မေလ ၁၉ ရက်နေ့ထုတ် True News ဂျာနယ် မျက်နှာဖုံးတွင် ဖော်ပြထားသော သတင်းစာဆရာကြီး လူထုစိန်ဝင်း၏ ဆောင်းပါး ကောက်နုတ်ချက်နှင့် ပတ်သက်ပြီး ခံဝန်ချက် လက်မှတ်ထိုးခဲ့ရသည်ဟု သိရသည်။ အဆိုပါ ကောက်နုတ်ချက်တွင် “ရေးသင့်ရေးထိုက်လို့ ရေးတာတွေကို အရေထူထူနဲ့ ခံနိုင်ရည်ရှိတဲ့ အစိုးရဆိုတာ ဘယ်မှာရှိတာမှတ်လို့၊ ဒီတော့ - - ဒီမိုကရေစီ အစိုးရ လက်ထက်လည်း သတင်းသမားကတော့ ထောင်ထဲ ရောက်မှာပါပဲ” ဟု ဖော်ပြထားသည်။
အဆိုပါ ကောက်နုတ်ချက်မှာ နိုင်ငံရေးလုပ်တယ်ဆိုတာ လွယ်တယ်ထင်လား အမည်ရှိ ဆောင်းပါးမှ ကောက်နုတ်ထားခြင်း ဖြစ်သည်။
ဂျာနယ်၏ ၀န်ထမ်းတဦးက မေလ ၁၉ ရက်နေ့ထုတ် True News ဂျာနယ် ခေါ် သစ္စာဂျာနယ်ကို အင်းစိန်ထောင်ရှေ့ရှိ လူအများကြားသို့ သွားရောက် ရောင်းချခဲ့ကြောင်း၊ ထိုသို့ ရောင်းချစဉ် “မှန်တာ ပြောရဲတာ သစ္စာ၊ ရေးရဲတာ သစ္စာ” ဟု ကြော်ငြာပြီး ရောင်းချခဲ့သည်ဟု သတင်းရရှိသည်။
ထောင်ရှေ့ရှိ လူအုပ်သည် ဒေါ်အောင်ဆန်းစုကြည် အင်းစိန်ထောင်အတွင်း တရားရုံးတွင် အမှုရင်ဆိုင်နေရသည့်အတွက် သွားရောက် စောင့်ဆိုင်းနေကြသည့် နိုင်ငံရေးသမားများ ဖြစ်သည်။
ထောင်ရှေ့တွင် ဂျာနယ်သွားရောက် ရောင်းချသူသည် မေလ ၂၈ ရက်နေ့တွင် ဖမ်းဆီးခံရပြီး ချက်ချင်း ပြန်လည် လွတ်မြောက်လာသည်ဟု ဆိုသည်။
ယခုနှစ် နယ်စည်းမခြား သတင်းစာဆရာများအဖွဲ့က ထုတ်ပြန်သည့် အစီရင်ခံစာ တစောင်တွင် မြန်မာပြည်သည် စာနယ်ဇင်းသမားများ၊ ဘလော့ဂါများအတွက် အကျဉ်းထောင်ကြီးတခု ဖြစ်နေကြောင်း ရေးသား ဖော်ပြထားသည်။
| < Prev | Next > |
|---|
