အဖမ်းခံရသူ ကိုအောင်ကိုလတ်မှာ အသက် ၃၀ ခန့်ရှိ၍ ရေနီမြို့နှင့် အနီးတ၀ိုက်တွင် နှစ်လုံးထီ ရောင်းချသူတဦးဖြစ်ပြီး ဖခင်မှာ လေ့ကျင့်ရေးတပ်မှ ရဲဘော်တဦးဖြစ်ကြောင်း၊ ပြီးခဲ့သည့် စနေနေ့ အခင်းဖြစ်ပွားစဉ်က မြို့မ ဈေးအိမ်သာအတွင်း ၎င်း၏ မှတ်ပုံ တင် ကျန်ရစ်ခဲ့သည်ကို တွေ့ရသည့်အပြင် မသင်္ကာဖွယ်ရာ လူနှစ်ဦးကိုလည်း ဖမ်းဆီးမိကြောင်း၊ အဆိုပါ ကွင်းဆက်အရ ကိုအောင်ကိုလတ် ကိုလည်း ဆက်လက် ဖမ်းဆီးခြင်းဖြစ်ကြောင်း နေပြည်တော် သတင်းတပ်ဖွဲ့နှင့် နီးစပ်သူတဦးက ပြောပြသည်။
“ဗုံးပေါက်ပြီးတဲ့နောက်ပိုင်း သူကပုန်းနေတာ၊ သူ့ဓာတ်ပုံတွေ ဖြန့်ပြီး ရဲစခန်းတိုင်းကို ပို့ထားတယ်၊ သူက အားလုံးငြိမ်ပြီဆိုပြီး အိမ်ပြန် ပိုက်ဆံယူတော့မှ ကင်းပုန်းဝပ်ပြီး ဖမ်းလိုက်တာ”ဟု ၎င်းက ဆိုသည်။
ရေနီမြို့ခံတဦးကလည်း ကိုအောင်ကိုလတ်သည် ဗုံးဖောက်ခွဲမှု မသင်္ကာ၍ ဖမ်းဆီးခံရခြင်း ဖြစ်ကြောင်း၊ ည ကိုးနာရီ နောက်ပိုင်း တပ်တွင်းရှိ ဖခင်ထံသို့အလာ စောင့်၍ ဖမ်းဆီးခြင်းဖြစ်ကြောင်း ပြောဆိုသည်။
အဆိုပါ သတင်းနှင့် ပတ်သက်၍ နေပြည်တော် အထူးသတင်းတပ်ဖွဲ့အား ဆက်သွယ်မေးမြန်းသော်လည်း ဖြေဆိုရန် ငြင်းဆိုသည်။
ပြီးခဲ့သည့် မေလ ၁၈ ရက်နေ့တွင် နေပြည်တော်အလွန် ဆင်သေဘူတာ၌ ရန်ကုန်-မန္တလေး အမှတ် ၃ အဆန် ရထားပေါ်တွင် ဗုံး ပေါက်ကွဲမှု ဖြစ်ပွားခဲ့ရာ၂ ဦး ပွဲချင်းပြီး သေဆုံးကာ ၉ ဦး ဒဏ်ရာ ရခဲ့သည်။
ယင်းဖောက်ခွဲမှုနှင့်ပတ်သက်၍ ကရင်ပြည်နယ် သံတောင်မြို့နယ်မှ လူတဦးကို အာဏာပိုင်များက ဖမ်းဆီးခဲ့ပြီး ကရင်အမျိုးသား အစည်းအရုံး(KNU) ၏ လက်ချက်ဖြစ်ကြောင်း ဇွန်လ ၉ ရက်နေ့ထုတ် အစိုးရသတင်းစာများက စွပ်စွဲရေးသားခဲ့သည်။
ယခု အကြိမ် ဗုံးပေါက်ကွဲမှုသည် အစိုးရသစ်တက်လာပြီးနောက် ဒုတိယအကြိမ်မြောက်ဖြစ်ပြီး နေပြည်တော်တွင်မူ တတိယအကြိမ်မြောက် ဗုံးကွဲခြင်းဖြစ်သည်။
| < Prev | Next > |
|---|
