နာဂ ကျောင်းသားများ အဖွဲ့ (NSF) က အိန္ဒိယ ၀န်ကြီးချုပ် မာမိုဟမ်ဆင်း၊ ပြည်ထဲရေးဝန်ကြီးတို့နှင့် တွေ့ဆုံမှုအပြီးတွင် ထုတ်ဖော်ပြောကြားခဲ့ခြင်း ဖြစ်သည်။
“ဒေလီမှာ ၀န်ကြီးချုပ်နဲ့ တွေ့တဲ့ အချိန်မှာ သူ့တောင်းဆို ချက်တွေကြောင့် လမ်းပိတ်တာကို ခဏ ပြန်ဖွင့်ပေးဖို့ သဘောတူ လိုက်ပါတယ်” ဟု NSF ဥက္ကဌ Mutsiikhoyo Yhobu က ပြောကြားကြောင်း AFP သတင်းဌာနတွင် ဖော်ပြထားသည်။ ဗဟိုအစိုးရက တနင်္လာနေ့ စောစော ပိုင်းတွင် ပိတ်ဆို့ ဆန္ဒပြမှု များကို ရှင်းလင်းရန် အတွက် လုံခြုံရေး တပ်သား ၂၀၀၀ ကျော်ကို စေလွှတ် မည်ဟု ပြောဆိုခဲ့ပြီး သည့်နောက်၊ နာဂ ခေါင်းဆောင် များနှင့် ကျောင်းသား အဖွဲ့များက နယူးဒေလီရှိ အစိုးရအဖွဲ့နှင့် ယမန်နေ့ ညနေက တွေ့ဆုံ ဆွေးနွေး မှုများ ပြုလုပ်ခဲ့သည်။
NSF ၏ အကြံပေးပုဂ္ဂိုလ် Achumbemo Kikon ကလည်း ၀န်ကြီးချုပ် အပါအ၀င် တခြားသော အဖွဲ့အစည်းများ၊ လူပုဂ္ဂိုလ် များတို့၏ တောင်းဆိုချက်များကြောင့် လမ်းပိတ်ဆို့ ဆန္ဒပြမှုများကို ပြန်လည်စဉ်းစားခဲ့ကြောင်း တွေ့ဆုံမှုအပြီးတွင် သတင်းထောက် များကို ပြောဆိုခဲ့သည်။
ပိတ်ဆို့မှုများကို ယတိပြတ် ပြန်ဖွင့်ပေးရန်မှာမူ အချင်းဖြစ်ပွားရာ နေရာများတွင် ချထားသည့် ကွန်မန်ဒိုတပ်များကို ဖယ်ရှား ပေးရန်နှင့် တခြားတောင်းဆိုမှုများကို မဏီပူရ်အစိုးရ၏ တုံ့ပြန်မှုပေါ်တွင် မူတည်ကြောင်း၊ တောင်းဆိုချက်များ မရပါက ပိတ်ဆို့မှုများ ပြန်လုပ်မည်ဖြစ်ကြောင်း NSF က သတိပေး ထုတ်ပြန်ထားသည်။
အင်ဖားလ်မှ မြန်မာအမျိုးသားတဦးက “လမ်းတွေပြန်ဖွင့်မယ် သတင်းကြားတော့ အခု ဈေးတွေ နည်းနည်းပြန်ကျသွားတယ်။ အားလုံးကလည်း လမ်းတွေပြန်ဖွင့်ပြီး ဈေးနှုန်းတွေကျသွားဖို့ပဲ မျှော်လင့်နေကြတယ်။ အခုက လမ်းပိတ်တာရော၊ မိုးကြီးလို့ ရေလျှံနေတာရောဆိုတော့ အတော်ကို ဒုက္ခရောက်နေကြပြီလေ” ဟု ပြောသည်။
