၎င်းတို့သည် အသက် ၂၂ နှစ် နှင့် ၂၄ နှစ်အရွယ် လူငယ်များ ဖြစ်ကြောင်း ကွင်းစလန် ပြည်နယ် ကျန်းမာရေးဌာန ပြောခွင့် ရပုဂ္ဂိုလ်တဦးက Sydney Morning Herald သတင်းစာသို့ ပြောပြသည်။
ထိုလူငယ် နှစ်ဦးသည် ရေခဲပုံး အတွင်းရှိ ငါးနှင့် ရေကို စားသောက်ကာ အသက် ရှင်နေခဲ့ခြင်း ဖြစ်သည်ဟု အာဏာပိုင်များကို ပြောပြကြောင်း telegraph.co.uk အင်တာနက် စာမျက်နှာတွင် ဖော်ပြထားသည်။ လှေပေါ်တွင် လိုက်ပါခဲ့သော တခြား မြန်မာပြည်သား ၁၁ ယောက်၊ ထိုင်းနိုင်ငံသား ၇ ယောက်တို့မှာ ရေနစ် သေဆုံးသွားပြီဟု ယူဆရကြောင်းလည်း ရေးသားထားသည်။
တိမ်းမှောက် သွားသော ငါးဖမ်း လှေပေါ်တွင် အသက်ကယ် အင်္ကျီ၊ အသက်ကယ် လှေများ မရှိဟု ဆိုသည်။
“ဒီလောက်ကျယ်တဲ့ ပင်လယ်ကြီးထဲမှာ သူတို့ ၂ ယောက်ကို ရှာတွေ့လိုက်တာက တော်တော်လေး အံ့သြဖို့ ကောင်းတယ်”ဟု သြစတေးလျ နိုင်ငံ ရေကြောင်း သွားလာရေး လုံခြုံမှု ဆိုင်ရာဌာန ပြောခွင့်ရ အမျိုးသမီး Tracey Jiggins က ပြောပြသည်။
၎င်းတို့အား ဆေးဝါးကုသပေးပြီး ဖြစ်ကြောင်း Jiggins က ပြောသည်။ ယနေ့ နေ့လယ်ပိုင်းတွင် သြစတေးလျ လူဝင်မှု ကြီးကြပ်ရေး ဌာနသို့ လွှဲပြောင်း ပေးမည်ဟု သိရသည်။
အေပီ သတင်းဌာနက ငါးဖမ်း လုပ်သားနှစ်ဦးနှင့် ပတ်သက်ပြီး ကင်ဘာရာ မြို့တော်ရှိ မြန်မာသံရုံးသို့ ဆက်သွယ် မေးမြန်းရာတွင် အဆိုပါ မြန်မာနိုင်ငံသားနှစ်ဦးနှင့် အဆက်အသွယ် မလုပ်မရ သေးကြောင်း သံအရာရှိ တဦးက ဖြေကြားခဲ့သည်။
၎င်းတို့ နှစ်ဦးကို လွန်ခဲ့သည့် လေးရက်က သြစတေးလျနိုင်ငံ Horn ကျွန်း၏ အနောက် တောင်ဘက်တွင် ကမ်းခြေစောင့် လေယာဉ် တစီးက စတင်တွေ့ရှိခဲ့သည်ဟု ဆိုသည်။ အဆိုပါ ကျွန်းသည် သြစတေးလျနှင့် အင်ဒိုနီးရှား နိုင်ငံကြားတွင် တည်ရှိသည်။
ထိုင်းနိုင်ငံ တောင်ပိုင်းတွင် နေထိုင်ပြီး မြန်မာပြည်သား ရေလုပ်သားများနှင့် နီးစပ်သည့် ကိုထူးချစ်က “ထိုင်း ပင်လယ် ကမ်းရိုးတန်းမှာတော့ ငါးဖမ်းလှေ မှောက်တာတွေ ရှိတယ်။ သြစတေးလျ နိုင်ငံနားအထိ ရောက်ပြီး လှေမှောက်တယ် ဆိုတာတော့ အခုမှ ကြားဖူးတယ်” ဟု ဆိုသည်။
မြန်မာ သင်္ဘော သားများအရေး လုပ်ကိုင်နေသည့် ထိုင်း အခြေစိုက် မြန်မာနိုင်ငံ ပင်လယ်ပျော်များ သမဂ္ဂမှ ပြောခွင့်ရ ပုဂ္ဂိုလ် ကိုသူရကလည်း “ငါးဖမ်း လုပ်သားတွေ လှေမှောက်ပြီး ပင်လယ်ထဲမှာ ဒုက္ခရောက်တဲ့ ဟာတော့ ဒါ ပထမဆုံး အကြိမ်ပဲ ကြားဖူးတာ”ဟု ဧရာဝတီသို့ ပြောပြသည်။
< Prev | Next > |
---|