“ကျနော်တို့ ကာတွန်းဆရာတွေဟာ ငွေကြေးချို့တဲ့ကြတယ်လေ။ ဒီနှစ်အတွက် ကန်တော့ပွဲမလုပ်ဖြစ် လောက်တော့ဘူးတောင် ထင်နေတာ။ အခုမှ ဘေဘီမိုင်းလ် ကလေးဆေးဝါး ထုတ်လုပ်ရေးက ကူညီပံ့ပိုးလာလို့ လူငယ် ကာတွန်းဆရာတွေ ဦးစီးပြီး ရန်ပုံငွေ ရှာကြမှာပါ” ဟု ကာတွန်း အော်ပီကျယ်က ဆိုသည်။
ရန်ကုန် ကန်တော်ကြီးအတွင်းရှိ လက်မှုကုန်းတွင် မတ်လ ၁၃ ရက်နေ့ နံနက် ၁၀ နာရီမှ ညနေ ၆ နာရီအထိ ကာတွန်းဆရာများက ၎င်းတို့ ရေးဆွဲထားသည့် ကာတွန်းများကို ပြသကြမည် ဖြစ်ကာ လာရောက်ကြည့်ရှုသူ များထဲမှ ပုံတူ ရုပ်ပြောင် ရေးဆွဲလိုသူ များကိုလည်း အခကြေးငွေယူ၍ ရေးဆွဲပေးသွားမည် ဖြစ်ကြောင်း သိရသည်။
သက်ကြီး ကာတွန်းဆရာများ ကန်တော့ပွဲ ဖြစ်မြောက်ရေးအတွက် ဆောင်ရွက်နေသော ကာတွန်း ၀လုံး ကလည်း “ရေးဆွဲပေးမယ့် နှုန်းထားကိုတော့ ကာတွန်းဆရာတွေ ညှိနှိုင်းနေဆဲပါပဲ။ ရန်ပုံငွေ ရှာတဲ့ပွဲဆိုတော့ တပုံကို ကျပ် ၁ ထောင်နှုန်း လောက်နဲ့ပဲ ရေးဆွဲပေး ဖြစ်မယ်ထင်ပါတယ်” ဟု ပြောသည်။
မြန်မာ ကာတွန်းဆရာများသည် ကာတွန်းပညာရှင် ဦးဖေသိန်းနေအိမ်တွင် နှစ်စဉ်နှစ်တိုင်း သက်ကြီး ကန်တော့ပွဲ ကျင်းပလေ့ ရှိခဲ့ပြီး ယခုနှစ်သည် ၃၆ ကြိမ်မြောက် ကာတွန်းပညာရှင် ကန်တော့ပွဲ ဖြစ်သည်။
“ဒီနှစ်ကတော့ ဘယ်နေရာမှာ ကျင်းပဖြစ်မယ်ဆိုတာ မသိသေးဘူး။ ရန်ပုံငွေ ရတဲ့အပေါ်မှာ မူတည်ပြီး နေရာရွေးကြမှာပါ။ ဒီနှစ် အသက် ၆၀ ကျော်တဲ့ ကာတွန်းဆရာတွေကို ကန်တော့မှာပါ” ဟု ကာတွန်း အော်ပီကျယ်က ဆိုသည်။
ယခုနှစ် ကန်တော့ခံမည့် ကာတွန်းပညာရှင်များ စာရင်းတွင် ကာတွန်း တင်အောင်နီ၊ ငွေကြည်၊ ရွှေမင်းသား၊ မြေဇာ စသည့် နာမည်ကြီး ကာတွန်းဆရာများ အပါအဝင် ကာတွန်းဆရာပေါင်း ၂၀ ခန့်ကို ကန်တော့ကြမည် ဟု သိရသည်။
မြန်မာ သက်ကြီး စာပေပညာရှင်များ ကန်တော့ပွဲကို စစ်အစိုးရက ဦးဆောင်၍ နှစ်စဉ် ကျင်းပပေးလေ့ ရှိသော်လည်း ကာတွန်း ပညာရှင်များ ပါဝင်လေ့မရှိပေ။
ယခုနှစ် ကျင်းပမည့် သက်ကြီး ကာတွန်းပညာရှင်များ ကန်တော့ပွဲအတွက် ရန်ပုံငွေရှာဖွေပွဲသို့ ကာတွန်းချစ်သူများ လာရောက် အားပေးကြပါရန် ကာတွန်းဆရာများက ဆော်သြထားသည်။
| < Prev | Next > |
|---|