ကုန်ပစ္စည်းပြတ်လပ်မှုကြောင့် လောင်စာဆီနှင့် အခြေခံစားသောက်ကုန် ဈေးနှုန်း အဆမတန် မြင့်တက်ခဲ့မှုများ၊ ဆေးဝါးပြတ်လပ်မှုကြောင့် ဆေးရုံဆေးပေးခန်းများ အခက်ကြုံနေရမှုများအပြင်၊ လတ်တလောတွင် မိုးများ အဆက် မပြတ်ရွာသွန်းမှုကြောင့် မဏီပူရ်ပြည်နယ် အင်ဖားလ်မြို့တွင် ရေမြောင်းများ ရေလျှံပြီး ဈေးဆိုင်များပိတ်ရခြင်း၊ လူနေအိမ်များရွှေ့ပြောင်းရခြင်းများ ကြုံတွေ့နေရသည်ဟု ဒေသခံများကဆိုသည်။
မဏီပူရ်ပြည်နယ် အင်ဖားလ်မှ မြန်မာနိုင်ငံ တမူးသို့ ဆက်သွယ်ထားသောလမ်းမှာ နှစ်နိုင်ငံ နယ်စပ်ကုန်သွယ်မှုအတွက် အရေးပါသော လမ်းကြောင်းတခုဖြစ်သောကြောင့် လမ်းများပြန်ဖွင့်ပေးမည်ဆိုပါက ရပ်ဆိုင်းထားရသော နယ်စပ်ကုန်သွယ်မှုများ ပြန်လည်အဆင်ပြေလာလိမ့်မည်ဟု နယ်စပ်ကုန်သည်တဦးကဆိုသည်။
“ဒီ ၂ လလောက် အတွင်း တော်တော် ကမောက်ကမ ဖြစ်တယ်။ တမူးဘက်က လမ်းက ပြန်ပွင့်လို့ နမ့်ဖာလုံဈေးက ပစ္စည်း ပို့တယ်ဆိုပေမယ့် အရင်ကရဲ့ ၁၀ ရာနှုန်းလောက်ပဲ ရောင်းရတာ။ ဆိုးတာက မဏီပူရ်ကနေတဆင့် ဗမာပြည်ဘက်ကို လာတဲ့ ကုန်တွေက နမ့်ဖာလုံကို ပြန်မ၀င်နိုင်တာဘဲ။ လမ်းပြန်ပွင့်ရင်တော့ ပုံမှန်ပြန်ဖြစ်သွားနိုင်တယ်” ဟု အိန္ဒိယ-မြန်မာ နယ်စပ် ကုန်သည် တဦးကပြောသည်။
မဏီပူရ်-မြန်မာနယ်စပ် တမူးရှိ နမ့်ဖာလုံဈေးမှတဆင့် ဆန်၊ လူသုံးကုန်ပစ္စည်းများ၊ အထည်များနှင့် အခြေခံစားသောက်ကုန်များ အိန္ဒိယသို့ တင်သွင်းပြီး၊ အိန္ဒိယထွက်ကုန်ဖြစ်သည့် ချည်၊ လူသုံးကုန်ပစ္စည်းများ၊ ဆေးဝါးများ စသည်တို့ကို မြန်မာပြည်သို့ ပြန်လည်တင်ပို့လေ့ရှိသည်။
မကြာသေးမီက အင်ဖားလ်မှ တမူးသို့သွားသည့်လမ်းပိုင်းကို ပြန်လည်ဖွင့်ပေးခဲ့သော်လည်း ကုန်ပစ္စည်းများကို အကန့် အသတ်ဖြင့်သာ သယ်ယူရခြင်းနှင့် အိန္ဒိယထွက်ကုန်များကို ပြန်လည်တင်ပို့ခွင့်မရခြင်းကြောင့် နယ်စပ်ကုန်သည်များ အခက်ကြုံနေကြရသည်။
မဏီပူရ် ပြည်နယ်တွင်းနေ လူနည်းစု နာဂတိုင်းရင်းသားများ အခွင့်အရေးမရရှိမှုကြောင့် ပြည်နယ်အုပ်ချုပ်ရေးအဖွဲ့၏ ရွေးကောက်ပွဲကို သပိတ်မှောက်၍ သီးခြားအုပ်ချုပ်ခွင့်အပါအ၀င်၊ လူမျိုးစုအခွင့်အရေးများ တောင်းဆိုသည့်အနေဖြင့် နာဂကျောင်းသားများ အဖွဲ့က ဧပြီ ၁၂ ရက်နေ့မှ စတင်ပြီး မဏီပူရ်နှင့် အခြားပြည်နယ်များကို ဆက်သွယ်ထားသည့် အဓိကလမ်းမကြီး နှစ်ခုဖြစ်သော NH 39 နှင့် NH 53 ကို ပိတ်ဆို့၍ ကုန်ပစ္စည်းသယ်ဆောင်မှုများကို တားမြစ်ခြင်း၊ ကုန်ပစ္စည်း တင်ဆောင်သည့်ကားများကို မီးရှို့ခြင်းစသည်ဖြင့် ဆန္ဒပြခဲ့ကြသည်။
