အဆိုပါ သင်တန်းတွင် NLD အဖွဲ့ဝင် သင်တန်းသား ၄၀ ကို ဟံသာဝတီ သတင်းစာဆရာကြီး ဦးဝင်းတင်နှင့် သတင်းစာဆရာ ဦးအုန်းကြိုင်တို့က ဦးစီးသင်ကြားမည် ဖြစ်ပြီး ဖျာပုံ နီလုံဦး၊ မုံရွာအောင်ရှင် စသည့် စာရေးဆရာများလည်း လာရောက် သင်ကြားပေးမည်ဟု သိရသည်။
သတင်းစာပညာသည် အရေးပါပြီး သတင်းစာပညာ လေ့လာခြင်းသည် လူ့အခွင့်အရေးရရှိရန် ကြိုးစားနေခြင်းပင် ဖြစ်ကြောင်း မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က သတင်းစာသင်တန်း ဖွင့်ပွဲတွင် ပြောသည်။
“ကျမတို့ရဲ့ မူတွေဟာ လူအခွင့်အရေးအတွက် မူတည်တယ်။ ဒီမိုကရေစီကို တန်ဖိုးထားတယ်၊ လူ့အခွင့်အရေးအတွက် လုပ်တာကို အမှန်တရားအတွက် လုပ်တယ်လို့ ကျမယုံကြည်တယ်။ ဒါကြောင့် ကျမက လူ့အခွင့်အရေးအတွက် လုပ်တဲ့ စာနယ်ဇင်း လောကက ပုဂ္ဂိုလ်တွေကို အရမ်းကျေးဇူးတင်တယ်” ဟု ၎င်းက ဆိုသည်။
အဆိုပါ သတင်းစာ သင်တန်း တက်ရောက်ရန်အတွက် ပြည်နယ်နှင့် တိုင်းတခုစီမှ NLD အဖွဲ့ဝင် ၃ ဦးစီအား ဖိတ်ကြားခဲ့ကြောင်း သိရသည်။
“လူငယ်အားလုံး သတင်းစာ ဆရာတွေဖြစ်ရမယ်လို့ ပြောတာမဟုတ်ပါဘူး။ မီဒီယာလောကကို ဘယ်လို ချဉ်းကပ်ရမလဲဆိုတာ သိဖို့ပါ” ဟု ဒေါ်အောင်ဆန်းစုကြည်က ဆိုသည်။
ဝေးလံသော ဒေသများမှ NLD အဖွဲ့ဝင်များလည်း သတင်း အချက်အလက်ကို သိရန်၊ နားလည်စေရန်အတွက် ယင်း သတင်းစာသင်တန်းကို ဖွင့်လှစ် ပေးရခြင်းဖြစ်ကြောင်း သူက ဆက်ပြောသည်။
“ကျမတို့က ချောင်ပိတ်မိနေတဲ့ကြွက်လိုပဲ။ ဘာမှကို မသိ နားမလည်၊ ဖွံ့ဖြိုးမှုလည်းမရှိဘူး။ ပြီးတော့ ကိုယ့်နေရာမှာ ဘယ်လိုဆက်သွယ်ပြီး ပြန်ကြားရမလဲ ဆိုတာမသိဘူး” ဟု မန္တလေးတိုင်း မှ NLD လူငယ်တာဝန်ခံ ၂ မသန္တာစိုးက
ပြောသည်။
NLD သတင်းစာသင်တန်းတွင် သတင်းရေးသားနည်း၊ သတင်းစာကျင့်ဝတ်၊ နိုင်ငံရေးသမား ကျင့်ဝတ်၊ စာပေလွတ်လပ်ခွင့်၊ အယ်ဒီတာနှင့် မဂ္ဂဇင်းများအကြောင်း၊ citizen journalist များ အကြောင်းနှင့် တခြားသော သတင်းစာ ပညာနှင့် ပတ်သက်သည့် အကြောင်းအရာများကို သင်ကြားပေးမည်ဖြစ်ကြောင်း သိရှိရသည်။
NLD အဖွဲ့ချုပ်ရုံးတွင် အပတ်စဉ် ဗုဒ္ဓဟူးနေ့နှင့် သောကြာနေ့တိုင်း၌ အင်္ဂလိပ်စာ သင်တန်းနှင့် ကွန်ပျူတာ သင်တန်းများ ဖွင့်လှစ်ပေးထားသည်။
| < Prev | Next > |
|---|
