သူ၏ ခရီးစဉ်အတွင်း စစ်ခေါင်းဆောင် ဗိုလ်ချုပ်မှူးကြီး သန်းရွှေ၊ ၀န်ကြီးချုပ် ဗိုလ်ချုပ်ကြီး သိန်းစိန် တို့နှင့် တွေ့ဆုံမည်ဟု ဆိုသည်။
“ဗိုလ်ချုပ်မှူးကြီးသန်းရွှေ နဲ့ ကျနော်က ညီအစ်ကိုလို ဆက်ဆံရေး ရှိတယ်၊ ဗိုလ်ချုပ်ကြီးသိန်းစိန်နဲ့ကတော့ မိတ်ဆွေလုိ ဆက်ဆံရေးမျိုး ရှိပါတယ်” ဟု သူ၏ ပြောကြားချက်ကို သတင်းစာတွင် ဖော်ပြထားသည်။
မစ္စတာ ချာဗာလစ်သည် ထိုင်းနိုင်ငံ ကာကွယ်ရေးဦးချုပ်အဖြစ် တာဝန် ထမ်းဆောင်ခဲ့စဉ်က ၁၉၈၈ ခုနှစ် မြန်မာနိုင်ငံ၏ အာဏာသိမ်း စစ်အစိုးရကို ပထမဆုံး စတင်အသိအမှတ်ပြုသည့် နိုင်ငံ့ခေါင်းဆောင်တယောက် ဖြစ်သည်။
ဝန်ကြီးချုပ်အဖြစ် သူတာဝန်ယူစဉ် မြန်မာစစ်အစိုးရအား လက်နက်ကိုင် ဆန့်ကျင်နေသည့် ကျောင်းသား အများအပြားကို ထိုင်းနိုင်ငံ မြောက်ပိုင်း တာ့ခ်ခရိုင်တွင် စခန်းများသို့ စုစည်းပြီး၊ မြန်မာနိုင်ငံသို့ ပြန်လည် ပို့ဆောင်ခဲ့သည်။
အပြန်အလှန်အားဖြင့် မြန်မာ့ရေပိုင်နက်အတွင်း ငါးဖမ်းခြင်း၊ နယ်စပ်ဒေသတွင် သစ်ထုတ်လုပ်ရေးခြင်း စသည့် စီးပွားရေး လုပ်ကိုင်ခွင့်များကို စစ်အစိုးရက ပေးအပ်ခဲ့သည်။
မစ္စတာ ချာဗာလစ်သည် ထိုင်း- မြန်မာနယ်စပ်မှ လူမျိုးစု လက်နက်ကိုင် အဖွဲ့များကို စစ်အစိုးရနှင့် အပစ်အခတ် ရပ်စဲရန် ဖိအားပေးခဲ့သူဖြစ်သည်ဟု ကရင်အမျိုးသား အစည်းအရုံး (KNU) ခေါင်းဆောင် တဦး ဖြစ်သူ စောဒေးဗစ်ထောက ဧရာဝတီကို ပြောသည်။
“KNU နဲ့ သူ ဗိုလ်မှူးကြီး ဘ၀မှာတုန်းက အရမ်း ရင်းနှီးတယ်၊ ဒါပေမယ့် ၀န်ကြီးချုပ်ဘ၀ရောက်တော့ လက်နက် စ ပိတ်ခဲ့တာ သူပဲ။ သူ အကျိုးအမြတ်အတွက် ဘာမဆို လုပ်တယ်” ဟု စောဒေးဗစ်ထောက ထောက်ပြသည်။
ဤအတောအတွင်း မစ္စတာ ချာဗာလစ်က ထိုင်းအစိုးရ၏ မြန်မာပြည်ဆိုင်ရာ မူဝါဒကို အပြစ်တင်လိုက်သည်။
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်အား စစ်အစိုးရက နေအိမ်အကျယ်ချုပ် ချထားခြင်းနှင့် ပတ်သက်ပြီး လက်ရှိ ထိုင်းအစိုးရက ဝေဖန်ပြောကြားခဲ့ခြင်းမှာ မှားယွင်းကြောင်း မစ္စတာ ချာဗာလစ်က မကြာသေးခင်က ပြောလိုက်သည်။
မစ္စတာ ချာဗာလစ်သည် ပွေ့ထိုင်းပါတီ၏ ခေါင်းဆောင်တဦးဖြစ်နေသည်။ ပွေ့ထိုင်းသည် ၀န်ကြီးချုပ်ဟောင်း မစ္စတာ သက်ဆင် ရှင်နာဝပ်ကို အပြည်အ၀ ထောက်ခံသည့်ပါတီ ဖြစ်သည်။
ဗိုလ်ချုပ်ကြီးဟောင်း ချာဗာလစ်သည့် မလေးရှားနိုင်ငံသို့လည်း သွားမည်ဟု ကြေညာထားသည်။
မစ္စတာ ချာဗာလစ်၏ ဒေသတွင်းခရီးစဉ်တခုကြောင့် ထိုင်းအစိုးရက စိတ်အနှောက်အယှက် ဖြစ်နေသည်။
မကြာသေးမီက ကမ္ဘောဒီးယားနိုင်ငံသို့ သူသွားရောက်ခဲ့ပြီး နောက်ပိုင်းတွင် ကမ္ဘောဒီးယား ၀န်ကြီးချုပ် ဟွန်ဆန်က ထွက်ပြေးနေရသည့် မစ္စတာ သက်ဆင်အား ခိုလှုံခွင့် ပေးမည်ဟု ကြေညာခဲ့သည်။
ထိုကြောင့် ထိုင်းဝန်ကြီးချုပ် အဖိဆစ် ဝေ့ချာချီဝ ( Abhisit Vejjajiva ) ၏ ဒီမိုကရက် ပါတီမှ ပြောရေးဆိုခွင့်ရှိသူ တဦးကလည်း မစ္စတာ ချာဗာလစ်ကို ထိုင်းနှင့် အိမ်နီးချင်း နိုင်ငံများအကြား ဆက်ဆံရေး ရှုပ်ထွေးစေရန် ပြုလုပ်ခြင်းမှ ရှောင်ကျဉ်ရန် ပြောကြားခဲ့သည်။
“အခု မလေးရှားနဲ့ မြန်မာခရီးစဉ်တွေဟာ ကမ္ဘောဒီးယား ခရီးစဉ်လိုမျိုး စိတ်မသက်မသာ ဖြစ်လာစရာ မရှိဘူးလို့ မျှော်လင့်ပါတယ်” ဟု အဆိုပါ ပြောခွင့်ရပုဂ္ဂိုလ်က ပြောသည်။
သို့သော် မစ္စတာ ချာဗာလစ် မြန်မာနိုင်ငံသို့ သွားရောက်ခြင်းဖြင့် မြန်မာနိုင်ငံတွင် ဖြစ်ပေါ် နေသော ပြဿနာများကို ဖြေရှင်းနိုင်လိမ့်မည် မဟုတ်ဟု ထိုင်းနိုင်ငံထုတ် The Nation သတင်းစာမှ အကြီးတန်း သတင်းထောက် တဦး ဖြစ်သူ ဆူပါလပ်ခ် (Supulak) ကသုံးသပ် ပြောဆိုသည်။ မစ္စတာ ချာဗာလစ်သည် လက်ရှိ ထိုင်းအစိုးရ မကောင်းကြောင်း အတင်းအဖျင်းများကို သွားရောက် ပြောဆိုခြင်းသာ ဖြစ်လိမ့်မည်ဟု The Nation အကြီးတန်း သတင်းထောက်က ဆိုသည်။
| < Prev | Next > |
|---|
