စစ်အစိုးရအပါအဝင် ၎င်းတို့နှင့်နီးစပ်သူများကို ဒဏ်ခတ်ထားသည့် စီးပွားရေးပိတ်ဆို့မှုသည် NLD ၏ စာရင်းပြုစု မှတ်တမ်းတင်ထားချက်များအရ ၎င်းတို့ကိုသာ ထိခိုက်စေပြီး မြန်မာလူထုအပေါ် အကျိုးသက်ရောက်မှု မရှိဟု ဒေါ်အောင်ဆန်းစုကြည်က ပြောဆိုကြောင်း NLD ၏ ပြောရေးဆိုခွင့်ရှိသူ ဦးဉာဏ်ဝင်းက ဆိုသည်။
NLD ပါတီဝင်တဦးက အနောက်နိုင်ငံများမှ ထားရှိသည့် စီးပွားရေးပိတ်ဆို့မှုများကို ၎င်းတို့ ပစ်မှတ်ထားသည့် စစ်အစိုးရ အပါအဝင် ၎င်းတို့နှင့် နီးစပ်သူများကိုသာ အတိအကျ ထိခိုက်စေလိုကြောင်း ပြောသည်။
၎င်းက “စစ်အစိုးရကို အထိနာစေတဲ့ စီးပွားရေးပိတ်ဆို့မှုမျိုးတွေကို အနောက်နိုင်ငံတွေက ဆက်လက် ထိန်းသိမ်းထားသင့်ပါတယ်။ ဒါပေမယ့် ပြည်သူတွေကို အထိနာစေတဲ့ စီးပွားရေးပိတ်ဆို့မှုမျိုးကိုတော့ ရုတ်သိမ်းသင့်တယ်” ဟု ဆိုသည်။
မြန်မာ့အရေးလေ့လာသူများ၊ ပညာရှင်များနှင့် နိုင်ငံရေးသမားများအကြားတွင် စီးပွားရေးပိတ်ဆို့မှုများ ရုပ်သိမ်းရေးအတွက် စကားနိုင်လုနေကြဆဲဖြစ်ကြောင်းလည်း သိရှိရသည်။
နိုင်ငံရေးသမားအများစုကမူ စစ်အစိုးရအပေါ် စီးပွားရေးပိတ်ဆို့ထားသော်လည်း မြန်မာနိုင်ငံတွင် စွမ်းအင် အခန်းကဏ္ဍများ၌ အကြီးအကျယ် ရင်းနှီးမြှုပ်နှံထားသည့် နိုင်ငံများဖြစ်သော တရုတ်၊ ထိုင်းနိုင်ငံတို့နှင့် ပိုမိုနီးစပ်သွားစေသည်ဟု သုံးသပ်ကြသည်။
စစ်အစိုးရကို ပထမဆုံးအကြိမ်အဖြစ် ဥရောပသမဂ္ဂက ၁၉၉၆ ခုနှစ်တွင် စီးပွားရေးပိတ်ဆို့မှု စတင်ခဲ့ပြီး ၎င်းတို့၏ စီးပွားရေး ပိတ်ဆို့မှု သက်တမ်းကို နှစ်စဉ် ဧပြီလတွင် သက်တမ်းတိုးသည်။
၂၀၀၇ ခုနှစ် ရွှေဝါရောင်တော်လှန်ရေးအပြီးတွင် စစ်အစိုးရနှင့် အပေါင်းအပါများအား ဥရောပနိုင်ငံများသို့ ဝင်ခွင့် ပိတ်ပင်ခြင်း၊ ဥရောပနိုင်ငံများတွင် အခြေချနေထိုင်သည့် စစ်အစိုးရ၏ မိသားစုဝင်များ၊ နီးစပ်သူများကိုပါ စီးပွားရေးအရ ပိတ်ဆို့ အရေးယူမှုများ ပြုလုပ်ခဲ့ကြောင်း သိရသည်။
အရှေ့အာရှနှင့် ပစိဖိတ်ရေးရာ အမေရိကန် လက်ထောက် နိုင်ငံခြားရေး ၀န်ကြီး ကာ့တ် ကမ်းဘဲလ် ကလည်း စစ်အစိုးရ အပေါ်ထားရှိသည့် စီးပွားရေးပိတ်ဆို့မှုများကို ရုပ်သိမ်းရန် အချိန်စောသေးသည်ဟုလည်းကောင်း၊ စစ်အစိုးရအနေဖြင့် NLD ပါတီကို တရားဝင်ပါတီအဖြစ် အသိမှတ်ပြုရန် အမေရိကန်အစိုးရက ဆက်လက်ဖိအားပေးသွားမည် ဟုလည်းကောင်း ပြီးခဲ့သည့် ဖေဖော်ဝါရီလ ၃ ရက်နေ့တွင် ပြောဆိုခဲ့သည်။
| < Prev | Next > |
|---|
