“အာဏာပိုင်တို့က မည်သည့် အတွက်ကြောင့် ထိုသို့ တိုက်ပိတ် အပြစ်ပေးခြင်း ဖြစ်ကြောင်းကို မသိရှိရပါ” ဟု ပြည်ပအခြေစိုက် နိုင်ငံရေး အကျဉ်းသားများ ကူညီ စောင့်ရှောက်ရေးအသင်း (AAPP)၏ ယနေ့ ထုတ်ပြန်လိုက်သည့် သတင်း ထုတ်ပြန်ချက်တွင် ဖော်ပြထားသည်။
တိုက်ပိတ်ခံရသူများမှာ သံဃာတပါးဖြစ်သည့် ဦးစန္တိမာ၊ အမျိုးသား ဒီမိုကရေစီ အဖွဲ့ချုပ်မှ ဦးစောနိုင်းနိုင်း၊ ဦးစိုးဟန်၊ ဦးအောင်နိုင်၊ ဗမာနိုင်ငံလုံး ဆိုင်ရာ ကျောင်းသားသမဂ္ဂများ အဖွဲ့ချုပ်မှ လွင်ကိုလတ် တို့ ဖြစ်သည်ဟု ဆိုသည်။
လွှတ်တော်ကိုယ်စားလှယ် ဦးစောနိုင်းနိုင်း သည် သွေးတိုးရောဂါ၊ ရှေ့နေ ဦးစိုးဟန်သည် မျက်စိဝေဒနာ ခံစား နေကြရသဖြင့် ဆေးဝါး ကုသမှု လိုအပ်နေသည်ဟု AAPP၏ သတင်းထုတ်ပြန်ချက်တွင် ဖော်ပြထားသည်။ ၎င်းတို့နှစ်ဦးသည် ၂၀၀၀ ပြည့်နှစ်က ဒေါ်အောင်ဆန်းစုကြည် နှင့် ခေါင်းဆောင်များ လွတ်မြောက်ရေးအတွက် ကြေညာချက်တစောင် ရေးသား ထုတ်ဝေမှုဖြင့် ထောင်ဒဏ် ၂၁ နှစ်စီ ကျခံနေရသူများ ဖြစ်သည်။
မိသားစုများက ၎င်းတို့ထံသို့ လိုအပ်သည့် ဆေးဝါးများ ဆက်သွယ်ပေးပို့ခွင့် ပိတ်ပင်ခံထားရသဖြင့် ၎င်းတို့၏ ကျန်းမာရေးအတွက် အလွန် စိုးရိမ်ရသည်ဟု AAPP၏ သတင်းထုတ်ပြန်ချက်တွင် ဖော်ပြထားသည်။
“ပြစ်ဒဏ် ကျနေတယ် ဆိုတဲ့အတွက် ဆေးဝါးကုသမှု ရမှာမဟုတ်ဘူး၊ မိသားစုနဲ့ တွေ့ခွင့် ရမှာ မဟုတ်ဘူး၊ ပြစ်ဒဏ်က တလ ကျော်သွားပြီ၊ ဆေးဝါး ပေးခွင့် မရတဲ့အတွက် မိသားစုကလည်း စိုးရိမ်နေတယ်” ဟု AAPP အသင်း၏ တွဲဖက် အတွင်းရေးမှူး ကိုဘိုကြည်က ပြောသည်။
နိုင်ငံရေး အကျဉ်းသားများ၏ ကျန်းမာရေးကို သွားရောက် စစ်ဆေးလေ့ ရှိသည့် နိုင်ငံတကာ ကြက်ခြေနီ ကော်မတီကိုလည်း အာဏာပိုင်တို့က ၂၀၀၅ ခုနှစ်မှ စတင်ပြီး အကျဉ်းထောင်များသို့ သွားရောက်ခွင့် ပိတ်ထားခဲ့သည်။
| < Prev | Next > |
|---|