မေ ၃ ရက်နေ့တွင် နာဂအမျိုးသား ဆိုရှယ်လစ်အဖွဲ့၏ အထွေထွေ အတွင်းရေးမှူး Thuingaleng Isak Muivah ၏မွေးရပ်မြေ ပြန်မည့်ခရီးစဉ် ရှုပ်ထွေးမှုများ ဖြစ်ပေါ်စေမည်ဆိုကာ ပြည်နယ်အစိုးရက ကွန်မန်ဒိုတပ်များ ချထား တားမြစ်မှုများမှာလည်း နာဂအဖွဲ့အစည်းများနှင့် မဏီပူရ်အစိုးရအကြား တင်းမာစေသည့်အချက်တခု ဖြစ်ခဲ့သည်။
လမ်းပိတ်ဆို့မှုများတွင် တာဝန်ရှိသည်ဟုဆိုကာ အာသံပြည်နယ် ဂိုဟာတီမြို့ တရာရုံးမှ နာဂခေါင်းဆောင် ၂ ဦးကို ဆုငွေ ရူပီး ၁ သိန်းစီဖြင့် ၀ရမ်းထုတ်ပြန်လိုက်မှုကြောင့် တင်းမာမှုများ ပိုမိုပြင်းထန်လာခဲ့ပြီး လမ်းပိတ်ဆို့ဆန္ဒပြမှုကို ရက်အကန့်အသတ်မရှိ လုပ်ဆောင်မည်ဟု နာဂကျောင်းသားများအဖွဲ့က ဆိုခဲ့သည်။
ပြည်နယ်အစိုးရက အင်အားသုံးဖြေရှင်းခြင်းမှာ နောက်ဆုံးနည်းလမ်းဖြစ်သည်ဟု ကနဦးပြောဆိုမှုများပြုခဲ့ပြီး ဗဟို အစိုးရ ထံမှလည်း အမျိုးသမီး လုံခြုံရေးတပ်ဖွဲ့တဖွဲ့အပါအ၀င် အဖွဲ့ ၁၆ ဖွဲ့ကို စေလွှတ်မည်ဟု ပြည်ထဲရေးဝန်ကြီး G.K. Pillai က သတင်းထောက်များကို ပြောဆိုခဲ့သည်။
မဏီပူရ်ပြည်နယ်အတွင်းသို့ ကုန်စည်စီးဆင်းမှုများ ပြတ်တောက်သွားခဲ့မှုကြောင့် မဏီပူရ်ပြည်နယ်မှ ဖြတ်သန်းသည့် အိန္ဒိယ-မြန်မာ နယ်စပ်ကုန်သွယ်မှုများ ရပ်ဆိုင်းခဲ့ရသည်။
ထိုအတောအတွင်း ဗဟိုအစိုးရက မဏီပူရ်ပြည်နယ်တွင် အရေးပေါ်လိုအပ်နေသော ဆေးဝါးနှင့် စားသောက်ကုန်များကို လေကြောင်းဖြင့် ပို့ဆောင်ခြင်း၊ အခြားလမ်းများမှ လုံခြုံရေးကားများဖြင့် ပစ္စည်းများ တင်ပို့ခြင်းတို့ကို လုပ်ဆောင်ခဲ့ရသည်။
မဏီပူရ်ပြည်နယ်တွင်းသို့ အခြားပြည်နယ်များမှ တင်သွင်းသည့် ဓာတ်ငွေ့နှင့် လောင်စာဆီ၊ ဆေးဝါးနှင့် ဆေးပစ္စည်းများ၊ ဆန်နှင့် အခြားအခြေခံ စားသောက်ကုန်များ ပြတ်လပ်မှုကြောင့် ကုန်ဈေးနှုန်းများ အဆမတန်မြင့်တက်လာ၍ လမ်းများ ပြန်လည်ဖွင့်ပေးရန် မဏီပူရ်ဒေသခံများက ဆန္ဒပြတောင်းဆိုခဲ့သည်။
| < Prev | Next > |
|---|
