရေး ကူညီမှုများပေးရန် ရဲတိုက်ဖောင်ဒေးရှင်းကို တည်ထောင်ခဲ့ခြင်းဖြစ်သည်ဟု သိရသည်။

ရဲတိုက် ဖောင်ဒေးရှင်းကို အသိပေး မိတ်ဆက်သည့် အခမ်းအနားအား လာမည့် ဇန်န၀ါရီလ ၁၇ ရက်နေ့တွင် ကုန်သည်ကြီးများဟိုတယ်၌ ကျင်းပရန် စီစဉ်ခဲ့သော်လည်း အစီအစဉ်ပျက်ခဲ့ပြီး ဖေဖော်ဝါရီလ ၁ ရက်နေ့တွင် ရွှေ့ဆိုင်း  ကျင်းပမည်ဟု ဦးရဲနိုင်မိုးက ရှင်းပြသည်။

ရဲတိုက်ဖောင်ဒေးရှင်း ကော်မတီအဖွဲ့ဝင်များအဖြစ် စာရေးဆရာ ကျော်ရင်မြင့်၊ ဆာတိုရီ ဗီဒီယိုထုတ်လုပ်ရေးမှ ဒါရိုက်တာ ရီဇော်၊ အောင်သမာဓိရွှေဆိုင်မှ ဦးအောင်၊ သတင်းစာဆရာ ဦးရဲနိုင်မိုး၊ ဂရပ်ဖစ်ဒီဇိုင်း ပညာရှင် ဦးစိုးဝင်းငြိမ်းတို့ ပါဝင်ဆောင်ရွက်နေသည်။

“အောင်သမာဓိ ရွှေဆိုင်ပိုင်ရှင်ကိုတော့ ရဲတိုက်ဖောင်ဒေးရှင်းရဲ့ ဘဏ္ဍာရေးမှူးအဖြစ် သတ်မှတ်ထားပါတယ်” ဟု ဦးရဲနိုင်မိုးက ပြောသည်။

သရုပ်ဆောင်ရဲတိုက်သည် ရခိုင်ပြည်နယ်သို့ ကားရိုက်သွားနေရသည်ဟု သိရပြီး ဧရာဝတီနှင့် ဖုန်းအဆက်အသွယ် မရရှိပေ။

နာမည်ကြီး သရုပ်ဆောင် ပြေတီဦးသည် ပြေတီဦး ပညာရေး ဖောင်ဒေးရှင်းကို ၂၀၀၉ ခုနှစ် နိုဝင်ဘာလ ၃၀ ရက်နေ့၊ ၎င်း၏အသက် ၃၁ နှစ်ပြည့် မွေးနေ့တွင် မတည်ငွေ ကျပ် သိန်း ၁၀၀ ဖြင့် စတင်တည်ထောင်ခဲ့သည်။

ပြီးခဲ့သည့် ၂၀၁၀ နိုဝင်ဘာလ ၃၀ ရက်နေ့က စတင်ကာ ၂၀၁၀ - ၁၁ ပညာသင်နှစ်တွင် ဆေးတက္ကသိုလ် တက်ရန် အခက်အခဲရှိသည့် ကျောင်းသား၊ ကျောင်းသူ ၅၁ ဦးထဲမှ ၁၀ ဦးအား ရွေးချယ်၍ ကျောင်းပြီးသည်အထိ တလလျှင် ကျပ် ၅ သောင်းနှုန်းဖြင့် တဦးစီကို ထောက်ပံ့ပေးလျက် ရှိသည်။

ပညာရေး ထောက်ပံ့ကြေး ပေးသည့်နေရာတွင်လည်း ကြားပွဲစားများရှိကြောင်း၊ အမှန်တကယ် ဆင်းရဲပြီး ပညာရေးကို လိုလားသည့် ကျောင်းသား၊ ကျောင်းသူများကို ထောက်ပံ့နိုင်ရန်နှင့် သေချာစွာ ကွင်းဆင်းလေ့လာရန် လိုအပ်ကြောင်း ဦးကျော်သူက ပြောသည်။

ပြေတီဦး ပညာရေးဖောင်ဒေးရှင်းက ထောက်ပံ့ကြေးရသည့် ကျောင်းသား၊ ကျောင်းသူများသည် စာမေးပွဲကျရှုံးခြင်း မရှိရဘဲ တနှစ်တတန်း မှန်မှန်အောင်မြင်ရမည်ဖြစ်သည်။

ကျရှုံးခဲ့လျှင် ကျရှုံးသည့် နှစ်မှ စပြီး ထောက်ပံ့ငွေ ရပ်ဆိုင်း ခံရမည်ဖြစ်ကာ၊ ကျောင်းခေါ်ကြိမ် မပြည့်၍ စာမေးပွဲ မဖြေရသူများကိုလည်း ထောက်ပံ့ငွေ ရပ်ဆိုင်းမည်ဟု သိရသည်။

ထို့ပြင် ထောက်ပံ့ငွေရသည့် ကျောင်းသား၊ ကျောင်းသူများသည် ကျောင်းမပြီးခင် အိမ်ထောင်ပြုခြင်းကို ခွင့်မပြုသည့်အပြင်  ပါတီနိုင်ငံရေးများ မလုပ်ရန်လည်း တားမြစ်ထားသည်။

ထောက်ပံ့ကြေးဖြင့် ဘွဲ့ရသည်အထိ ပညာသင်ခဲ့ပါက မြန်မာနိုင်ငံအတွင်း အနည်းဆုံး ၅ နှစ် ဆေးဝါး ကုသပေးရမည် ဖြစ်သည်။ ၅ နှစ်အတွင်း ပြည်ပနိုင်ငံများသို့ ထွက်ခွာသွားခြင်းမရှိရဟု စည်းကမ်းများ ထုတ်ထားသည်။

“NGO လို့ အမည်ခံပြီး အစိုးရလက်အောက်ခံ ဖြစ်နေမယ်ဆိုရင်တော့ အလကားပဲ” ဟု ဦးကျော်သူက ပြောသည်။

ယခုလ ၂၃ ရက်နေ့တွင် ကျင်းပ ပြုလုပ်မည့် အကယ်ဒမီပေးပွဲ၌ ဆုရရှိရန် ရေပန်း အစားဆုံးဖြစ်နေသော သရုပ်ဆောင် နေတိုးကလည်း သရုပ်ဆောင်များ ယခုကဲ့သို့ ဖောင်ဒေးရှင်းများ တည်ထောင်ကာ လူမှုရေးလုပ်ငန်းများ လုပ်ဆောင် ခြင်းအတွက် ဂုဏ်ယူသည်ဟု ပြောသည်။

“ကျနော့်အနေနဲ့တော့ ဖောင်ဒေးရှင်းကြီး တည်ထောင်ပြီး လုပ်သွားဖို့မရှိပါဘူး။ ကျနော် သဒ္ဒါတရားနဲ့ ညီမျှတဲ့ အတိုင်း အချိန်အခါနဲ့ ဖြစ်ပေါ်လာတဲ့ အခြေအနေပေါ် မူတည်ပြီး လူမှုရေးလုပ်ငန်းတွေ လုပ်သွားဖို့ပဲရှိပါတယ်” ဟု ၎င်းက ဆိုသည်။

< Prev		Next >