ဇန်န၀ါရီ ၁၈ ရက်နေ့ နံနက် ၆ နာရီမှ နောက်တနေ့ နံနက် ၆ နာရီအထိ အသင်းသူအသင်းသား ရာနှင့်ချီကာ ၂၄ နာရီ အဆက်မပြတ် ဆုတောင်းကြခြင်း ဖြစ်သည်။
စိတ်နှလုံးတူညီစွာ မြစ်ဆုံရေလှောင်တမံ မဖြစ်မြောက်ရေးအတွက် အဓိကထား ဆုတောင်းကြပြီး ကချင်ပြည်နယ်အတွင်း ဒေသဖွံ့ဖြိုးရေးဟုဆိုကာ နယ်မြေရောင်းခြင်း၊ ရေကာတာအများအပြား ဆောက်လုပ်ခြင်းကြောင့် ကချင် တိုင်းရင်းသားများ၏ လူနေမှုဘ၀ အဘက်ဘက်မှ ဖိနှိပ်ခံနေရခြင်းများအတွက်လည်း ဆုတောင်းကြသည်ဟု သိရသည်။
မြစ်ဆုံရေလှောင်တမံ စီမံကိန်းကို တရုတ် စွမ်းအင် ရင်းနှီး မြှုပ်နှံမှု ကုမ္ပဏီ (CPI) အဖွဲ့ နှင့် Asia World ကုမ္ပဏီတို့ ပူးပေါင်း တည်ဆောက်မည်ဖြစ်ပြီး စီမံကိန်း ပြီးစီးပါက ထွက်ပေါ်လာသော လျှပ်စစ် ဓာတ်အား မဂ္ဂါဝပ် ၁၃၃၆၀ ကို တရုတ်နိုင်ငံသို့ ရောင်းချမည်ဖြစ်ကြောင်း သိရသည်။
“ကျနော်တို့က မြစ်ဆုံ ရေလှောင်တမံကြောင့် ဒုက္ခ ခံစားရတဲ့ ပြည်သူတွေအတွက်ရယ်၊ နောင်းမီ အရပ်ကို ကုမ္ပဏီတွေက အကြောင်း အမျိုးမျိုးပြ သိမ်းပိုက်လာတာကြောင့် ပြည်သူတွေ ခံစားရတဲ့ဒုက္ခ တွေအတွက်နဲ့ အသင်းသူ အသင်းသားတွေ အနေနဲ့ ခွန်အားတွေရဖို့ ဆုတောင်းကြပါတယ်” ဟု မြစ်ကြီးနား ကချင်နှစ်ချင်း ခရစ်ယာန်အဖွဲ့ချုပ်မှ သင်းအုပ်ဆရာက ပြောသည်။
မြစ်ဆုံရေလှောင်တမံ ဆောက်လုပ်ပါက ဒေသခံများအပေါ် လူမှုရေးပြဿနာများ ကျရောက်နိုင်ပြီး ဘိုးဘွားပိုင် မြေယာနှင့် သီးနှံပင်များ ဆုံးရှုံးရမည် ဖြစ်ကြောင်း၊ ထို့ပြင် ကချင်တိုင်းရင်းသားများ၏ ယဉ်ကျေးမှု အမွေအနှစ်များ ပျောက်ကွယ်ကာ သဘာဝ ပတ်ဝန်းကျင် ပျက်စီးခြင်းနှင့် ဇီဝ မျိုးသုဉ်းမှုများလည်း ရေလွှမ်းမိုးမှုနှင့်အတူ ဖြစ်ပေါ်လာနိုင်ကြောင်း၊ ဒေသခံများက နေပြည်တော် သို့ ရေလှောင်တမံ မဆောက်လုပ်ရန် ကန့်ကွက်စာများ အကြိမ်ကြိမ်တင်ပြသော်လည်း စစ်အစိုးရက ဒီဇင်ဘာ ၂၁ ရက်နေ့က ရေလှောင်တမံ ဆောက်လုပ်မည်ဟု အတိအလင်း ကြေညာလိုက်ပြီဖြစ်ကြောင်း ၎င်းက ဆိုသည်။
မြစ်ဆုံ ရေလှောင်တမံ မဆောက်လုပ်ရေးအတွက် ကန့်ကွက်စာကို ကချင်တိုင်းရင်းသားများ လက်မှတ်ရေးထိုးကာ တရုတ် အစိုးရသို့ ဇန်န၀ါရီ ၂၆ ရက်နေ့တွင် တင်ပြခဲ့ပြီး ရေလှောင်တမံ မဖြစ်မြောက်ရေးအတွက် ကမ္ဘာအရပ်ရပ်က ကူညီဆုတောင်းရန် ကြေညာခြင်းများ ပြုလုပ်ကြောင်းလည်း သိရသည်။
“လူသားတွေ မတတ်နိုင်တာ ဘုရားတတ်နိုင်တယ်လေ၊ ကျမတို့က ဖြစ်လာတဲ့ အရာတွေကိုဘယ်လိုမှ မပြောတတ်၊ မလုပ်တတ်တဲ့ အခြေအနေပါ၊ ဆုတောင်းတာကလွဲလို့ပေါ့” ဟု ကချင်တိုင်းရင်းသူ တဦးက ဆိုသည်။
မြစ်ဆုံ ရေလှောင်တမံကြောင့် ကချင်ပြည်သူပြည်သား များသာမက တနိုင်ငံလုံး မည်သည့် အကျိုး တစုံတရာ ခံစားရမည် မဟုတ်သောကြောင့် ၎င်းစီမံကိန်း မဖြစ်မြောက်စေရေးအတွက် နိုင်ငံတဝန်းရှိ ပြည်သူပြည်သား အားလုံး ကူညီဆုတောင်း ကြရန် တိုက်တွန်းကြောင်း ၎င်းက ပြောသည်။
| < Prev | Next > |
|---|
