KIA က ခြိမ်းခြောက်ခြင်း၊ စတင်တိုက်ခိုက်ခြင်းများ ပြုလုပ်ခဲ့မှုနှင့် ကချင်ပြည်နယ်ရှိ တာပိန် ရေအားလျှပ်စစ်စီမံကိန်းအား ကာကွယ် စောင့်ရှောက်လိုသည့် ရည်မှန်းချက် တခုတည်းဖြင့် အစိုးရ စစ်တပ်က KIA ကို မလွှဲမရှောင်သာ တိုက်ခိုက်ရခြင်း ဖြစ်သည်ဟု ယနေ့ထုတ် မြန်မာ့အလင်း သတင်းစာ၌ ရေးသားထားသည်။ KIA ၏ နှောင့်ယှက်ခြိမ်းခြောက် အကျပ်ကိုင်မှုများကြောင့် အမှတ် (၁) လျှပ်စစ်စွမ်းအား ၀န်ကြီးဌာနနှင့် တရုတ်နိုင်ငံ Datang(yunnan) United Hydropower Developing(DUHD) ကုမ္ပဏီတို့ တည်ဆောက်နေသော တာပိန် ရေအားလျှပ်စစ် စီမံကိန်းတွင် လုပ်ကိုင်နေသည့် တရုတ်နိုင်ငံသား၂၁၅ ဦး သည် စီမံကိန်းမှ ပြန် လည် ထွက်ခွာသွားခဲ့ရကြောင်း၊ ကချင်ပြည်နယ်အတွင်းရှိ သံပေါင်တံတား ၂၅ စင်း ကို KIA က ဇွန် ၁၄ ရက်မှ ၁၆ ရက်အတွင်း ဖောက်ခွဲ ဖျက်ဆီးခဲ့ကြောင်းလည်း သတင်းစာတွင် ဖော်ပြထားသည်။
