ဧရာဝတီ

ရန်ကုန်မြို့တွင်းရှိ လက်ဖက်ရည် ဆိုင်များနှင့် စားသောက် ဆိုင်များတွင် ရှစ်ပေ၊ ဆယ်ပေ ဂြိုဟ်တု စလောင်းများကို တပ်ဆင်ကြည့်ရှုခြင်း မပြုရန် အာဏာပိုင်များက လတ်တလော တားဆီးမှုများ ပြုလုပ်နေကြောင်း လုပ်ငန်းရှင်များနှင့် ရန်ကုန်မြို့ခံများက ပြောသည်။

လက်ဖက်ရည်ဆိုင်ပိုင်ရှင်များနှင့်စားသောက် ဆိုင်ပိုင်ရှင်များအား ၎င်းတို့၏ဆိုင်များတွင် Family Entertainment Group မှထုတ်လွှင့်ပြသနေသော ရုပ်သံလိုင်းများကိုသာပြသရန် ညွှန်ကြားထားကြောင်းလည်း သိရသည်။

“စလောင်းတွေဖြုတ်ရမယ်။ အဓိက ကတော့ပြည်ပကလွှင့်တဲ့ DVBရုပ်သံလိုင်းမကြည့်ဖို့အတွက် ပြောသွားတယ်။ စလောင်းအစား 5 Movies ပြပေါ့တဲ့”ဟု ရန်ကုန် သာကေတမြို့နယ်အတွင်းမှ လက်ဖက်ရည်ဆိုင် ပိုင်ရှင် တစ်ဦး က ပြောသည်။

DVB ရုပ်သံလိုင်းသည် ၂၀၀၇ ရွှေဝါရောင်တော်လှန်ရေးနှင့် ၂၀၀၈ ခုနှစ်နာဂစ်မုန်တိုင်းတို့တွင် ပြည်တွင်း၌ဖြစ် ပေါ်ခဲ့သောဖြစ်ရပ်များကိုနေချင်းဖော်ပြနိုင်ခဲ့ပြီး နာဂစ်ဒဏ်ခံခဲ့ရသော ဒေသခံများ၏အခြေအနမှန်များကို ပြည် တွင်း ပြည်ပ မှ သိရှိရန် ဖော်ပြနိုင်ခဲ့သည်။

“စလောင်းတတ်ထားရင် လိုင်း၁၇၀ လောက်ကြည့်လို့ ရတယ်။ 5 Movies ကအများဆုံး ၂၀ လောက်ပဲကြည့်လို့ရ တာလေ။ ကျမတို့ ကတော့ အိမ်ရှေ့တတ်လို့ မရရင် အိမ်နောက် ပြောင်းတတ်မှာပဲ”ဟု သာကေတမြို့နယ်မှ အိမ်ရှင်မ တစ်ဦးကပြောသည်။

ယခုကိစ္စနှင့်ပတ်သက်၍ မြန်မာ့ဆက်သွယ်ရေးလုပ်ငန်းသို့ ဧရာဝတီက ဆက်သွယ်မေးမြန်းရာ စလောင်းနှင့် ဆက်စပ်ပစ္စည်းများ တရားမဝင် တင်သွင်းဖြန့်ဖြူးရောင်းချနေမှုများကြောင့် အစိုးရအနေဖြင့် ကုန်သွယ်ခွန်၊ လိုင်စင်ကြေး၊ နှစ်စဉ်ကြေး စသည့် အခွန်ဘဏ္ဏာငွေဆုံးရှုံးမှုများဖြစ်ပေါ်နေကြောင်း၊ ထို့ကြောင့် တားမြစ်ရခြင်း ဖြစ်ကြောင်း တာဝန်ရှိသူတစ်ဦးက ဆိုသည်။

အဆိုပါ စလောင်းများကို ဘဏ်များ၊ စီးပွားရေးလုပ်ငန်းအဖွဲ့ အစည်းများ၊ သံတမန်များ၊ ဟိုတယ်များ၊ တက္ကသိုလ် များကိုသာ တရားဝင်လိုင်စင်ဖြင့် စိစစ် ခွင့်ပြုထားကြောင်း ၎င်းကပြောသည်။

ပြီးခဲ့သည့် ဖေဖော်ဝါရီလအတွင်းက ရန်ကုန်မြို့ နှင့် တခြားသောမြို့ ကြီးများတွင် မြန်မာ့ဆက်သွယ်ရေးလုပ်ငန်းသို့ တရားဝင် အခွန်ပေးဆောင်၍ ကြည့်ရှုနေသော ဂြိုဟ်တုစလောင်းများကို သက်တမ်းတိုးခွင့် ရပ်ဆိုင်းခဲ့သည်။

ယင်းဖေဖော်ဝါရီလအတွင်းကပင် နိုင်ငံပိုင် သတင်းစာများတွင် ဆောင်းပါးရှင် ကျော်ရဲမင်း၏ “အဆိပ်ပင်ကို ဆက်ပြီး ရေမလောင်းသင့်ပါ”ဆောင်းပါးတွင် “ကျနော်တို့ နိုင်ငံမှာ လွတ်လွတ်လပ်လပ်ကြီးကြည့်နေကြတဲ့ရှစ်ပေ စလောင်းကို အများပြည်သူတွေ တစ်ဦးချင်းဖမ်းယူ ကြည့်ရှုခွင့် လုံးဝမပေးထားဘူးဆိုတာပါပဲ”ဟု ရေးသားထား သည်။

ယခုကဲ့သို့ပြုလုပ်နေခြင်းမှာ အစိုးရက ၎င်းတို့၏လုပ်ရပ်များနှင့်ပတ်သက်ပြီး အများပြည်သူကို နားပိတ်၊ မျက်စိ ပိတ်ဖြစ်စေရန် ပြုလုပ်နေခြင်းသာ ဖြစ်ကြောင်း ပြည်တွင်း သတင်းဂျာနယ် အယ်ဒီတာတစ်ဦးက ပြောသည်။

စစ်အစိုးရ နေ့စဉ်ထုတ် သတင်းစာများနှင့် MRTV ,MRTV4,MWD တို့တွင် “VOA,BBC ရန်တိုက်ပေးနေသည်။ RFA,DVB သွေးထိုးနေသည်။ ခလောက်ဆန် အကောက်ကြံ လေလှိုင်းသံများ။ နားမယောင်လေနဲ့သတိထား” ဟူသော ဆောင်ပုဒ်များ ထုတ်လွှင့် ဖော်ပြထားသည်။

“သူတို့က DVBတို့ ၊VOA တို့ ကိုမကြည့်ဖို့ အဓိကပြောနေတာ။ သူတို့က အခုလို လိုင်းတွေကိုကြောက်တယ်၊ မီဒီယာကို မီဒီယာနဲ့တိုက်မယ်လို့ ပြောထားတယ်လေ”ဟု ရန်ကင်းမြို့ နယ်မှ နိုင်ငံရေးသမား တစ်ဦးကပြောဆို သည်။

< Prev		Next >